āryasaṁghāṭa sūtram

āryasaṁghāṭa sūtram

(svastiḥ||) namaḥ sarvabuddhabodhisattvebhyaḥ||

<1> evaṁ mayā śrutamekasmin samaye bhagavān rājagṛhe viharati sma| gṛddhrakūṭe parvate mahatā bhikṣusaṁghena| sārdhaṁ

<2> dvāviṁśatibhirbhikṣusahasraiḥ tadyathā āyuṣmatā cājñātakauṇḍinyena| āyuṣmatā ca mahāmaudgalyāyena| āyuṣmatā ca śāradvatīputreṇa| āyuṣmatā ca mahākāśyapena| āyuṣmatā ca rāhulena| āyuṣmatā ca bakkulena| āyuṣmatā ca bhadravāsena| āyuṣmatā ca bhadraśriyā| āyuṣmatā ca nandaśriyā| āyuṣmatā ca jāṅgulena| āyuṣmatā ca subhūtinā| āyuṣmatā ca revatena| āyuṣmatā ca nandasenena| āyuṣmatā cānandena| evaṁpramukhairdvāviṁśatibhirbhikṣusahasraiḥ|

<3> dvāṣaṣṭibhiśca bodhisattvasahasraiḥ tadyathā maitreyeṇa ca bodhisattvena mahāsattvena| sarvaśūreṇa ca bodhisattvena mahāsattvena| kumāraśriyā ca bodhisattvena mahāsattvena| kumāravāsinā ca bodhisattvena mahāsattvena| kumārabhadreṇa ca bodhisattvena mahāsattvena| anūnena ca (nāma) bodhisattvena mahāsattvena| maṁjuśriyā ca kumārabhūtena bodhisattvena mahāsattvena| samantabhadrena ca bodhisattvena mahāsattvena| sudarśanena ca bodhisattvena mahāsattvena| bhaiṣajyarājena ca bodhisattvena mahāsattvena| (vajrasenena ca bodhisattvena mahāsattvena|) evaṁpramukhairdvāṣaṣṭibhirbodhisattvasahasraiḥ

<4> dvāṣaṣṭibhiśca devaputrasahasraiḥ tadyathā arjunena ca devaputreṇa| bhadreṇa ca devaputreṇa| subhadreṇa ca devaputreṇa| dharmarucinā ca devaputreṇa| candanagarbheṇa ca devaputreṇa| candavāsinā ca devaputreṇa| candanena ca devaputreṇa| candanasenena ca devaputreṇa| evaṁpramukhairdvāṣaṣṭibhirdevaputrasahasraiḥ||

<5> aṣṭābhiśca devakanyāsahasraiḥ tadyathā mṛdaṁginyā ca devakanyāyā| prāsādavatyā ca devakanyāyā| mahātmasaṁprayuktayā ca devakanyāyā| varṣaśriyāyā ca devakanyāyā| (padmaśriyāya ca devakanyāyā|) prajāpativāsinyā ca devakanyāyā| balinyā ca devakanyāyā| subāhuyuktayā ca devakanyāyā| evaṁpramukhairaṣṭābhirdevakanyāsahasraiḥ

<6> aṣṭābhiśca nāgarājasahasraiḥ tadyathā apalālena ca nāgarājñā| elapatreṇa ca nāgarājñā| timiṅgilena ca nāgarājñā| kuṁbhasāreṇa ca nāgarājñā| kuṁbhaśīrṣeṇa ca nāgarājñā| sunandena ca nāgarājñā| suśākhena ca nāgarājñā| gavaśīrṣeṇa ca nāgārājñā| evaṁpramukhairaṣṭābhirnāgarājasahasrais

<7> te sarve yena rājagṛhaṁ mahānagaraṁ yena gṛddhrakūṭaḥ parvato yena ca bhagavāṁcchākyamunistathāgato'rhan samyaksaṁbuddhastenopasaṁkrāmadupasaṁkramya bhagavataḥ pādau śirasābhivandya bhagavantaṁ triṣpradakṣiṇīkṛtya bhagavataḥ puratastasthire|

<8> etadavocan deśayatu bhagavāṁ dharmaṁ deśayatu sugataḥ dharmaṁ yaṁ śrutvāsme kṣipramanuttarā samyaksaṁbodhimabhisaṁbuddhyema yena ca sarvasattvānāṁ karmāvaraṇakṣayo bhaveyāt) bhagavāṁśca tūṣṇībhāvenādhivāsayati sma|

<9> atha khalu sarvaśūro bodhisattvo mahāsattvaḥ utthāyāsanādekāṁsamuttarāsaṅgaṁ kṛtvā dakṣiṇaṁ jānumaṇḍalaṁ pṛthivyāṁ pratisthāpya yena bhagavāṁstenāṁjaliṁ praṇamayya bhagavantametadavocat

<10> bahvyo bhagavan devakoṭyopsarakanyākoṭyo bodhisattvakoṭyaḥ bahvyo bhagavaṁcchrāvakakoṭyaḥ sannipatitāḥ sanniṣaṇṇā dharmaśravaṇāya| tatsādhu bhagavan teṣāṁ yathāsannipatitānāṁ (sanniṣaṇṇānāṁ) tathāgato'rhan samyaksaṁbuddhastathārūpaṁ dharmanayapraveśaṁ deśayatu| yathaiṣāṁ syāddīrgharātramarthāya hitāya sukhāya devānāṁ ca manuṣyānāṁ ca yathārūpeṇa dharmanayapraveśena deśitena vṛddhānāṁ sattvānāṁ saha śravaṇenaiva sarvakarmāvaraṇāni caiṣāṁ parikṣayaṁ gaccheyuḥ daharāśca sattvāḥ kuśaleṣu dharmeṣvabhiyujyamānā viśeṣāmadhigaccheyurna hīyeranna parihīyeran kuśalairdharmaiḥ||

<11> evamukte bhagavān sarvaśūraṁ bodhisattvaṁ mahāsattvametadavocat - sādhu sādhu sarveśūra sādhu khalu punastvaṁ sarvaśūra yastvaṁ tathāgatamarhantaṁ samyaksaṁbuddhametamarthaṁ paripraṣṭavyaṁ manyase| tena hi tvaṁ sarvaśūra śṛṇu sādhu ca suṣṭhu ca manasikuru................. te|

<12> evaṁ bhagavanniti sarvaśūro bodhisattvo mahāsattvo bhagavataḥ pravyaśrauṣād|

<13> bhagavan asyaitadavocat asti sarvaśūra [(saddharmaparyāyo| yena dharmaparyāyeṇa sarvasatvānāṁ paṁcānantaryāṇi karmāvaraṇani kṣayaṁ ...................| tathānye ca karmāvaraṇāni kṣayaṁ gacchante| kṣipraṁ cānuttarāṁ samyaksaṁbodhim abhisaṁbuddhayaṁteḥkataro bhagavaṁ saddharmaparyāyaḥ

<14> bhagavānāhaḥ) saṁghāṭo nāma dharmaparyāya| ya etarhi jambudvīpe pracariṣyati| yaḥ kaścit sarvaśūremaṁ saṁghāṭaṁ dharmaparyāyaṁ śroṣyati| tasya pañcānantaryāṇi karmāṇi parikṣayaṁ yāsyanti| avaivartikāśca bhaviṣyantyanuttarāyāṁ samyaksaṁbodhau|

<15> tatkiṁ manyase sarvaśūra ya imaṁ saṁghāṭasūtraṁ dharmaparyāyaṁ śroṣyati| yathaikasya tathāgatasya [satkāraṁ kṛtvā] puṇyaskandhastathā tāvantaṁ puṇyaskandhaḥ sa sattva prasaviṣyatīti| naivaṁ sarvaśūra draṣṭavyaṁ|

<16> sarvaśūro bodhisattva āha| yathā kathaṁ punarbhagavan draṣṭavyaṁ|

bhagavānāha| yathā gaṁgānadībālukāsamānāṁ tathāgatānāṁ arhatāṁ samyaksaṁbuddhānāṁ (satkāraṁ kṛtvā) puṇyaskandhastāvantaṁ sarvaśūra te satvāḥ puṇyaskandhaṁ prasaviṣyanti| ye sarvaśūra imaṁ saṁghāṭaṁ dharmaparyāyaṁ śroṣyanti te sarve avaivartikā bhaviṣyanti (anuttarasyāṁ samyaksaṁbodheḥ)| sarve ca tathāgataṁ drakṣyanti| sarve ca tathāgatadarśāvino bhaviṣyanti| sarve cānuttarāṁ samyaksaṁbodhimabhisaṁbhotsyante| adhṛṣyāśca bhaviṣyanti mārena pāpīmatā| te ca sarve tadeva kuśaladharmamanuprāpsyanti| ye sarvaśūra imaṁ saṁghāṭasūtraṁ śroṣyanti| te sarve utpādanirodhaṁ jñāsyanti|

<17> atha te sarve (yathāsannipatitā bodhisattvā mahāśrāvakā) devanāgamanuṣyāpsarakanyākoṭyastena kālena tena samayenotthāyāsanebhyaḥ ekāṁsānyuttarāsaṁgāni kṛtvā dakṣiṇāni jānumaṇḍalāni pṛthivyāṁ pratiṣṭhāpya yena bhagavāṁstenāṁjalayaḥ praṇamayya (te sarve) bhagavantaṁ paripṛcchanti sma| kiyantaṁ bhagavannekasya tathāgatasya (satkāraṁ kṛtvā) puṇyaskandhaḥ

<18> bhagavān āha| śṛṇu kulaputrā; ekasya buddhasya puṇyaskandhasya pramāṇaṁ tadyathā mahāsamudre udakabindavaḥ yāvanto jaṁbudvīpe paramāṇavaḥ yathā gaṁgānadībālikāsamāḥ sattvāste sarve daśabhūmipratiṣṭhitā bodhisattvā bhaveyuḥ yacca teṣāṁ bodhisattvānāṁ puṇyaskandhamato bahutaraṁ puṇyaskandhamekasya buddhasya (puṇyaskandham)| ataśca te sarvaśūra sattvā bahutaraṁ puṇyaskandhaṁ prasaviṣyanti ya imaṁ saṁghāṭaṁ dharmaparyāyaṁ śroṣyanti| yāvanna śakyaṁ gaṇanāyogena tasya puṇyaskandhasya paryantamadhigantuṁ| yasya sarvaśūra tasmin kāle tasmin samaye etad vacanaṁ śrutvā mahānutsāho bhaviṣyati sa evamaprameyaṁ puṇyaskandhaṁ prasaviṣyati|

<19> atha khalu sarvaśūro bodhisattvo mahāsattvo bhagavantametadavocat - katame te bhagavan sattvā ye dharmaparitṛṣitā bhaviṣyanti| evamukte bhagavān sarvaśūraṁ bodhisattvaṁ mahāsattvametadavocat - dvāvimau sarvaśūra sattvau dharmaparitṛṣitau| katamau dvau| yadutaikaḥ sarvaśūra sarvasattvasamacittaḥ dvitīyaḥ sarvaśūra yo dharmaṁ śrutvā sarvasattvānāṁ samaṁ prakāśayati (imau dvau dharmaparitṛṣitau)|

<20> sarvaśūro bodhisattva āha - katamaṁ bhagavan dharmaṁ śrutvā sarvasattvānāṁ samaprakāśanā; bhagavān āha - ekaḥ sarvaśūra dharmaṁ śrutvā bodhāya pariṇāmayaṁti| yadā ca bodhāya pariṇāmayati tadā sarvasattvā dharmaparitṛṣitā bhaviṣyanti | dvitīyassarvaśūra yo mahāyānamavagāhayati sa nityaṁ dharmaparitṛṣito bhavat|

<21> atha te devanāgamanuṣyāpsarasakoṭya utthāyāsanād bhagavataḥ purataḥ prāṁjalayo bhūtvā bhagavantametadavocan vayaṁ bhagavan dharmaparitṛṣitāḥ paripūrayatu bhagavān asmākaṁ sarvasattvānāṁ cāśā|

<22> atha khalu bhagavāṁstasyāṁ velāyāṁ smitaṁ prāduṣcakāraḥ atha khalu sarvaśūro bodhisattvo mahāsattva utthāyāsanādyena bhagavāṁstenāṁjaliṁ praṇamayya bhagavantametadavocat - ko bhagavan hetuḥ kaḥ pratyayaḥ smitasya prāduṣkaraṇāya|

<23> atha khalu bhagavān sarvaśūraṁ bodhisattvaṁ mahāsattvaṁ āmantrayāmāsa| ye sarvaśūra sattvā ihāgatvā te sarve anuttarāṁ samyaksaṁbodhimabhisaṁbuddhyante| sarve te tathāgatagocarapariniṣpattaye pariniṣpadyante|

<24> sarvaśūro bodhisattva āha - ko bhagavan hetuḥ kaḥ pratyayaḥ yadete sattvā ihagatvānuttarāṁ samyaksaṁbodhimabhisaṁbuddhyante bhagavānāha - sādhu sādhu sarvaśūra yastvaṁ tathāgatametamarthaṁ paripraṣṭavyaṁ manyase| tena hi sarvaśūra śṛṇu| iha sarvaśura pariṇāmanaviśeṣo draṣṭavyaḥ|

<25> bhūtapūrvaṁ sarvaśūrātīte'dhvanyasaṁkhyeyaiḥ kalpairyadāpi tena kālena tena samayena ratnaśrīrnāma tathāgato'rhan samyaksaṁbuddho loko udapādi vidyācaraṇasaṁpannaḥ sugato lokavidanuttaraḥ puruṣadamyasārathiḥ śāstā devānāṁ ca manuṣyāṇāṁ ca buddho bhagavān|

<26> tena khalu punaḥ sarvaśūra kālenāhaṁ māṇāvako bhūvan ye sattvāḥ sāṁprataṁ mayā buddhajñāne pratiṣṭhapitāste sarve tena kālena tena samayena mṛgā abhūvan tena ca kālena tena samayenāhamevaṁ praṇidhānamakārṣīd ye kecin mṛgāḥ sāṁprataṁ duḥkhena paripīḍitāḥ ete sarve mama buddhakṣetra upapadyeran sarvāṁśca tānahaṁ buddhajñāne pratiṣṭhāpayeyaṁ te ca mṛgāstadvacanaṁ śrutvā evaṁ vācamabhāṣanta - evaṁ bhavatu; tena sarvaśūra kuśalamūlenaite sattvā ihagatvānuttarāṁ samyaksaṁbodhimabhisaṁbhotsyante||

<27> atha khalu sarvaśuro bodhisattvo mahāsattvo bhagavato'ntikāttadutsāhaṁ śrutvā bhagavantametadavocat - kiyantaṁ bhagavaṁsteṣāṁ sattvānāṁ āyuṣpramāṇaṁ bhaviṣyati| bhagavān āha| caturaśītiḥ kalpasahasrāṇi teṣāṁ sattvānāmāyuṣpramāṇaṁ bhaviṣyati|

<28> sarvaśūro bodhisattva āha - kiyantaṁ bhagavan kalpasya pramāṇaṁ|

bhagavān āha - śṛṇu kulaputra| tadyathāpi nāma sarvaśūra kaścideva puruṣo nagaraṁ kārayeddvādaśayojanāyāmavistāraṁ ūrdhvena trīṇi yojanāni pramāṇaṁ| tacca nagaraṁ tilaphalakaiḥ paripūrṇaṁ kuryāt (sa ca puruṣa śirajīvī syāt) atha sa puruṣo varṣaśatasyātyayāttatastilaphalakaiḥ paripūrṇānnagarād ekaṁ tilaphalakaṁ bahirnikṣipedanena paryāyeṇa sa puruṣaḥ sarvāṇi tāni tilaphalakāni kṣayaṁ kuryāt paryavadānaṁ kuryāt tacca nagaramamūlamapratiṣṭhānāṁ bhavenna cādyāpi ca kalpaṁ kṣīyeta||

<29> punaraparaṁ sarvaśūra (aparāṁ te upamā kariṣyāmyasyaivārthasya prasiddhaye|) tadyathāpi nāma parvato bhavet paṁcaviṁśad yojanāni pramāṇena dvādaśa yojanānyūrdhvena| atha kaścideva puruṣastasya parvatasya pārśve gṛhaṁ kārayet sa dīrghasyādhvano varṣaśatasyātyayena kāśikena vastreṇaikavārā parimārjayedevaṁ kṛtvā tasya parvatasya kṣayo bhavenna ca kalpaṁ kṣīyeta| etatsarvaśūra kalpasya pramāṇaṁ|

<30> atha khalu sarvaśūro bodhisattvo mahāsattva utthāyāsanād (ekāṁsamuttarāsaṁgaṁ kṛtvā dakṣiṇaṁ jānumaṇḍalaṁ pṛthivyāṁ pratiṣṭhāpya yena bhagavāṁstenāṁjaliṁ praṇāmya) bhagavantametadavocat - ekapariṇāmanayā bhagavannevaṁ bahu puṇyaskandhaṁ prasavati| yadutāśītiḥ kalpān sukhamāyuṣpramāṇaṁ bhaviṣyati| kaḥ punarvādo yastathāgataśāsane bahutaramadhikāraṁ kariṣyati| tasya kiyantamāyuṣpramāṇaṁ bhaviṣyati|

<31> bhagavān āha - śṛṇu kulaputra ya imaṁ saṁghāṭaṁ sūtraṁ śroṣyati| tasya caturaśītiḥ kalpasahasrāṇyāyuṣpramāṇaṁ bhaviṣyati| kaḥ punarvādo yaḥ saṁghāṭaṁ sūtraṁ likhāpayiṣyati vācayiṣyati| sa sarvaśūraḥ sattvo bahutaraṁ puṇyaskandhaṁ prasaviṣyati| yaḥ sarvaśūra prasannacittaḥ saṁghāṭaṁ sūtramadhyāśayena namaskariṣyati sa paṁcanavati kalpāṁ jātau jātismaro bhaviṣyati| ṣaṣṭi kalpasahasrāṇi rājā cakravartī bhaviṣyati| dṛṣṭeva dharme sarvaśūra sarveṣāṁ priyo bhaviṣyati manāpaḥ na sa sarvaśūra śastreṇa kālaṁ kariṣyati| priyo bhaviṣyati manāpaḥ na sa sarvaśūra śastreṇa kālaṁ kariṣyati| na viṣeṇa (nodakena nāgnau) kālaṁ kariṣyati| kākhordaṁ cāsya na kramiṣyati| maraṇakālasamaye carimanirodhe vartamāne navati buddhākoṭyaḥ saṁmukhaṁ drakṣyati| te ca sarvaśūra buddhā bhagavanta āśvāsayanti| mā bhaiḥ satpuruṣa tvayā saṁghāṭaṁ sūtraṁ mahādharmaparyāyaṁ subhāṣitaṁ śrutaṁ śrutvā iyān puṇyaskandhaḥ prasūtaḥ teṣāṁ paṁcanavati buddhakoṭyaḥ pṛthak pṛthag lokadhātuṣu buddhā bhagavanto vyākariṣyanti| kaḥ punarvādaḥ sarvaśūra ya imaṁ saṁghāṭasūtraṁ mahādharmaparyāyaṁ sakalasamāptaṁ vistareṇa śroṣyati| (lekhayiṣyati vācayiṣyati bhāvayiṣyati||)

<32> atha khalu sarvaśūro bodhisattvo mahāsattvo bhagavantametadavocat - ahaṁ bhagavan saṁghāṭasūtraṁ mahādharmaparyāyaṁ śroṣyāmi| kiyantaṁ (ahaṁ) bhagavan puṇyaskandhaṁ prasaviṣyāmi|

bhagavānāha - yāvanto gaṁgānadībālikāsamānāṁ buddhānāṁ bhagavatāṁ (satkāraṁ kṛtvā) puṇyaskandhastāvantaṁ sarvaśūra sa sattvaḥ puṇyaskandhaṁ prasaviṣyati|

<33> sarvaśūro bodhisattva āha - yadahaṁ bhagavan saṁghāṭasūtraṁ dharmaparyāyaṁ śṛṇomi nāhaṁ bhagavaṁstṛptiṁ saṁjānāmi|

bhagavān āha - sādhu sādhu sarvaśūra yastvaṁ dharmāṇāṁ tṛptiṁ na saṁjānāni| ahamapi sarvaśūra dharmāṇāṁ tṛptiṁ na saṁjānāmi| kaḥ punarvādaḥ sarvaśūra yad bālapṛthagjanāstṛptiṁ jñāsyanti|

<34> yaḥ kaścit sarvaśūra kulaputro vā kuladuhitā vā mahāyāne prasādaṁ janayiṣyanti| sa kalpasahasraṁ vinipātaṁ na gamiṣyati| paṁca kalpasahasrāṇi tiryakṣurnopapatsyate| dvādaśa kalpasahasrāṇi durbuddhiṁ sa bhavisyati| aṣṭādaśa kalpasahasrāṇi pratyantime janapade nopapatsyate| viṁśati kalpasahasrāṇi pradānaśūro bhaviṣyati| paṁcaviṁśat kalpasahasrāṇi devaloke upapatsyate| paṁcatriṁśat kalpasahasrāṇi brahmacaryaṁ cariṣyati| sa catvāriṁśat kalpasahasrāṇi niṣkrāntagṛhāvāso bhaviṣyati| paṁcāśat kalpasahasrāṇi dharmadharo bhaviṣyati| paṁcaṣaṣṭiḥ kalpasahasrāṇi maraṇānusmṛtiṁ bhāvayiṣyati| tasya sarvaśūra kulaputrasya vā kuladuhiturvā na kiṁcit pāpakāni karmāṇi saṁvetsyante| na ca tasya māraḥ pāpīmānavatāraṁ lapsyate| na jātu mātukukṣāvupapatsyate| ye sarvaśūra imaṁ saṁghāṭaṁ dharmaparyāyaṁ śroṣyanti| te yatra yatropapatsyante tatra tatra paṁcanavatyāsaṁkhyeyaiḥ kalpairvinipātaṁ na gamiṣyanti| aśītiḥ kalpasahasrāṇi śrutadharā bhaviṣyanti| kalpaśatasahasraṁ prāṇātipātāt prativiratā bhaviṣyanti navānavati kalpasahasrāṇi mṛṣāvādāt prativiratā bhaviṣyanti| trayodaśa kalpasahasrāṇi piśunavacanāt prativiratā bhaviṣyanti| durlabhāste sarvaśūra sattvā ya iman dharmaparyāyaṁ śroṣyanti|

<35> atha khalu sarvaśūro bodhisattvo mahāsattva utthāyāsanād ekāṁsamuttarāsaṁgaṁ kṛtvā dakṣiṇaṁ jānumaṇḍalaṁ pṛthivyāṁ pratiṣṭhāpya yena bhagavāṁstenāṁjaliṁ praṇāmya bhagavantametadavocat - kiyantaṁ bhagavaṁ(ste sattvā) apuṇyaskandhaṁ prasaviṣyati| ya iman dharmaparyāyaṁ pratikṣepsyanti|

bhagavānāha - bahu sarvaśūra saddharmapratikṣepādapuṇyaskandhaṁ prasaviṣyati|

<36> sarvaśūra āha - kiyantaṁ bhagavan sattvānāṁ pāpakaṁ karmaskandhaṁ bhaviṣyati|

bhagavānāha - alamalaṁ sarvaśūra mā me pāpakaṁ karmaskandhaṁ paripṛcchaḥ api tu sarvaśūra śṛṇu nirdekṣyāmi teṣāṁ saddharmapratikṣepakānāṁ pāpakaṁ akuśalaskandhaṁ| yāvantaṁ te pāpakamakuśalaskandhaṁ pratigṛhīṣyanti| ya iman dharmaparyāyaṁ pratikṣipanti| yaśca sarvaśūra dvādaśagaṁgānadībālikāsamānān tathāgatānāmarhatāṁ samyaksaṁbuddhānāmantike duṣṭacittamutpādayedyaścemaṁ saṁghāṭasūtraṁ pratikṣipedayaṁ tato bahutaraṁ pāpakam (kuśalaskandha prādurbhaviṣyati| ataḥ sarvaśūra-m-) akuśalaskandhaṁ prasaviṣyanti| ataste sarvaśūra saddharmapratikṣepakā sattvāḥ bahutaramakuśalaskandhaṁ prasaviṣyanti ye mahāyāne āghātacittamutpādayiṣyanti| dagdhāste sarvaśūra sattvā dagdhā eva|

<37> sarvaśūra āha - na te bhagavan sattvā śakyaṁ mocayituṁ| bhagavān āha - śṛṇu sarvaśūra; na śakyā mocayituṁ

tadyathāpi nāma sarvaśūra kaścideva puruṣaḥ kasyacit sattvasya śīrṣaṁcchiṁdyād atha sa puruṣaḥ kenacid bhaiṣajyena praliṁpena mākṣikena vā śarkarayā vā| guḍena vā ghṛtena vā tailena vā taṁ śīrṣaṁ pralepayet tatkiṁ manyase sarvaśūra śakyaṁ sa sattvaḥ punarapyutthāpayituṁ|

<38> sarvaśūro bodhisattva āha - na śakyaṁ bhagavan na śakyaṁ sugata|

bhagavān āha - (evameva sarvaśūra na śakya<<ṁ>>te sa sattvo mocayituṁ bahubhirupāyairyo mahāyānasyāgh[āta]cittam [u]t[p]ādayiti||)

<39>punaraparaṁ sarvaśūra| tadyathāpi nāma dvitīyaḥ puruṣo bhavet sa tīkṣṇena śastreṇāparasya sattvasya prahāraṁ dadyāt sa na śaknuyādekaprahāreṇa jīvitādvyavaropayituṁ| kiṁ cāpi sarvaśūra braṇamutpadyeta| atha ca punarbhaiṣajyayogaṁ kartavyaṁ tadā braṇāt parimucyate| yadā parimukto bhavati tadā duḥkhaṁ smarati| ahamidānīñjānāmi na kadācit punaḥ pāpakamakuśalaṁ karmābhisaṁskāraṁ kariṣyāmi|

<40> evameva sarvaśūra sa saddharmapratikṣepakaḥ puruṣo yadā narake duḥkhaṁ smarati tadā sarvapāpaṁ parivarjayati| yadā sarvapāpaṁ parivarjayati| tadā sarvadharmā āmukhīkariṣyati (yadā) sarvadharmā āmukhīkṛtvā (tadā) sarvakuśaladharmapāripūriṅ kariṣyati| tadyathāpi nāma sarvaśūra mṛtasya puruṣasya mātāpitarau śocanti paridevanti na ca śaknuvanti trātumevameva sarvaśūra bālapṛthagjanāḥ sattvā na śaknuvantyātmahitaṁ parahitaṁ vā kartuṁ nirāśā iva mātāpitara gatā iti| evameva sarvaśūra nirāśā bhavanti te sattvā maraṇakālasamaye|

<41> dvāvimau sarvaśūra sattvānāṁ nairāśyau maraṇakālasamaye| katamau dvau| yadutaikaḥ sattvaḥ pāpaṁ karma karoti kārāpayati vā| dvitīyaḥ sarvaśūra saddharmaṁ pratikṣipati| imau dvau sattvānāṁ nairāśyau maraṇakālasamaye|

<42> sarvaśūro bodhisattva āha - kā bhadanta bhagavaṁsteṣāṁ sattvānāṁ gatiḥ ko'bhisaṁparāyo bhavati|

bhagavānāha - anantā gatiḥ sarvaśūra saddharmapratikṣepakānāṁ sattvānāṁ ananto'bhisaṁparāyaḥ kalpameva te sarvaśūra raurave mahānarake duḥkhaṁ vedanāṁ vedayiṣyanti| kalpaṁ saṁghāte| kalpaṁ tapane kalpaṁ pratāpane| kalpaṁ kālasūtre mahānarake| kalpaṁ mahāvīcau mahānarake| kalpaṁ romaharṣe mahānarake| kalpaṁ hahe mahānarake| (kalpaṁ tapane mahānarake) imeṣvaṣṭasu mahānarakeṣu sarvaśūra aṣṭau kalpāḥ saddharmapratikṣepakaiḥ sattvairduḥkhamanubhavitavyam||

<43>atha khalu sarvaśūro bodhisattvo mahāsattvo bhagavantametadavocat - duḥkhaṁ bhagavan duḥkhaṁ sugata notsahāmi śrotuṁ|

atha khalu bhagavāṁstasyāṁ velāyāmimā gāthā abhāṣataḥ||

(1) yastvaṁ notsahase śrotumidaṁ vākyaṁ mahābhayam

narake yathaikāntaduḥkhe sattvā vindanti vedanāṁ

(2) yat karoti śubhaṁ karmaṁ sukhaṁ tasya bhaviṣyati|

yatkarotyaśubhaṁ karma duḥkhameva bhaviṣyati|

(3) jātasya maraṇaṁ duḥkhaṁ śokaṁ duḥkho'tha bandhanaṁ

nityaṁ duḥkhaṁ hi bālasya sukhaheto na vetti yaḥ

(4) paṇḍitānāṁ sukhaṁ yo vai smarate buddhamuttamam

prasannāśca mahāyāne na te yāsyanti durgatim

(5) evameva sarvaśūra pūrvakarma pracoditaṁ|

alpaṁ hi kṛyate karma anantaṁ bhujyate phalaṁ|

(6) bījamalpaṁ yathā vāpya prabhūtaṁ labhate phalaṁ

buddhakṣetra tu sukṣetre uptādbījādmahāphalaṁ

(7) paṇḍitānāṁ sukhaṁ bhavati ramante jinaśāsane|

vivarjayanti pāpāni kurvanti kuśalaṁ bahu;

(8) vālamātraṁ pradāsyanti ye dānaṁ mama śāsane|

aśītiḥ kalpasahasrāṇi mahābhogā mahādhanāḥ

(9) yatra yatropapadyante nityaṁ dānaṁ smaranti te|

evaṁ mahāphalā hyeṣā gaṁbhīrā buddhadakṣiṇāḥ||

<44> atha khalu sarvaśūro bodhisattvo mahāsattvo bhagavantametadavocat - kathaṁ bhagavan bhagavataḥ śāsane dharmo jñātavyaḥ kathaṁ bhagavan saṁghāṭaṁ sūtraṁ dharmaparyāyaṁ śrutvā kuśalamūlaṁ parigṛhītaṁ bhaviṣyati|

bhagavān āha - yaḥ sarvaśūra dvādaśagaṁgānadībālikāsamāṁstathāgatānarhataḥ samyaksaṁbuddhān sarvasukhopadhānairupatiṣṭheta| yaścemaṁ saṁghāṭasūtraṁ dharmaparyāyaṁ śṛṇuyādevameva tasya puṇyaskandho jñātavyaḥ|

<45> sarvaśūro bodhisattva āha - kathaṁ bhagavan kuśalamūlaparipūriḥ kartavyāḥ

evamukte bhagavān sarvaśūraṁ bodhisattvaṁ mahāsattvametadavocat - yat sarvaśūra kuśalamūlaṁ tat tathāgatasamaṁ jñātavyaṁ

sarvaśūra āha - katamacca bhagavan kuśalamūlaṁ tathāgatasamaṁ jñātavyaṁ|

bhagavān āha - dharmabhāṇakaḥ sarvaśūra tathāgatasamo jñātavyaḥ sarvaśūra āha - katamo bhagavan dharmabhāṇakaḥ bhagavān āha - yaḥ saṁghāṭaṁ sūtraṁ śrāvayati sa dharmabhāṇakaḥ

<46> sarvaśūro bodhisattva āha - ye bhagavan saṁghāṭasūtraṁ dharmaparyāyaṁ śroṣyanti| te īdṛśaṁ puṇyaskandhaṁ prasaviṣyanti| kaḥ punarvādo ye likhiṣyanti (svayaṁ vā likhiṣyanti) vācayiṣyanti| kiyantaṁ te bhagavan puṇyaskandhaṁ prasaviṣyanti|

bhagavān āha - śṛṇu sarvaśūra| tadyathā caturṣu dikṣvekaikasyān diśi dvādaśagaṁgānadībālikāsamāṁstathāgatān arhataḥ samyaksaṁbuddhā dvādaśagaṁgānadībālikāsamān kalpān avatiṣṭhanto dharmaṁ deśayeyurasya saṁghāṭasūtrasya dharmaparyāyasya puṇyaskandhaṁ varṇayeyurlekhayatastasya puṇyaskandhasya na śakyaṁ paryantamadhigantuṁ vācayā vā vyāhartuṁ| aṣṭācatvāriṅśadbhirapi gaṁgānādibālikāsamairbuddhairbhagavadbhirna śakyaṁ likhyamānasya yatpuṇyaskandhaṁ tadvyāhartuṁ kaḥ punarvādo ye vācayiṣyanti cintayiṣyanti vā ye vā dharmadhyānā bhaviṣyanti|

<47> sarvaśūro bodhisattva āha - kiyantaṁ bhagavan vācayamānāḥ puṇyaskandhaṁ prasaviṣyanti||

atha khalu bhagavāṁstasyāṁ velāyāmimā gāthā abhāṣatāḥ||

(10) catuṣpadāyāṁ gāthāyāṁ vācitāyāṁ tu yacchubhaṁ|

caturaśīti gaṁgāyā bālikā syuḥ samā jināḥ

(11) te vācitasyeha yatpuṇyaṁ kathayeyuraviṣṭhitāḥ

na ca kṣīyeta tatpuṇyaṁ yāvad vyākaraṇaṁ bhavet

(12) buddhānāṁ koṭayo'śītistiṣṭheyuḥ kalpatāttakān

mahāyānaguṇāḥ sarve varṇayeyurdaśo diśaḥ

(13) saṁghāṭasya ca yatpuṇyaṁ tat kṣayaṁ naiva ca vrajet

buddhānān durlabhā evamanantā dharmadeśanāḥ

<48> tena khalu punaḥ kālena tena samayena caturaśītirdevaputrakoṭiśatasahasrāṇi yena tathāgato yena ca saṁghāṭasūtraṁ dharmaparyāyanirdeśaṁ tenāṁñjalayaḥ praṇāmya bhagavantametadavocan - sādhu sādhu bhagavan yena bhagavatā īdṛśaṁ dharmanidhānaṁ jaṁbudvīpe sthāpitaṁ|

(49) anye cāṣṭādaśa koṭīsahasrāṇi nigranthānāṁ yena bhagavāmstenopasaṁkrāmanupasaṁkramya bhagavantamevamāhuḥ jaya bhoḥ śramaṇo gautama;

bhagavānāha - tathāgato nityameva jayati| bho nigranthatīrthikāḥ

kathaṁ yuṣmākaṁ tīrthikānāṁ jayaṁ

te'vocan jayatu jayatveva śramaṇo gautama;

bhagavānāha - nāhaṁ yuṣmākaṁ jayaṁ paśyāmi| āha ca -

(14) viparītā sthitā yūyaṁ bhaviṣyati jayaḥ kathaṁ

yūyaṁ śṛṇutha nigranthā vakṣyāmi bhavatāṁ hitaṁ

(15) bālabuddheḥ sukhaṁ nāsti kiṁ jayaṁ vo bhaviṣyati|

darśayiṣyāmyahaṁ mārgaṁ gaṁbhīraṁ buddhacakṣuṣāḥ||

<50> atha te nigranthā bhagavato'ntike kruddhā aprasādacittamutpādayāmāsuḥ tena khalu punaḥ kālena tena samayena śakro devānāmindro (tasyāṁ parṣadiḥ sannipatito bhūt sanniṣaṇṇaḥ sa tānanyatīrthikānigranthāṁ bhagavato'ntike kruddhānabhivīkṣya) vajraṁ parāhanat

<51> atha te'ṣṭādaśa koṭyo nigranthānāṁ bhītāstrastā mahātā duḥkhadaurmanasyenārtā asrukaṇṭhā paridevanti| tathāgataśca svakamātmānamantardhitaṁ darśayati sma|

atha te nigranthā asrumukhā rudanti tathāgataṁ apaśyantaśca gāthāṁ babhāṣire|

(16) nāsti kaścidiha trāṇāṁ na mātā na pitā tathā|

atavīmiha paśyāma śūnyāgārāṁ nirālayāṁ|

(17) udakaṁ caiva naivāsti na vṛkṣā na ca pakṣīṇāḥ

janaṁ cātra na paśyāma anāthā duḥkhavedanāṁ

(18) vedayāmo mahāghorāmapaśyantaśtathāgataṁ

(ko nu syāccharaṇaṁ nātho yena trāyena mahābhayāt||)

<52> tena khalu punaḥ kālena tena samayena te'ṣṭādaśa koṭyo nigranthānāṁ utthāyāyanebhyo jānudvayaṁ bhūmau nipātya śabdamudīrayanti ghoṣamanuśrāvayanti|

(19) tathāgataḥ kāruṇikaḥ saṁbuddhi dbipadottamaḥ

kuruṣva hitamasmākaṁ trāyasva kṛpaṇaṁ jagat

<53> atha bhagavān smitaṁ prāduṣkṛtvā sarvaśūraṁ bodhisattvaṁ mahāsattvamāmantrayati| gaccha sarvaśūra nigranthānāmanyatīrthikānān dharman deśaya|

evamukte sarvaśūro bodhisattvo mahāsattvo bhagavantametadavocat - nanu bhagavan kālaparvatāḥ sumeroḥ parvatarājasya śirasā praṇamanti| tiṣṭhati tathāgate'haṁ dharman deśayāmi|

bhagavān āha - alaṁ kulaputra bahu tathāgatānāmupāyakauśalyaṁ gaccha sarvaśūra vyavalokaya daśa diśi lokadhātūn paśya kva tathāgataṁ paśyasi| kutra vā tathāgatasyāsanaṁ prajñaptaṁ (paśyasi)| ahameva sarvaśūra svayaṁ nigranthānāṁ anyatīrthikānāṁ dharman deśayiṣyāmi|

<54> sarvaśūro bodhisattva āha - kasya bhadanta bhagavan ṛddhyānubhāvena gacchāmi| svaṛddhervā| atha vā tathāgatasya ṛddhyānubhāvena gacchāmi|

bhagavān āha - svakena sarvaśūra ṛddhibalādhiṣṭhānena gacchaḥ punareva sarvaśūra tathāgatasya ṛddhyānubhāvenāgacchaḥ

atha khalu sarvaśūro bodhisattvo mahāsattva utthāyāsanād bhagavantaṁ pradakṣiṇikṛtya tatraivāntardhitaḥ||

<55> atha khalu bhagavāṁsteṣāṁ anyatīrthikānāṁ dharman deśayati| jātirmārṣā duḥkhaṁ jātireva duḥkhaṁ jātasya sato bahūni bhayānyutpadyante| jātasya vyādhibhayamutpadyate vyādherjarābhayamutpadyate| jīrṇasya mṛtyubhayamutpadyate| ta āhuḥ katamad bhagavāñjātasya bhayaṁ

<56> bhagavān āha - jātaṁ jātamiti nāma| jātasya puruṣasya bahūni bhayāṇi jāyante rājabhayaṁ jāyate corabhayaṁ jāyate| agnibhayaṁ jāyate| viṣabhayaṁ jāyate| udakabhayaṁ jāyate| vāyubhayaṁ jāyate| āvartabhayaṁ jāyate| svakṛtānāṁ karmaṇāṁ bhayaṁ jāyate|

evaṁ bhagavatā jātinidānaṁ bahuprakāraṁ dharman deśayataḥ

<57> tena kālena tena samayena teṣāmanyatīrthikānāṁ nigranthānāṁ (śrutvā) mahāsantrāso bhavadevaṁ cāhuḥ na bhūyo vayaṁ bhagavannutsahāmahe jatiduḥkhamanubhavituṁ

<58> asmin khalu punaḥ saṁghāṭe dharmaparyāye bhagavatā bhāṣyamāṇe te'ṣṭādaśa koṭyo nigranthā anyatīrthikāḥ pariniṣpannā abhūvannanuttarasyāḥ samyaksaṁbodheḥ svakāye cāṣṭādaśa bodhisattvasahasrāḥ daśamahābhūmipratiṣṭhitāḥ|

sarve nānārdhivikurvitāni (svakāyamanekaprakāraṁ) sandarśayāmāsuḥ tadyathā aśvarūpaṁ| hastirūpaṁ| siṁharūpaṁ vyāghrarūpaṁ garuḍarūpaṁ sumerurūpaṁ nandikarūpaṁ kecid vṛkṣarūpaṁ| te sarve padmāsane paryaṁkena niṣīdanti|

nava koṭīsahasrāṇi bodhisattvānāṁ bhagavato dakṣiṇe pārśve niṣīdanti| nava koṭīsahasrāṇi (bodhisattvānāṁ) bhagavato vāme pārśve niṣīdanti| tathāgatastu nityasamāhitaḥ upāyakauśalyena sattvānāṁ dharman deśayan saṁdṛśyate|

<59> yāvat saptame rātṛdivasena tathāgataḥ pāṇitalaṁ prasārayati| jānāti ca bhagavān yaḥ sarvaśūro bodhisattvo mahāsattvastasyāḥ padmottarāyā lokadhātorihāgacchatīti|

yadā ca sarvaśūro bodhisattvo mahāsattvo gatastadā sapta rātrindivasaistāṁ padmottarāṁ lokadhātumanuprāptaḥ svaṛddhibalādhiṣṭhānena| yadā ca bhagavān bahuṁ prasārayati| tadā sarvaśūro bodhisattvo mahāsattvo bhagavataḥ purata sthitaḥ bhagavantaṁ saptakṛt pradakṣiṇīkṛtya bhagavato'ntike cittaṁ prasādayamāno yena tathāgatastenāṁjaliṁ praṇāmya bhagavantametadavocat -

<60> gato'smi bhagavan daśasu dikṣu sarvalokadhātuṣu dṛṣṭāni me bhagavan navānavati koṭīsahasrāṇi (lokadhātunāṁ| dṛṣṭāni ca me bhagavan navati koṭīsahasrāṇi) buddhakṣetrāṇāmekayā ṛddhyāḥ dvitīyayā ṛddhyā buddhānāṁ bhagavatāṁ koṭīśatasahasraṁ|

<61> yāvat saptame rātṛdivase tāṁ padmottarāṁ lokadhātumanuprāptaḥ atrāntaraṁ akṣobhyakoṭīsahasraṁ buddhakṣetrāṇāṁ dṛṣṭaṁ tato'haṁ teṣāṁ buddhānāṁ bhagavatāmṛddhiṁ paśyāmi| dvānavatiṣu buddhakṣetrakoṭīnayutaśatasahasreṣu tathāgatā dharman deśayanti| aśītiṣu koṭīśatasahasreṣu buddhakṣetreṣu tatraiva divase aśīti koṭīśatasahasrāṇi tathāgatānāmarhatāṁ samyaksaṁbuddhānāṁ loka utpannāni| sarvāṁśca tānahaṁ tathāgatān vanditvā punareva prakrāntaḥ

<62> tatraiva divase bhagavannekonacatvāriṁśatsu buddhakṣetrakoṭīsahasrāṇyatikramya sarveṣu ca teṣvekūnacatvāriṁśatsu buddhakṣetrakoṭīsahasreṣvekūnacatvāriṁśat koṭīsahasrāṇi bodhisattvānāṁ niṣkramya tatraiva divase'nuttarāṁ samyaksaṁbodhimabhisaṁbuddhāḥ vanditāśca me bhagavan te tathāgatā arhantaḥ samyaksaṁbuddhāstṛguptaṁ pradakṣiṇīkṛtya ṛddhyā cāntardhitaḥ

<63> ṣaṣṭikoṭiṣu bhagavan buddhakṣetreṣu buddhān bhagavataḥ paśyāmi| vanditāni ca me bhagavan tāni buddhakṣetrāṇi te ca buddhā bhagavantastataścāhaṁ prakrāntaṁ|

<64> anyeṣu ca bhagavan koṭīśateṣu buddhakṣetreṣu tathāgatāḥ parinirvāyamāṇān paśyāmi| vanditāśca me te tathāgatāstataścāhaṁ prakrāntaḥ|

<65> dṛṣṭaṁ ca me bhagavannapareṣu paṁcanavatikoṭiṣu buddhakṣetreṣu saddharmamantardhāyantaṁ| cittāyāso me bhagavaṁstatra jātaḥ asrūṇi ca pramuṁcāmi| anyāṁśca rodamānān bahūn devanāgayakṣarākṣasān kāmarūpinaśca mahatā śokaśalyasamarpitān paśyāmi| evamaparaṁ buddhakṣetraṁ niravaśeṣaṁ dagdhaṁ sasamudraṁ sasumeruṁ sapṛthivīpradeśaṁ tamapi bhagavan vanditvā nirāśībhūtaḥ

<66> prakrānto'smi yāvadahaṁ bhagavan tāṁ padmottarāṁ lokadhātumanuprāptaḥ tasyāṁ ca bhagavan padmottarāyāṁ lokadhātau paṁca koṭīśatasahasrāṇyāsanānāṁ prajñaptān paśyāmi| dakṣiṇasyān diśi koṭīśatasahasrāṇyāsanānāṁ prajñaptān paśyāmi| vāmena pārśvena koṭīśatasahasramāsanānāṁ prajñaptān paśyāmi| pūrvasyān diśi koṭīśatasahasramāsanānāṁ prajñaptān paśyāmi| paścimāyān diśi koṭīśatasahasramāsanānāṁ prajñaptān paśyāmi| ūrdhvāyāṁ diśi koṭīśatasahasramāsanānāṁ prajñaptān paśyāmi|

<67> sarvāṇi ca bhagavan tānyāsanāni saptaratnamayāni| sarveṣu ca teṣvāsaneṣu tathāgatā arhantaḥ samyaksaṁbuddhā niṣaṇṇā dharman deśayanti|

tatrāhaṁ bhagavannāścaryaprāptastāṁstathāgatān abhivandya paripṛcchāmi| kinnāmeyaṁ bhagavan lokadhātuḥ|

te tathāgatā āhuḥ padmottarā nāmeyaṁ kulaputra lokadhātuḥ

<68> tato'haṁ bhagavaṁstān pradakṣiṇīkṛtya punarapi tāṁstathāgatān paripṛcchāmi - kinnāma iha buddhakṣetre tathāgataḥ

te tathāgatā āhuḥ padmagarbho nāma kulaputra tathāgato'rhan samyaksaṁbuddho ya iha buddhakṣetre buddhakṛtyaṁ karoti|

tatastān ahametadavocat - bahūni tathāgatakoṭīniyutaśatasahasrāṇi dṛśyante| tanna jānāmi katama sa padmagarbho nāma tathāgato'rhan samyaksaṁbuddha iti|

te tathāgatā āhuḥ vayan te kulaputra taṁ padmagarbhaṁ tathāgataṁ darśayiṣyāma| yaḥ sa padmagarbho nāma tathāgato'rhan samyaksaṁbuddhaḥ

<69> atha tatkṣaṇādeva te sarve tathāgatakāyā antardhitāḥ sarve ca bodhisattvarūpāṇi sandṛśyante| ekameva tathāgataṁ paśyāmi| yathāhaṁ tasya tathāgatasya pādau śirasābhivandya purataḥ sthitaḥ āsanaṁ ca prādurbhūtaṁ| sa ca māṁ tathāgata evamāha| niṣīda kulaputrātra āsane|

<70> athāhaṁ tasminnāsane niṣaṇṇaḥ tadā ca bhagavannanekānyāsanāni prādurbhūtāni| na ca kaścit teṣvāsaneṣu niṣaṇṇaṁ paśyāmi| (tadahaṁ tathāgataṁ paripṛcchāmi| na bhagava eṣvāsaneṣu ekaṁ api sattvaṁ niṣaṇṇaṁ paśyāmi|)

sa bhagavān māmevamāha| nākṛtakuśalamūlāḥ kulaputra sattvā eṣvāsaneṣu śaknuvanti niṣattum

tamahaṁ taṁ tathāgatamidamavocat - kīdṛśaṁ bhagavan sattvāḥ kuśalamūlaṁ kṛtvā| eṣvāsaneṣu niṣīdanti|

sa maṁ bhagavannevamāha| śṛṇu kulaputra ye sattvāḥ saṁghāṭaṁ sūtraṁ dharmaparyāyaṁ śroṣyanti| te tena kuśalamūlena eṣvāsaneṣu niṣatsyante| kaḥ punarvādo ye likhiṣyanti vācayiṣyanti| tvayā sarvaśūra saṁghāṭaṁ dharmaparyāyaṁ śrutaṁ yastvamatrāsane niṣīdita| anyatra kastaveha buddhakṣetre'bhyaṁntarapraveśaṁ dadyāt

<71> evamukte tena bhagavatā ahaṁ taṁ bhagavantametadavocat - kiyantaṁ bhagavan sa sattvaḥ puṇyaskandhaṁ prasaviṣyati ya imaṁ saṁghāṭaṁ dharmaparyāyaṁ śroṣyati|

atha sa bhagavāṁ padmagarbhastathāgato'rhan samyaksaṁbuddhastasyāṁ velāyāṁ smitaṁ praduṣkārṣīt

tadahaṁ bhagavan smitakāraṇaṁ taṁ bhagavantaṁ paripṛṣṭavān ko bhagavan hetuḥ kiṁ kāraṇaṁ yat tathāgataḥ smitaṁ prāduṣkaroti|

<72> sa bhagavānāha| śṛṇu kulaputra sarvaśūraḥ (bodhisattvo mahāsattvo mahāsthāmaprāptaḥ) tadyathāpi nāma kulaputra kaścideva rājā bhaveccakravarttī caturdvīpeśvaraḥ sa caturṣu dvīpakṣetreṣu tile vāpayet tatkiṁ manyase sarvaśūra bahūni tasya bījānyutpadyeran sarvaśūra āha| bahūni bhagavan bahūni sugata|

<73> sa bhagavānāha| tataḥ sarvaśūra kaścit sattvo bhaved yastāni tilaphalakānyekarāśiṁ kuryādanyatarāḥ puruṣastatastilaphalarāśercaikaṁ tilaphalakaṁ gṛhya dvitīye pārśve sthāpayet tatkiṁ manyase sarvaśūra śaknuyāt sa sattvastāni tilaphalakāni gaṇayituṁ vopamāṁ kartum

sarvaśūro bodhisattva āha| no hīdaṁ bhagavan no hīdaṁ sugata; na śakyaṁ tāni tilaphalakāni gaṇayituṁ

<74> bhagavān āha - evameva sarvaśūrāsya saṁghāṭasya dharmaparyāyasya yatpuṇyaskandhaṁ tanna śakyamanupamyaṁ kartumanyatra tathāgatena| tadyathā sarvaśūra yāvantaste tilaphalakāstāvāntastathāgatā bhaveyuḥ te sarve'sya saṁghāṭasya dharmaparyāyasya śravaṇakuśalamūlapuṇyaṁ parikīrtayeyurna copamayāpi puṇyasya kṣayo bhavet kaḥ punarvādo yo likhiṣyati| vācayiṣyati|

<75> sarvaśūro bodhisattva āha| kiyantaṁ bhagavan likhataḥ puṇyaṁ bhavati ya iman dharmaparyāyaṁ likhayati|

bhagavān āha| śṛṇu kulaputra| tadyathāpi nāma kulaputra kaścideva puruṣo bhaved yastrisāhasramahāsāhasryāṁ lokadhātau tṛṇaṁ vā kāṣṭhaṁ vā taṁ sarvamaṁgulimātraṁcchindyāt

<76> dvitīyāmupamāṁ śṛṇu sarvaśūra; tadyathāpi nāma yāvantastrisāhasramahāsāhasryāṁ lokadhātau śilān vā prapātān vā mṛttikān vā paramāṇurajo vā te sarve rājānaścakravartino bhaveyuścaturdvīpeśvarāḥ saptaratnasamanvāgatāḥ tatkiṁ manyase sarvaśūra yasteṣāṁ tāvatāṁ rājñāṁ cakravartināṁ puṇyaskandhaṁ na śakyaṁ tasyopamāṁ kartuṁ sarvasattvairapi|

sarvaśūro bodhisattva āha| na śakyaṁ bhagavannanyatra tathāgatāt

<77> bhagavān āhaivameva sarvaśūra na śakyaṁ saṁghāṭasūtrasya dharmaparyāyasya likhyamānasya puṇyaskandhopamāṁ kartumyāvantasteṣāṁ rājñāṁ cakravartināṁ puṇyamato bahutaraṁ puṇyaṁ prasavati ya ito dharmaparyāyādekākṣaramapi likhitvā sthāpayedbahutaraṁ tasya puṇyaṁ vadāmi na tveva teṣāṁ rājñāṁ cakravartināṁ|

<78> evameva sarvaśūra bodhisattvasya mahāsattvasya mahāyānasaddharmadhārakasya pratipattisthitasya yatpuṇyaṁ tanna śakyaṁ rājabhiścakravartibhirabhibhavituṁ evamevāsya saṁghāṭasya dharmaparyāyasya lekhanādyatpuṇyaṁ tanna śakyamupamāṁ kartuṁ|

imaṁ sarvaśūra saṁghāṭaṁ sūtraṁ puṇyanidhānāni darśayati| sarvakleśānupaśamayati| sarvadharmolkāṁ jvālayati| sarvamārān pāpīmataḥ parājayati| sarvabodhisattvabhavanānyujvālayati| sarvadharmanirhārānabhinirharati|

<79> evamukte sarvaśūro bodhisattvo mahāsattvo bhagavantametadavocat - iha bhagavan brahmacaryaṁ paramaduṣkaracaryāḥ tatkasya hetoḥ durlabhā bhagavaṁstathāgatacaryāḥ evameva durlabhā brahmacaryāḥ yadā ca brahmacaryaṁ cariṣyati| tadā tathāgataṁ saṁmukhaṁ drakṣyati| rātṛndivaṁ ca tathāgatadarśanaṁ bhaviṣyati| yadā ca tathāgataṁ paśyati tadā pariśuddhaṁ buddhakṣetraṁ paśyati| yadā pariśuddhaṁ buddhakṣetraṁ paśyati| tadā sarvadharmanidhānāni paśyati| yadā sarvadharmanidhānāni paśyati| tadāsya maraṇakālasamaye trāsaṁ notpadyate na sa jātu mātuḥ kukṣāvupapatsyate| na tasya jātu śoko bhaviṣyati| na ca tṛṣṇāpāśena baddho bhaviṣyati|

<80> evamukte bhagavān sarvaśūraṁ bodhisattvaṁ mahāsattvametadavocat - tatkiṁ manyase sarvaśūra nanu durlabhastathāgatānamutpādaḥ

āha| durlabho bhagavan durlabhaḥ sugata;

bhagavān āha| evameva sarvaśūra durlabho yaṁ saṁghāto dharmaparyāyaḥ

yeṣāṁ khalu punaḥ sarvaśūrāyaṁ saṁghāṭo dharmaparyāyaḥ śrotrāvabhāsamāgamiṣyati| so'śītiḥ kalpāṁ jātyā jātismaro bhaviṣyati| ṣaṣṭi kalpasahasrāṇi cakravartirājyaṁ pratilapsyate| aṣṭau kalpasahasrāṇi śakratvaṁ pratilapsyate| paṁcaviṁśatiḥ kalpasahasrāṇi śuddhāvāsakāyikānān devānāṁ sahabhāvyatāyāṁ upapatsyate| aṣṭātṛṁśat kalpasahasrāṇi mahābrahmā bhaviṣyati|

<81> navānavatiḥ kalpasahasrāṇi vinipātaṁ na gamiṣyati| kalpaśatasahasraṁ preteṣu nopapatsyate| aṣṭāviṁśati kalpasahasrāṇi tiryakṣurnopapatsyate|

trayodaśa kalpasahasrāṇyasurakāyikeṣu nopapatsyate| na śastreṇa kālaṁ kariṣyati (na viṣeṇa nāgninā na cāsya paropakramabhayaṁ bhaviṣyati)|

<82> paṁcaviṁśatiḥ kalpasahasrāṇi na duṣprajño bhaviṣyati| sapta kalpasahasrāṇi prajñācarito bhaviṣyati| nava kalpasahasrāṇi prāsādiko bhaviṣyati| darśanīyaḥ yathā tathāgatasyārhataḥ samyaksaṁbuddhasya rūpakāyapariniṣpattistathā tasya bhaviṣyati|

paṁcadaśa kalpasahasrāṇi na strībhāveṣūpapatsyate| ṣoḍaśa kalpasahasrāṇi vyādhiḥ kāye nākramiṣyati| paṁcatṛṁśatkalpasahasrāṇi divyacakṣurbhaviṣyati|

[83] ekonaviṁśat kalpasahasrāṇi nāgayoniṣu nopapatsyate| ṣaṭ kalpasahasrāṇi na krodhābhibhūto bhaviṣyati| sapta kalpasahasrāṇi daridrakuleṣu nopapatsyate| aśītiḥ kalpasahasrāṇi dvau dvīpau paribhuṁkte| yadā daridro bhavati tadā īdṛśaṁ sukhaṁ pratilapsyate| dvādaśa kalpasahasrāṇi andhayoniṣu nopapatsyate| trayodaśa kalpasahasrāṇi apāyeṣu nopapatsyate| ekādaśa kalpasahasrāṇi kṣāntivādī bhaviṣyati| maraṇakālasamaye carimavijñānanirodhe vartamāne na viparītasaṁjñī bhaviṣyati| na ca krodhābhibhūto bhaviṣyati|

[84] sa pūrvasyān diśi dvādaśa gaṁgānadībālikāsamān buddhān bhagavataḥ saṁmukhan drakṣyati| dakṣiṇasyāṁ diśi viṁśatirbuddhakoṭī saṁmukhan drakṣyati| paścimasyān diśi paṁcaviṁśatirgaṁgānadībālikāsamān buddhān bhagavataḥ saṁmukhaṁ drakṣyati| uttarasyān diśi viṁśatirgaṁgānadībālukāsamān buddhāṁ bhagavataḥ saṁmukhaṁ drakṣyati| urdhvāyāṁ diśi navati koṭīsahasrāṇi buddhānāṁ bhagavatāṁ saṁmukhaṁ drakṣyati| adhastāddiśi koṭīśataṁ gaṁgānadībālukāsamān buddhān bhagavataḥ saṁmukhan drakṣyati|

[85] te ca sarve tathāgatāstaṁ kulaputramāśvāsayanti| mā bhaiḥ kulaputra tvayā saṁghāṭaṁ (sūtran) dharmaparyāyaṁ śrutvā iyantaḥ sāṁparāyikāni guṇānuśaṁsamukhāni ca bhaviṣyanti|

paśyasi tvaṁ bhoḥ kulaputremānyanekāni gaṁgānadībālikāsamāni tathāgatakoṭīniyutaśatasahasrāṇi|

āha| paśyāmi bhagavan paśyāmi sugata|

(bhagavān) āha| ete bhoḥ kulaputra tathāgatāstava sakāśamupasaṁkrāntā darśanāya|

āha| kiṁ mayā kuśalakarma kṛtaṁ yeneme bahavastathāgatā āgatā|

[86] āha| śṛṇu kulaputra tvayā mānuṣyakamātmabhāvaṁ pratilabhya saṁghāṭaṁ dharmaparyāyaṁ śrotrāvabhāsamāgataṁ| tena tvayā etāvat puṇyaskandhaṁ prasūtaṁ|

(sarvaśūra) āha| yadi mama bhagavanna etāvān puṇyaskandhaḥ kaḥ punarvādo yaḥ sakalasamāptaṁ śroṣyati|

[87] (bhagavān) āhālaṁ bhoḥ kulaputra śṛṇu catuṣpadikāyā gāthāyā (śrutāyāḥ) puṇyaṁ varṇayāmi| tadyathā kulaputra trayodaśa gaṁgānadībālikāsamānāṁ tathāgatānāṁ arhatāṁ samyaksaṁbuddhānāṁ yaḥ puṇyasakandhastato bahutaraṁ puṇyaskandhaṁ prasavati| yaścatuṣpadikāmapi gāthāmito dharmaparyāyācchroṣyati|

yaśca trayodaśa gaṁgānadībālukāsamāṁstathāgatānarhataḥ samyaksaṁbuddhān pūjayati| yaścetaḥ saṁghāṭāddharmaparyāyādantaśaścatuṣpādikāmapi gāthāṁ śroṣyati| ayaṁ tato bahutaraṁ puṇyaskandhaṁ prasaviṣyati| kaḥ punarvādo yaḥ sakalasamāptaṁ śroṣyati| na tasya puṇyaskandhasya śakyamupamāṁ kartum

[88] śṛṇu kulaputra yaścemaṁ saṁghāṭaṁ (nāma) sūtraṁ dharmaparyāyaṁ sakalasamāptaṁ vistareṇa śroṣyati| yaśca sarvasyāṁ tṛsāhasramahāsāhasryāṁ lokadhātau tilaṁ vāpayedyāvantaste tilaphalakāstāvanto rājānaścakravartino bhaveyuratha kaścideva puruṣo bhavedāḍhyo mahādhano mahābhogaḥ

atha khalu sa puruṣasteṣāṁ sarveṣāṁ rājñāṁ cakravartināṁ yathākāmikaṁ dānan dadyāt tatkiṁ manyase sarvaśūrāpi tu sa puruṣastatonidānaṁ bahu puṇyaṁ prasaved

āha| bahu bhagavan bahu sugata;

bhagavān āha - yāvantaḥ kulaputra teṣāṁ rājñāṁ cakravartināṁ dānan dadataḥ puṇyaskandhaḥ yaścaikasya srotaāpannasya dānan dadyādayaṁ tato bahutaraṁ puṇyaskandhaṁ prasavati|

[89] ye trisāhasramahāsāhasryāṁ lokadhātau sattvāste sarve srotaāpanā bhaveyusteṣāṁ sarverṣāṁ dānan dadato yatpuṇyaskandhaṁ ayaṁ tato bahutaraṁ puṇyaskandhaṁ prasavati| ya ekasya sakṛdāgāmino dānan dadyād

ye trisāhasramahāsāhasryām lokadhātau sattvāste sarve sakṛdāgāmino bhaveyuḥ teṣāṁ sarveṣāṁ dānan dadato yaḥ puṇyaskandhaḥ ayan tato bahutaraṁ puṇyaskandhaṁ prasavati| ya ekasyānāgāmino dānān dadyād

ye trisāhasramahāsāhasryāṁ lokadhātau sattvāste sarve nāgāmino bhaveyuḥ teṣāṁ sarveṣāṁ dānan dadato yaḥ puṇyaskandhaṁ ayaṁ tato bahutaraṁ puṇyaskandhaṁ prasavati ya ekasyārhato dānan dadyād

ye trisāhasramahāsāhasryāṁ lokadhātau sattvāste sarve'rhanto bhaveyuḥ teṣāṁ sarveṣāṁ dānan dadato yaḥ puṇyaskandhaḥ ayaṁ tato bahutaraṁ puṇyaskandhaṁ prasavati| ya ekasya pratyekabuddhasya dānan dadyād

ye trisāhasramahāsāhasryāṁ lokadhātau sattvāste sarve pratyekabuddhā bhaveyusteṣān sarveṣāṁ dānan dadato yaḥ puṇyaskandhaḥ ayaṁ tato bahutaraṁ puṇyaskandhaṁ prasavati ya ekasya bodhisattvasya dānan dadyād

ye trisāhasramahāsāhasryāṁ lokadhātau sattvāste sarve bodhisattvā bhaveyusteṣāṁ sarveṣāṁ dānan dadato yaḥ puṇyaskandhaḥ ayaṁ tato bahutaraṁ puṇyaskandhaṁ prasavati| ya ekasya tathāgatasya cittaṁ prasādayed

[90] yaśca trisāhasramahāsāhasryāṁ lokadhātau tathāgataparipūrṇāyāṁ cittaṁ prasādayed yaścemaṁ saṁghāṭasūtraṁ dharmaparyāyaṁ likhiṣyati| kimaṁga punaḥ sarvaśūra ya iman dharmaparyāyaṁ śroṣyati| śrutvā ca dhārayiṣyati vācayiṣyati paryavāpsyati parebhyaśca vistareṇa

saṁprakāśayiṣyati| kaḥ punarvādaḥ sarvaśūra ya imaṁ saṁghāṭasūtraṁ dharmaparyāyaṁ cittaprasādena namaskariṣyati|

[91] tatkiṁ manyase sarvaśūra śakyamidaṁ sūtraṁ bālapṛthagjanaiḥ śrotuṁ

āha| no hīdaṁ bhagavan

āha| ye ca śroṣyanti na ca prasādamutpādayiṣyanti| śṛṇu sarvaśūra santi kecit sarvaśūra bālapṛthagjanāḥ sattvāḥ ye śaknuyurmahāsamudre gādhaṁ labdhum

āha| no hīdaṁ bhagavan

[92] (bhagavān) āha| asti punaḥ sarvaśūra kaścit sattvo ya ekapāṇitalena samudraṁ kṣapayed

āha| no hīdaṁ bhagavan no hīdaṁ sugata|

bhagavān āha| yathā sarvaśūra nāsti sa kaścit sattvo yaḥ śaknuyādekapāṇitalena| mahāsamudraṁ śoṣayituṁ| evameva sarvaśūra ye hīnādhimuktikāḥ sattvāḥ na śakyaṁ tairayan dharmaparyāyaḥ śrotuṁ yaiḥ sarvaśūrāśītirgaṁgānadībālukāsamāni tathāgatakoṭīniyutaśatasahasrāṇi na dṛṣṭāni| na taiḥ śakyamayaṁ saṁghāṭaṁ dharmaparyāyaṁ likhituṁ| yairnavati gaṁgānadībālikāsamāni tathāgatāni na dṛṣṭāni na taiḥ śakyamayan dharmaparyāyaḥ śrotum

[93] yena tathāgatakoṭīśatasahasrāṇi na dṛṣṭāni ta iman dharmaparyāyaṁ śrutvā pratikṣipanti| yaiḥ sarvaśūra gaṁgānadībālukāsamāni tathāgatakoṭīśatāni dṛṣṭāni ta iman dharmaparyāyaṁ śrutvā prasādacittamutpādayanti harṣayanti yathābhūtaṁ prajānanti| ya imaṁ saṁghāṭaṁ dharmaparyāyaṁ yathābhūtaṁ śaddadhanti na pratikṣipanti|

[94] śṛṇu sarvaśūra ye kecid asmāt saṁghāṭāddharmaparyāyadekākṣarāmapi catuṣpadikāṁ gāthāṁ likhiṣyanti teṣāṁ sarvaśūra sattvānāṁ tataḥ paścāt paṁcanavati koṭīsahasrāni lokadhātunāmatikramya yathā sukhāvatīlokadhātustathā teṣāṁ buddhakṣetraṁ bhaviṣyati| teṣāṁ ca sarvaśūra sattvānāṁ caturaśītiḥ kalpasahasrāṇyāyuṣpramāṇaṁ bhaviṣyati|

[95] śṛṇu sarvaśūra ye bodhisattvā mahāsattvā asmāt saṁghāṭāddharmaparyāyādantaśaścatuṣpadikāmapi gāthāṁ śroṣyanti|

badyathā sarvaśūra kaścit sattvo bhaved (raudraḥ sāhasikaḥ saddharmavimukhaḥ paralokanirapekṣaḥ pāpakārī) yaḥ paṁcānantaryāṇi karmāṇi kuryāt kārayed vā kriyamāṇāni vānumodet sacet sa itaḥ saṁghāṭāddharmaparyāyaccatuṣpadikamapi gāthāṁ śṛṇuyāt tasya tāni paṁcānantaryāṇi karmāṇi parikṣayaṁ gaccheyuḥ

[96] śṛṇu sarvaśūra| punaraparaṁ guṇamāmantrayāmi| tadyathāpi kaścit sattvo bhavedyaḥ stūpabhedaṁ kārayet saṁghabhedaṁ ca| bodhisattvaṁ samādheruccālayet buddhajñānasyāntarāyaṁ kuryāt mātāpitaraṁ jīvitādvyāvaropayed

atha sa sattvaḥ paścādvipratisārībhūtaḥ śoceta parideveta naṣṭo'ham anena kāyena naṣṭaṁ me paralokamiti| kalpaṁ evāhaṁ naṣṭaḥ tato'sya mahācittāyāsaṁ bhaveta duḥkhāṁ vedanāṁ vedayeta| kaṭukāṁ vedanāṁ vedayeta|

tasya sarvaśūra sattvasya sarvasattvāḥ parivarjayanti jugupsanti (ca)| dagdho naṣṭa eṣā sattva laukikalokottarāddharma naṣṭo'nekāni kalpāni yathā dagdhasthūṇaṁ|

[97] evamevāyaṁ puruṣaḥ yathā sucitraṁ gṛhaṁ dagdhasthūṇaṁ na śobhate| evamevāyaṁ sa puruṣa iha loke na śobhate| yatra yatra ca gacchati tatra tatra sattvaiḥ paribhāṣyate praharanti ca; kṣutpipāsārdito'pi na kiṁcillabhate| tato duḥkhāṁ vedanāṁ vedayati|

[98] sa kṣutpipāsāhetunā paribhāṣāhetunā prahārahetunā stūpabhedaṁ ca paṁcānantaryāṇi ca karmāṇi samanusmarati| sa tato duḥkhaṁ nirvedacittamutpādayati| kutrāhaṁ yāsyāmi ko me trāta bhavisyati|

[99] sa evaṁ cintayati gamiṣyāmyahaṁ parvatagirikandareṣu praviśāmi tatra me kālakriyā bhaviṣyati na ca me iha kaści trātāsti|

āha ca||

(20) kṛtaṁ me pāpakaṁ karma dagdhasthūnaṁ nirantaram

nemaṁ loke śobhayiṣye na śobhayiṣyāmi paratra caḥ

(21) antargṛhe na śobhāmi na śobhāmi ca bāhira|

(sarvatraiva na śobhāmi pāpakārī tathāsmyahaṁ||)

(22) doṣahetoḥ kṛtaṁ pāpaṁ tena yāsyāmi durgatim

paratra duḥkhitaḥ kutra vasiṣyāmi ha durgatau|

(23) śṛṇvanti devatā vācā aśrukaṇṭhaṁ prarodati|

aho nirāśakṣ paralokaṁ prayāsyāmiḥ durgatiṁ||

taṁ devatā āhuḥ

(24) mūḍho'si gaccha puruṣa maivaṁ cintaya duḥkhitaḥ

śaraṇaṁ na ca me trāṇaṁ duḥkhāṁ vindāmi vedanām

(25) mātṛghāṭaṁ pitṛghāṭaṁ paṁcānantaryāñca me kṛtaṁ

parvate mūrdhni gacchāmi tata ātmā tyajāmyaham

(26) mā gaccha mūḍhapuruṣa karma mā kuru pāpakaṁ|

bahu tvayā kṛtaṁ pāpaṁ vyāpannena hi cetasā;

(27) kurvanti ye ātmaghātaṁ narakaṁ yānti duḥkhitāḥ

tataḥ patanti bhūmīṣu krandanti śokavedanāḥ

(28) na tena vīryeṇa bhavanti buddhā

bhavanti naivāpi

na śrāvakaṁ labhyati mokṣayānam

anyasya vīryasya kuruṣva yatham

(29) gacchasya taṁ paravata yena so ṛṣi

gatvā ca taṁ dṛṣṭva ṛṣirmahātmā|

vanditvā pādau śirasā ca tasya

trāṇaṁ bhavāhī mama agrasattva;

(30) deśehi dharmaṁ kuśalaṁ muhūrttam

bhāto'smi trasto ati [[rivā]] duḥkhapīḍitaḥ

(tato gataḥ sa puruṣu bhītabhītas)

(taṁ parvataṁ yatra riśirmahātmā|)

(31) (vanditvā pādau hi tadā mahārṣeḥ)

(provāca vākyaṁ samudīraṁ yā gīrā|)

(deśehi dharmaṁ mama pāpakāriṇaḥ)

(kṛpāṁ janitvā paraduḥkhitasya||)

(32) ṛṣirvadantaṁ śṛṇu sattvasāra

niṣadya cintasya kṣaṇaṁ kuruṣva|

(śṛṇuṣva vākyaṁ mama duḥkhitasya)

(śrutvā hyupāyaṁ paricintayasva|)

(33) bhītaḥ sa trasto ati [[rivā]] duḥkhapīḍitas

tato niṣaṇṇaḥ kṣaṇa [[vara]] taṁ muhūrtam

deśemi pāpaṁ kṛta yan mayā bahū

ṛṣe hi vācaṁ idamabravīti|

ṛṣirāha|

(34) bhuṁśāhi taṁ bhojanu yaddadāmi

duḥkhena ca krandasi śokapīḍitaḥ

kṣudhā pipāsāya ca pīḍītastvaṁ

nirāśakaśca tribhavādbhaviṣyasi|

(35) bhojanānyupanāmitvā ṛṣiḥ sattva prasādayan

mṛṣṭaṁ bhuṁja manāpaṁ ca śarīre tarpanārthikaṁ|

(36) paścāt te dharma bhāṣāmi sarvapāpakṣayaṁkaram

tasya tadbhojanaṁ mṛṣṭaṁ muhūrtaṁ bhuktavān asau|

(37) bhuktvā hastau ca prakṣālya kṛtvā pradakṣiṇaṁ ṛṣiṁ|

paryaṁkena niṣīditvā vadat yat pāpakaṁ kṛtam

(38) mātṛghātaṁ pitṛghātaṁ stūpabhedaṁ mayā kṛtaṁ|

bodhisattvasya buddhatve antarāyaṁ kṛtaṁ mayā|

(39) tasya tadvacanaṁ śrutvā ṛṣirvākyamathābravīt

asādhustava [[bho]] puruṣa yat kṛtaṁ pāpakaṁ tvayā|

(40) deśehi pāpakaṁ karma kṛtaṁ kārāpitaṁ ca yat||

atha khalu tasmin kāle sa puruṣaḥ śokaśalyasamarpita bhītastrasta udvigna ko me trātā bhaviṣyatītyāha ca||

(41) kṛtaṁ me pāpakaṁ karma duḥkhāṁ vetsyāmi vedanāṁ|

narake raurave ghore tathaiva ca pratāpane||

atha khalu sa puruṣastasya ṛṣerjānudvayaṁ bhūmau nipātyāha ca|

(42) deśeyaṁ pāpakaṁ karma yatkṛtaṁ kāritaṁ mayā|

māphalaṁ pāpakaṁ bhotu mā me syā duḥkhavedanāṁ|

(43) ṛṣistrāṇaṁ bhaven mahyamāsanne haṁ bhaven tava;

niṣkaukṛtyasya śāntasya śamyantaṁ pāpakān mama;

[100] atha khalu sa riṣistena kālena tena samayena taṁ puruṣametadavocat - evaṁ cāśvāsayati| mā bhaiḥ kulaputrāhaṁ te trāṇaṁ bhaviṣyāmyahan te gatirahaṁ parāyaṇaṁ bhaviṣyāmi| saṁmukhaṁ dharma śṛṇu śrutaṁ tvayā kiṁcit saṁghāṭaṁ nāma dharmaparyāyaṁ|

sa āha| na me kadācicchrutaṁ|

ṛṣirāha - ko'gnidagdhasya sattvasya dharman deśayatyanyatra yaḥ karuṇāvihāritayā sattvānāṁ dharman deśayati| āha| śṛṇu kulaputra

[101] bhūtapūrvaṁ (mayā) asaṁkhyeyaiḥ kalpairasaṁkhyeyatarairyadāsītteno kālena tena samayena vimalacandro nāma rājābhūddhārmiko dharmarājā| tasya khalu punaḥ kulaputra rājño vimalacandrasya gṛhe putro jātaḥ

[102] atha sa rājā vimalacandro lakṣaṇanaimittikāṁcchāstrapāṭhakān brāhmaṇān sannipātya kumāramupadarśyaivamāha -

kiṁ brāhmaṇa kumārasya nimittaṁ paśyatha śobhanamaśobhanaṁ veti|

tatraiko naimittiko brāhmaṇaḥ kathayatyasādhurayaṁ mahārāja kumāro jātaḥ āsādhuriti|

rājā śrutvā sasaṁbhrama papraccha| kimidaṁ brāhmaṇā

naimittikaḥ kathayatyayaṁ deva rājakumāro yadi sapta varṣāṇi jīvati sa eṣa mātāpitaraṁ jīvitādvyāvaropayiṣyati|

tato'sa rājā evamāha| varaṁ me jīvitāntarāyo bhavatu māccāhaṁ putraṁ vadheyaṁ| tatkasmāt kadācit karhacilloke manuṣyotpādaṁ labhyate| nāhaṁ tathā kariṣyāmi| yadimaṁ mānuṣyakaṁ kāyaṁ virāgayiṣyāmi|

[103] atha sa kumāro vardhate yadanya varṣadvayena vardhante tadāsāvekena māsena vardhate| jānāti ca sa rājā vimalacandro yaṁ kumāro mama karmopacayena vardhate| tato rājā tasya kumārasya paṭṭamābandhyaivamāha| tava rājyaṁ bhavatu vipulaṁ ca kīrtirājyabhogaiśvaryaṁ ca kāraya dharmeṇa mā adharmeṇa| tatastasya rājā paṭṭaṁ badhvā rājeti nāmadheyamakarot sa ca rājā vimalacandro na bhūyaḥ svaviṣaye rājyaṁ kārayaty

[104] atha te triṁśadamātyakoṭyo yena sa rājā vimalacandrastenopasaṁkrāntā upetya taṁ rājānaṁ vimalacandramevamāhuḥ kasmāt tvaṁ bhoḥ mahārāja svaviṣaye na bhūyo rājyaṁ kārayasi|

rājāha - bahūnyasaṁkhyeyāni kalpāni| yanmayā rājyabhogaiśvaryādhipatyaṁ kāritaṁ na ca me kadācid viṣayeṣu tṛptirāsīttena ca kālena tena samayena na cireṇa kālāntareṇa sa putrastaṁ mātāpitaraṁ jīvitādvyāvaropayati| tena ca tatra paṁcānantaryāṇi karmānyupacitāni|

ahaṁ ca bhoḥ puruṣa tāvacciraṁ kālasamayamanusmarāmi| yathādya śvo vā|

[105] yadā tasya rājño duḥkhā vedanā utpannāḥ tadā sa rājā vipratisārībhūto srukaṇṭhaḥ paridevati pāpaṁ me karma kṛtamiti| avīcau mahānarake duḥkhāṁ vedanāṁ pratyanubhaviṣyāmīti

tato'haṁ kāruṇyacittamutpādya tatra gatvā tasya rājño dharman deśayitavān

atha sa rāja taṁ dharmaṁ śrutvā tasya tāni paṁcānantaryāṇi karmāṇi kṣipraṁ niravaśeṣaṁ parikṣayaṁ gatāni|

āha ca|

(44) saṁghāṭaṁ dharmaparyāyaṁ sūtrarājaṁ mahātapāḥ

ye śroṣyanti iman dharman padaṁ prāpsyantyanuttaram

(45) sarvapāpakṣayaṁ bhavati| sarvakleśāṁcchamiṣyati|

śṛṇu dharmaṁ pravakṣyāmi yena kṣipraṁ vimokṣase|

(46) catuṣpadāyāṁ gāthāyāṁ bhāṣyamāṇaṁ nirantaraṁ

sarvapāpakṣayaṁ kṛtvā srotāpanno bhaviṣyasi|

(47) tato dānaṁ udānemi sarvapāpapramocanaṁ|

vimocitā duḥkhitā sattvā nārakādbhayabhairavāt

(48) tataḥ sa puruṣotthāya āsanādañjalīkṛtaḥ

praṇamya śirasā tasya sādhukāraṁ prayacchati|

(49) sādhu kalyāṇamitrāṇāṁ sādhu pāpavināśakaḥ

sādhu saṁghāṭanirdeśaṁ ye śroṣyanti mahānayaṁ||

[106] atha khalu tena kālena tena samayenoparyantarikṣe sthitāni dvādaśa devaputrasahasrāṇi kṛtāṁjalipuṭāni tam ṛṣimupagamya pādau śirasā praṇamyaivamāhuḥ bhagavan kevacciraṁ smarasi mahātapaḥ evaṁ catvāri koṭī nāgarājñāmāgatya aṣṭādaśa koṭīsahasrāṇi yakṣarājñāmāgatya yena sa ṛṣistenāṁjaliṁ praṇāmyaivamāhuḥ kevacciraṁ smarasi|

[107] mahātmā ṛṣirāha| śatamasaṁkhyeyakalpakoṭīniyutasahasrāṇi samanusmarāmi|

āha| kena kuśalakarmaṇā| muhūrtamātreṇaivaṁ pāpaṁ karma (sarvapāpakarma) praśāntam

(āha| saṁghāṭaṁ dharmaparyāyaṁ śrutvā) (anena kuśalakarmaṇā sarvapāpakarma praśāntam)

[108] ye ca tatra sattvāḥ sannipatitāḥ yairimaṁ dharmaparyāyaṁ śrutvā śraddadhānatā vā kṛtā pattīyanaṁ vā| te sarve vyākriyante'nuttarāyāṁ samyaksaṁbodhau| yena ca puruṣeṇa tāṇi paṁcānantaryāṇi karmāṇi kṛtāni| tenemaṁ saṁghāṭaṁ dharmaparyāyaṁ śrutvā muhūrtamātreṇa tāni paṁcānantaryāṇi karmāṇi niravaśeṣaṁ parikṣayaṁ paryādānaṁ kṛtāṇi| tasyānekāni kalpakoṭīniyutaśatasahasrāṇi sarvadurgatidvārāṇi pithitāni bhavanti| dvātriṁśaddevalokadvārāṇyapāvṛtāni bhavanti| ya itaḥ saṁghāṭāddharmaparyāyādantaśaścatuṣpadikāmapi gāthāṁ śroṣyati| tasyetādṛśāni kuśalamūlāni bhaviṣyanti| kaḥ punarvādo yaḥ saṁghāṭasūtraṁ satkariṣyati gurukariṣyati mānayiṣyati pūjayiṣyati| puṣpadhūpagandhamālyavilepanacūrṇacīvaracchatradhvajapatākābhirvādyāṁjalikarmapraṇāmaṁ vā kariṣyati| ekāṁ vārāṁ anumodiṣyatyevaṁ ca vakṣyati| sādhu subhāṣitamiti|

[109] atha khalu sarvaśūro bodhisattvo mahāsattvo bhagavantametadavocat - kiyantaṁ bhagavannañjalipraṇāmāt puṇyaskandhaṁ prasavati| ye te saṁghāṭaṁ dharmaparyāyaṁ bhāṣyamāṇaṁ śrutvāñjaliṁ kṛtvā praṇamanti|

bhagavān āha - śṛṇu kulaputra yena paṁcānantaryāṇi karmāṇi kṛtāṇi kāritāni kriyamāṇāni vānumoditāni bhaveyuḥ yadi sa itat saṁghāṭāddharmaparyāyādantaśaścatuṣpadikāmapi gāthāṁ śrutvāñjaliṁ praṇāmayiṣyati| tasya (tāni) sarvāṇi paṁcānantaryāṇi karmāṇi kṣayaṁ gatāni bhaviṣyanti| kaḥ punarvādaḥ sarvaśūra yaḥ sakalasamāptamevāyaṁ dharmaparyāyaṁ śroṣyatyayaṁ tato bahutaraṁ puṇyaskandhaṁ prasaviṣyati|

[110] upamāṁ te kulaputra kariṣyāmi| asya saṁghāṭasūtrārthasya vijñaptaye| tadyathāpi nāma sarvaśūrānavataptasya nāgarājasya bhavane na kadācit sūryo vabhāsayati| tataśca paṁca mahānadyaḥ pravahanti|

atha kaścideva puruṣo bhaved yastāsāṁ paṁcānāṁ mahānadīnāmudakasya bindūni gaṇayet tatkiṁ manyase sarvaśūra śakyaṁ teṣāmudakavindunāṁ gaṇanāyogena paryantamadhigantum

āha| no hīdaṁ bhagavan no hīdaṁ sugata,

bhagavān āha - evameva sarvaśūra na śakyaṁ saṁghāṭasūtrasya dharmaparyāyasya kuśalamūlaṁ kalpena vā kalpaśatena vā kalpasahasreṇa vā kalpaśatasahasreṇa vā kalpakoṭīniyutaśatasahasreṇa vā gaṇanayā paryantamadhigantuṁ|

[111] tatkiṁ manyase sarvaśūra duṣkaraṁ tasya ya imaṁ saṁghāṭaṁ dharmaparyāyaṁ muhūrtaṁ prakāśayeta|

āha - duṣkaraṁ bhagavaṁ duṣkaraṁ sugata,

bhagavān āha - ataḥ suduṣkarataraṁ sarvaśūra tasya ya imaṁ saṁghāṭaṁ dharmaparyāyaṁ śākṣyati śrotum

[112] tadyathā anavataptāt (mahāsarasaḥ) paṁca mahānadyaḥ pravahanti| tāsāṁ paṁcānāṁ mahānadīnāṁ pravahatāmudakavindūnna śakyaṁ kenacidgaṇakena vā gaṇakamahāmātrena vā gaṇanayā paryantamadhigantumevamevāsya dharmaparyāyasya puṇyaskandhasya na śakyaṁ paryantamadhigantum

sarvaśūra āha - katamāstā bhagavan paṁca mahānadya|

bhagavān āha - tadyathā| gaṁgā sītā vakṣuḥ yamunāścandrabhāgā ca| imā sarvaśūra paṁca mahānadyo mahāsamudre praviśanti| ekaikā ca mahānadī paṁcamahānadīśataparivārāḥ||

[113] punaraparaṁ sarvaśūra paṁcemā mahānadyaḥ ākāśe pravahanti| yā satatasamitamudakavindubhiḥ prajāṁ plāvayanti| tāśca paṁca mahānadyaḥ ekaikā sahasraparivārāḥ

āha - katamāstā bhagavan paṁca mahānadyaḥ sahasrāparivārāḥ yā ākāśe pravahanti|

bhagavān āha - sundarī nāma (nadī) sahasraparivārā, śaṁkhā nāma (nadī) sahasraparivārā, vahantī nāma (nadī) sahasraparivārā, citrasenā nāma (nadī) sahasraparivārā, dharmavṛttā nāma (nadī) sahasraparivārā, imāstā sarvaśūra paṁca mahanadyaḥ sahasraparivārā yā jaṁbūdvīpe autsukyamāpadyante|

yāḥ kālena kālaṁ jaṁbūdvīpe bindubhirvarṣadhārāḥ pramuṁcanti|

tena puṣpaphalasasyānyabhiruhyanti| yadā jaṁbūdvīpe (vindūbhi)

varṣadhārāḥ prapatanti| tadā udakaṁ jāyate| jātaṁ codakaṁ sarvakṣetrārāmāṇi saṁtarpayati sukhaṁ ca kārayati| tadyathāpi nāma sarvaśūra prajāpati sarvajaṁbūdvīpe sukhaṁ kārayati|

[114] evaṁ eva sarvaśurāyaṁ saṁghāṭo dharmaparyāya bahujanahitāya bahujanasukhāya jaṁbūdvīpe prakāśitaḥ yathā (ca sarvaśūra) devānāṁ trāyastiṁśānāmāyuṣpramāṇaṁ na tathā manuṣyāṇāṁ| (tatra) katame ca sarvaśūra trāyastriṁśā devāḥ yatra śakro devānāmindraḥ prativasati| te trāyastriṁśā nāma devāḥ santi (tadyathā)sarvaśūra sattvāḥ ya ekaṁ vāksucaritaṁ bhāṣante| teṣāṁ na śakyaṁ puṇyaskandhasyopamāṁ kartuṁ|(yan te devamanuṣyeṣvanupamaṁ saukhyamanubhavanti|)

[115] santi sarvaśūra sattvāḥ ya ekaṁ vagduścaritaṁ bhāṣante na śakyaṁ teṣāṁ narakatiryakṣūpamāṁ kartum yat te sattvāḥ narakatiryakpretaduḥkhāṁ vedanāṁ vedayanti| na (ca) kaścit teṣāṁ trātā bhavati tatra te nirāśāḥ paridevante narakeṣu prapatamānāḥ tad akalyāṇamitravaśena draṣṭavyaṁ| ye sattvā vāksucaritaṁ bhāṣante teṣāṁ na śakyaṁ puṇyaskandhasyopamāṁ kartuṁ| tat kalyāṇamitravaśena draṣṭavyaṁ|

[116] yadā kalyāṇamitraṁ paśyati tadā tathāgato dṛṣṭo bhavati| yadā tathāgataṁ paśyati| tadā (tasya) sarvapāpakṣayo bhavati| yadā sarvapāpakṣayo bhavati| tadā prajāpatirjaṁbūdvīpe autsukyaṁ karoti| yadā prajāpatirjaṁbudvīpe autsukyaṁ karoti| tadā jaṁbūdvīpakanāṁ sattvānāṁ sukhasya na śakyamupamāṁ kartumevamevāyaṁ sarvaśūra saṁghāṭo dharmaparyāya jaṁbūdvīpakānāṁ sattvānāṁ buddhakṛtyaṁ karoti| tadā na śakyaṁ teṣāṁ sattvānāṁ puṇyaskandhasyopamāṁ kartum

[117] tadyathāpi nāma sarvaśūra yatremāḥ paṁca mahānadyaḥ saṁbhedaṁ samavasaraṇaṁ gacchanti| tatra na śakyamudakasya pramāṇamudgrahītuṁ| etāvadudakakuṁbhā vā udakakuṁbhaśatāni vā udakakuṁbhasahasrāṇi vā udakakuṁbhaśatasahasrāṇi vā| api tu bahutvādudakasya mahān udakaskandha iti saṁkhyāṁ gacchati|

[118] evameva sarvaśūra yadā jaṁbūdvīpakā sattvā imaṁ saṁghātaṁ dharmaparyāyaṁ śroṣyanti| śrutvā codgrahīṣyanti dhārayiṣyanti| vācayiṣyanti paryavāpsyanti| pareṣāṁ ca vistareṇa saṁprakāśayiṣyanti pratipatyā ca saṁpādayiṣyanti| tadā na śakyaṁ teṣāṁ sattvānāṁ puṇyaskandhasya pramāṇaṁ udgrahītumapi tu bahutvāt puṇyasya mahān puṇyaskandha iti saṁkhyāṁ gacchati|

[119] ye sarvaśūra sattvāḥ saṁghāṭaṁ dharmaparyāyaṁ na śroṣyanti na taiḥ śakyamanuttarāṁ samyaksaṁbodhimabhisaṁboddhum na śakyaṁ dharmacakraṁ pravartayitum na śakyaṁ dharmagaṇḍī parāhanitum na śakyaṁ tairdharmasiṁhāsanamabhiroḍhuṁ na śakyaṁ (tai) nirvāṇadhātumanupraveṣṭuṁ| na śakyamaprameyai raśmibhiravabhāsayitum ya imaṁ sarvaśūra saṁghāṭaṁ dharmaparyāyaṁ na śroṣyanti na śakyaṁ tairbodhimaṇḍe niṣattuṁ|

[120] sarvaśūra āha - pṛcchāmi bhagavaṁ pṛcchāmi sugata, kaṁcideva kautuhalam

bhagavān āha - pṛccha tvaṁ sarvaśūra yad yad evākāṁkṣasyahaṁ te niṣkāṁkṣaṁ kariṣyāmi

(sarvaśūra) āha - katamaḥ sa bhagavan ṛṣirabhūd yena te sattvāḥ paṁcabhirānantaryaiḥ karmabhiḥ parimokṣitāḥ avaivarttikabhūmau ca pratiṣṭhāpitāḥ

bhagavān āha -

(50) sūkṣmaṁ vacana buddhānāṁ sarvaśūra śṛṇohi me

saṁghāṭadarśanaṁ sūtraṁ ṛṣirūpeṇa darśitaṁ

(51) saṁghāṭo buddharūpaṁ ca darśayatyanukampayā|

yathā balikagaṁgāyā rūpaṁ darśayate tathā|

(52) buddho darśayate rūpaṁ dharman deśayate svayam

buddhaṁ ya icchate draṣṭuṁ (lokanāthaṁ jinottamaṁ||)

(53) (saṁghāṭastena śrotavyaḥ) saṁghāṭaṁ buddhasādṛśaṁ|

buddhas tatra bhaven nityaṁ saṁghāṭaṁ yatra tiṣṭhati|

[121] bhagavān āha - śṛṇu kulaputra|

bhūtapūrvaṁ sarvaśūrātīte dhvani navānavatyasaṁkhyeyaṅ kalpān anusmarāmi| (tatra) dvādaśa buddhakoṭya babhūvan ratnottamanāmānastathāgatā arhantaḥ samyaksaṁbuddhāḥ ahaṁ tena kālena tena samayena pradānaśūro bhūvaṁ candra nāma|

te ca me dvādaśa buddhakoṭya paryupāsitāḥ khādanīyabhojanīyamālyagandhavilepanena yathāsukhaṁ| praṇītenāhāreṇa sarvasukhopadhānenopasthitāḥ upasthāpya ca tatraiva mayā sarvaśūra vyākaraṇamanuttarāyāṁ samyaksaṁbodhau pratilabdham

[122] abhijānāmyahaṁ sarvaśūrāṣṭādaśa buddhakoṭya sarve ratnāvabhāsanāmānastathāgatā loka utpannā abhūvan tatrāhamapi pradānaśūro bhūvan garbhaseno nāma|

te cāṣṭādaśa buddhakoṭyo mayā paryupāsitāḥ pūjitāśca| yathā tathāgatānāṁ pratyarhaṁ gandhamālyavilepanālaṁkāravibhūṣaṇaiḥ tatra ca me vyākaraṇamanuttarāyāṁ samyaksaṁbodhau pratilabdhaṁ|

[123] anusmarāmyahaṁ sarvaśūra viṣmaśatirbuddhakoṭyaḥ śikhisaṁbhavanāmānastathāgatā arhantaḥ samyaksaṁbuddhā loka udapadyanta, pūjitā me te buddhā bhagavanto yathā pratyarheṇa pūjasatkāreṇa tatraiva ca me vyākaraṇamanuttarāyāṁ samyaksaṁbodhau pratilabdham na cādyāpi kālasamayamabhūdvyākaraṇāya||

[124] anusmarāmyahaṁ sarvaśūra viṁśatyeva buddhakoṭyaḥ kāśyapa nāmānastathāgatā arhantaḥ samyaksaṁbuddhā loka udapadyantaḥ tatrāhamapi pradānaśūro bhūvan

kṛtaṁ me teṣāṁ tathāgatānāmupasthānaṁ| gandhena mālyena vilepanena tathāgatagurūpasthānenopasthitāḥ yathā tathāgatānāṁ gurugauravaṁ kartavyaṁ tathā kṛtaṁ| tatraiva ca me vyākaraṇamanuttarāyāṁ samyaksaṁbodhau pratilabdhaṁ|

[125] anusmarāmyahaṁ sarvaśūra ṣoḍaśa buddhakoṭyo bhūvan vimalaprabhāsanāmāna tathāgatā arhantaḥ samyaksaṁbuddhāḥ tena ca kālena tena samayenāhaṁ gṛhapatirabhūvadāḍhyo mahādhano mahābhogaḥ sarvasvaparityāgī (mahātyāgī|)|

te ca mayā ṣoḍaśa buddhakoṭyaḥ pūjitā āstaraṇaprāvaraṇena gandhena mālyena vilepanena vibhūṣaṇācchādanena ca| yathā tathāgatānāṁ gurūpasthānaṁ (kartavyaṁ tathā ca mayā) kṛtaṁ|

tatraiva ca me vyākaraṇamanuttarāyāṁ samyaksaṁbodhau pratilabdhaṁ| na ca me kālaṁ na samayamabhūdvyākaraṇāya||

[126] śṛṇu sarvaśūrānusmarāmyahaṁ paṁcanavatirbuddhakoṭyo loka utpannānyabhūvan sarve śākyamunisahanāmānastathāgatā arhantaḥ samyaksaṁbuddhāḥ ahaṁ ca tena kālena tena samayena ca rājā bhūddhārmiko dharmarājā,

paryupāsitā me (te) paṁcanavatirbuddhakoṭyaḥ śākyamunināmadheyāstathāgatāḥ gandhena mālyena vilepanenāstaraṇapravaraṇena cchatradhvajapatākābhiśca| tatraiva ca me vyākaraṇamanuttarāyāṁ samyaksaṁbodhau pratilabdham||

[127] anusmarāmyahaṁ sarvaśūra navatirbuddhakoṭyaḥ krakatsudanāmānastathāgatā arhantaḥ samyaksaṁbuddhā loka udapadyanta, ahaṁ ca tena kālena tena samayena brāhmakumāro'bhūva āḍhyo mahādhano mahābhogaḥ pradānadātā sarvasvaparityāgī|

te ca mayā tathāgatā sarve upasthitāḥ gandhena mālyena vilepanenāstarāṇaprāvaraṇena vibhūṣaṇācchādanena| yādṛśaṁ ca tathāgatānāmupasthānaṁ (tathā teṣāṁ mayā pratyarhamupasthānaṁ) kṛtaṁ tatraiva ca me vyākaraṇaṁ anuttarāyāṁ samyaksaṁbodhau pratilabdhaṁ na ca me kālaṁ na samayaṁ vyākaraṇāya||

[128] anusmarāmyahaṁ sarvaśūrāṣṭādaśa buddhakoṭyaḥ loka udapadyanta ; sarve kanakamunināmānastathāgatā arhantaḥ samyaksaṁbuddhāḥ ahaṁ ca tena kālena tena samayena pradānaśūro bhūvan paryupāsitā me te tathāgatā arhantaḥ samyaksaṁbuddhāḥ pujitāśca gandhena mālyena vilepanenāstaraṇaprāvaraṇena vibhūṣaṇena| yathā tathāgatānāṁ gurupasthānāṁ tathā me upasthitāḥ tatraiva ca me vyākaraṇamanuttarāyāṁ samyaksaṁbodhau pratilabdhaṁ na ca me kālaṁ na samayaṁ vyākaraṇāyai|

[129] anusmarāmyahaṁ sarvaśūra trayodaśa buddhakoṭyo loka udapadyanta; sarve vabhāsaśirnāmānastathāgatā arhantaḥ samyaksaṁbuddhāḥ te ca me tathāgatāḥ pūjitā āstaraṇaprāvaraṇena gandhena mālyena vilepanācchādanavibhūṣaṇena| yathā tathāgatānāṁ gurūpasthānaṁ kṛtaṁ tadṛśamupasthānamupasthitāḥ taiśca tathāgatairnānādharmamukhāni bhāṣitāni arthavinayaviniścayā tatraiva ca me vyākaraṇamanuttarāyāṁ samyaksaṁbodhau pratilabdhaṁ na cādyāpi samayaṁ vyākaraṇāya|

[130] anusmarāmyahaṁ sarvaśūra paṁcaviṁśatirbuddhakoṭyaḥ puṣyanāmānastathāgatā arhantaḥ samyaksaṁbuddhā loka udapādyanta; ahaṁ ca tena kālena tena samayena prabrajito'bhūvam

paryupāsitā me te tathāgatā yathā ānandaitarhi mamopasthāyakaupasthānamupatiṣṭhati| tādṛśaṁ ca me te tathāgatā upasthitāḥ tatraiva ca me vyākaraṇamanuttarāyāṁ samyaksaṁbodhau pratilabdhaṁ na cādyāpi me samayamabhūdvyākaraṇāya|

[131] anusmarāmyahaṁ sarvaśūra aṣṭādaśa buddhakoṭyo vipaśyināmānastathāgatā arhantaḥ samyaksaṁbuddhā loka udapadyanta;

paryupāsitā me te tathāgatā arhantaḥ samyaksaṁbuddhāḥ ābharaṇaprāvaraṇenācchādanagandhamālyavilepanena yathā tathāgatopasthānaṁ tathā (me) upasthitā|

ahaṁ ca tena kālena tena samayena prabrajito'bhūvan tatraiva ca (me) vyākaraṇamanuttarāyāṁ samyaksaṁbodhau pratilabdhavān na cādyapi samayaṁ vyākaraṇāya na cireṇa kālena|

[132] yaḥ paścimako vipaśyi loka utpannaḥ sa imaṁ saṁghāṭaṁ dharmaparyāyaṁ bhāṣitavān tamahaṁ jñātvā tasmin samaye jaṁbudvīpe saptaratnavarṣaṁ pravṛṣṭavān tadā te jāṁbudvīpakāḥ sattvā adaridrā saṁvṛttāḥ tatraiva cāhaṁ vyākaraṇamanuttarāyāṁ samyaksaṁbodhau pratilabdhavān tataścireṇa kālasamayenādyāpi (ca) māṁ na vyākaroti (anutpattikadharmakṣāntivyākaraṇena|)

[133] āha| katamaḥ sa bhagavān kālaḥ katamaḥ sa samayaḥ

bhagavān āha - śṛṇu sarvaśūra tato dvyasaṁkhyeyaiḥ kalpairdīpaṁkaro nāma tathāgato'rhan samyaksaṁbuddho loka udapādi| tato'haṁ sarvaśura tena kālena tena samayena megho nāma aṇavako bhūvan yadā ca bhagavan dīpaṁkarastathāgato loka utpannaḥ tadāhamapi tasmin kāle tasmin samaye brahmacaryamacārṣaṁ māṇavakarūpeṇa

tato'haṁ bhagavantan dīpaṁkaran tathāgataṁ dṛṣṭvā prasāda pratilabdhaḥ saptabhirutpalairavakīrṇavāṁ tacca tathāgatāvaropitaṁ kuśalamūlamanuttarāyāṁ samyaksaṁbodhau pariṇāmitam

sa ca mān dīpaṁkarastathāgato vyākārṣīdbhaviṣyasi tvaṁ māṇavakānāgate'dhvanyasaṁkhyeyaiḥ kalpaiḥ śākyamunirnāma tathāgato'rhan samyaksaṁbuddha iti|

[134] tato'haṁ sarvaśūra dvādaśatālamātraṁ vihāyasamantarīkṣe sthitvānutpattikadharmakṣāntiṁ pratilabdhavān yacca me sarvaśūrāsaṁkhyeyeṣu kalpeṣu brahmacaryaṁ cīrṇaṁ| yacca pāramitāpratisaṁyuktaṁ kuśalamūlaṁ tatsarvamāmukhībhūtamivānusmarāmi yathādya śvo vā| tatra mayā sarvaśūrānekāni sattvakoṭīniyutaśatasahasrāṇi kuśaleṣu dharmeṣu pratiṣṭhāpitāni|

kaḥ punarvāda sarvaśūra ya etarhyahama anuttarāṁ samyaksaṁbodhimabhisaṁbuddhaḥ sarvasattvahitaiṣiṇaḥ kāruṇikaḥ sattvānāṁ nirodhadharman deśayiṣyāmi|

[135] naitatsthānaṁ vidyate| tatkasya hetoḥ bahuprakāraṁ cāhaṁ sarvaśūra sattvānān dharman deśayāmi| yathārūpavainayikānāṁ sattvānāṁ tathārūpeṇa dharman deśayāmi|

devarūpeṇa devaloke (devānāṁ) dharman deśayāmi| nāgabhavaṇe nāgarūpeṇa (nāgānānaṁ) dharman deśayāmi| yakṣabhavane yakṣarūpena (yakṣānāṁ) dharman deśayāmi| pretabhavane pretarūpeṇa (pretānāṁ) dharman deśayāmi| manuṣyaloke manuṣyarūpena (manuṣyāṇāṁ) dharman deśayāmi|

buddhavainayikānāṁ sattvānāṁ buddharūpeṇa dharman deśayāmi| bodhisattvāvainayikānāṁ sattvānāṁ bodhisattvarūpeṇa dharman deśayāmi| śrāvakavainayikānāṁ sattvānāṁ śrāvakarūpeṇa dharman deśayāmi|

yena yena rūpeṇa sattvā vinayaṁ gacchanti tena tena rūpeṇāhaṁ sattvānān dharman deśayāmi| evaṁ bahuprakāram ahaṁ sarvaśūra sattvānān dharman deśayāmi|

[136] tatkasya hetoryathaiva sarvaśūra sattvā bahuprakāraṁ dharmaṁ śṛṇvanti| tathaiva te sattvasārāḥ bahuprakāraṁ sattvānān dharman deśayanti| te ca sattvāsteṣu tathāgateṣu kuśalamūlānyavaropayanti| dānāni ca dadanti| puṇyāni ca kurvanti| svārthe ca pratijāgaranti| maraṇānusmṛtiṁ ca bhāvayiṣyanti|

te caivaṁrūpaṁ kuśalaṁ karmābhisaṁskāramabhisaṁskariṣyanti| tenaiva ca dharmaśravaṇakuśalamūlahetunā tat pūrvakaṁ kuśalamūlaṁ saṁsmariṣyanti| teṣāṁ tad bhaviṣyati dīrgharātramarthāya hitāya sukhāya devānāṁ ca manuṣyāṇāṁ ca| evaṁ hi sarvaśūra saṁghāṭasūtrasya dharmaparyāyasya sahaśravaṇamātreṇaivamaprameyā (-m-asaṁkhyeyā) guṇānuśaṁsā bhaviṣyanti|

[137] atha te sattvāḥ parasparamevamāhuḥ astyanyaḥ kaścit kuśalo dharmaphalavipākaḥ yasya kṛtatvādupacitatvādanuttarāṁ samyaksaṁbodhimabhisaṁboddhyate sarvasattvāhitaiṣiṇaśca bhavanti||

[138] atha bhagavaṁsteṣāṁ sattvānāṁ cetasaiva cetaḥparivitarkamājñāya tānetadavocat - asti kulaputrā ye dharmaṁ pattīyanti te evaṁ vakṣyanti asti dharmo yathābhūtaḥ teṣāṁ mahāphalaṁ sukhavipākamanuttaraṁ dharmasukhaṁ bhaviṣyati|

[139] ye sattvā mohamūḍhāsta evaṁ vakṣyanti| na santi dharmāḥ na santi dharmānāṁ pāragaḥ sa teṣāṁ mahāphalaṁ kaṭukavipākamapāyeṣupapatsyate| punaḥ punaśca te (mohapuruṣā) apāyabhūmiparāyaṇā bhaviṣyanti|

[140] aṣṭau kalpān nairāyikān duḥkhaṁ vedanāmanubhaviṣyanti| dvādaśa kalpāni pretayoniṣu duḥkhaṁ vedanāṁ vedayiṣyanti|

ṣoḍaśa kalpānyasureṣūpapatsyante| nava kalpasahasrāni bhūtapiśācayoniṣūpapatsyante| caturdaśa kalpasahasrāṇi ajihvakā bhaviṣyanti| ṣoḍaśa kalpasahasrāṇi mātugarbhe kālaṁ kariṣyati| dvādaśa kalpasahasrāṇi māṁsapiṇḍā bhaviṣyanti| ekādaśa kalpasahasrāṇi jātyandhabhūtāḥ prajāsyanti| duḥkhām vedanāṁ vedayamānā| (jātyandhaṁ ca dṛṣṭvā)

[141] tadā mātāpitṛbhyāmevaṁ bhaviṣyati| nirāsvādamasmābhirduḥkhamanubhūtaṁ nirāsvādamasmākāṁ putro'jātaḥ nirāsyādaṁ navā māsāḥ kukṣau dhāritaḥ śītoṣṇāṁ vedanāṁ vedayamānaiḥ kṣutpipāsāsuḥkhāṇi ca pratyanubhūtāni| bahūni ca dṛṣṭadharmavedanīyāni duḥkhāni dṛṣṭvā putro'jātaḥ na ca gṛhe mātāpitrāvutsukau kṛtau na svakāyaṁ| tato mātāpitṛbhyāṁ mahatī nirāśatā bhaviṣyati|

evameva sarvaśūra nirāśāḥ saddharmapratikṣepakāḥ sattvāḥ narakatiryakpretaparāyaṇāḥ te ca tasmin maraṇakālasamaye mahatā śokāśalyasamarpitā bhaviṣyanti|

[142] ye sarvaśūra sattvā evaṁ vāgbhāṣante asti dharmaḥ asti dharmāṇāṁ pāragaḥ te tena kuśalamūlena viṁśāti kalpāṇyuttarakuruṣūpapatsyante| paṁcaviṁśati kalpasahasrāṇi trāyastriṁśānān devānāṁ sahabhāvyatāyāmupapatsyante| trayastriṁśadbhyo devebhyaścyavitvā uttarakuruṣupapatsyante|

na ca mātuḥ kukṣāvupapatsyante| lokadhātuśatasahasraṁ ca drakṣyanti| sarve (ca tāṁ lokadhātavaḥ) sukhāvatīnāmānaḥ sarvabuddhakṣetrasandarśanan dṛṣṭvā tatraiva pratiṣṭhānāṁ kṛtvā tatraiva bodhimabhisambhotsyante|

[143] evaṁ hi sarvaśūra mahāprabhāvo yaṁ saṁghāṭo dharmaparyāyaḥ ye'smiṁścittaprasādaṁ kariṣyanti| na te jātu viṣamaparihāreṇa kālaṁ kariṣyanti| pariśuddhaśīlasamavāgatāste (sattvā) bhaviṣyanti|

[144] santi sarvaśūra sattvā ya evaṁ vaksyanti rātrindivaṁ tathāgato bahūni sattvāni parimocayanti| adyāpi sattvadhātuḥ kṣayaṁ na gacchanti| bahavo bodhāya praṇidhānaṁ kurvati| bahavaḥ svargaloka upapadyante| bahavo nirvṛtimanuprāpnuvanti| atha kena hetunā sattvānāṁ kṣayo na bhavati||

II. maitreyaparipṛcchā|

[145] athānyatīrthikacarakaparibrājakanigranthānāmetadabhavat gamiṣyāmo vayaṁ śramaṇena gautamena sārdhaṁ vivādaṁ kariṣyāmaḥ atha khalu caturnavati brāhmaṇānyatīrthikacarakaparibrājakāḥ anekāni ca nigranthaśatāni yena rājagṛhaṁ mahānagaraṁ tenopasaṁkrāmanti| tena ca kālena tena samayena bhagavān smitāṁ prāduṣcakāra;||

[146] atha khalu maitreyo bodhisattvo mahāsattva utthāyāsanādekāṁsamuttarāsaṁgaṁ kṛtvā dakṣiṇaṁ jānumaṇḍalaṁ pṛthivyāṁ pratiṣṭhāpya yena bhagavāṁstenāṁjaliṁ praṇamya bhagavantametadavocat - ko bhagavan hetuḥ kaḥ pratyayaḥ smitasya prāduṣkaraṇāya| nāhetuṁ nāpratyayaṁ tathāgatā arhantaḥ samyaksaṁbuddhā smitaṁ prāduṣkurvanti|

[147] bhagavānāha - śṛṇu kulaputrādyeha rājagṛhe mahānagare mahāsannipāto bhaviṣyati|

āha| ke bhagavan ihāyāsyanti| devā vā nāgā vā yakṣā vā manuṣyā vā amanuṣyā vā|

bhagavānāha - sarva ete maitreyādyehāgamiṣyanti| devanāgayakṣamanuṣyāmanuṣyāḥ caturaśītiṁ ca sahasrāṇi brāhmaṇānāmihāyāsyanti|

[148] navati koṭīsahasrāṇi tīrthikacarakaparibrājakanigranthānāmihā yāsyanti| te mayā sārdhaṁ vivādaṁ kariṣyanti| teṣāṁ sarveṣāṁ vivādaśamanāya dharman deśayiṣyāmi| sarve ca te brāhmaṇā anuttarāyāṁ samyaksambodhau cittamutpādayiṣyanti| navati koṭīśatasahasrāṇyanyatīrthikacarakaparibrājakanigranthāḥ sarve srotaāpattiphalaṁ prāpsyanti|

[149] aṣṭādaśa koṭīsahasrāṇi nāgarājñāmāgamiṣyanti| ye mamāntikāddharmaṁ śroṣyanti| śrutvā ca (tā) sarve'nuttarāyāṁ samyaksaṁbodhau cittānyutpādayiṣyanti|

[150] ṣaṣṭi koṭīsahasrāni śuddhāvāsakāyikānāṁ devaputrāṇāmāgamiṣyanti| dvātriṁśadbhiḥ koṭīsahasrairmāraḥ pāpīyān saparivāra āyāsyati| dvādaśa koṭīsahasrāṇi asurarājñāmāgamiṣyanti| paṁcamātrāṇi (ca) rājaśatāni saparivārāṇyāyāsyanti dharmaśravaṇāya| te sarve mamāntikāddharmaṁ śrutvānuttarāyāṁ samyaksaṁbodhau cittānyutpādayiṣyanti||

[151] atha khalu maitreyo bodhisattvo mahāsattvo bhagavataḥ pādau śirasā vanditvā bhagavantaṁ (tṛṣ) pradakṣiṇīkṛtvā tatraivāntardhitataḥ||

III. sarvaśūraparipṛcchā (2)

[152] atha khalu sarvaśūro bodhisattvo mahāsattva utthāyāsanādekāṁsamuttarāsaṁgaṁ kṛtvā dakṣiṇaṁ jānumaṇḍalaṁ pṛthivyaṁ pratiṣṭhāpya yena bhagavāṁstenāṁjaliṁ praṇāmya bhagavantametadavocat - kinnāmo bhagavan paṁcamātrāṇi rājaśatāni|

[153] bhagavān āha - śṛṇu sarvaśūra nado nāma rājā sunando nāma rājā| upanando nāma rājā| jinarṣabho nāma rājā| brahmaseno nāma rājā| brahmaghoṣo nāma rājā| sudarśano nāma rājā| jayaseno nāma rājā| nandaseno nāma rājā| biṁbisāro nāma rājā| prasenajinnāma rājā| virūḍhako nāma rājā| evaṁpramukhāni paṁcamātrāṇi rājaśatāni| ekaiko rāja viṁśatikoṭīsahasraparivāraḥ te sarve'nuttarāyāṁ samyaksaṁbodhau saṁprasthitāḥ sthāpayitvā rājā virūḍhakaḥ

[154] pūrvasyān diśi tṛṁśatkoṭīsahasrāni bodhisattvānāmāgacchanti| (dakṣiṇāyāṁ diśāyāṁ paṁcāśatkoṭīsahasrāni bodhisattvānāmāgacchanti; paścimāyān diśāyāṁ ṣaṣṭi koṭīsahasrāṇi bodhisattvānāmāgacchanti|)

uttarasyān diśi aśīti koṭīsahasrāṇi bodhisattvānām āgacchanti| adhastāddiśi navati koṭīsahasrāni bodhisattvānāmāgacchanti| ūrdhvāyān diśi śata koṭīsahasrāṇi bodhisattvānāmāgacchanti| sarve ca daśabhūmipratiṣṭhitāḥ

[155] atha te sarve bodhisattvā yena rājagṛhaṁ mahānagaraṁ yena ca gṛddhrakūṭaparvato yena bhagavāṁstenopasaṁkrāntā bhagavato darśanāya (;vandanāya)| sarve ca te bodhisattvānuttarāṁ samyaksaṁbodhiṁ saṁprasthitāḥ

[156] atha khalu bhagavān sarvaśūraṁ bodhisattvaṁ mahāsattvamāmantrayati (sma;) gaccha tvaṁ sarvaśūra daśasu dikṣu sarvalokadhātuṣu bodhisattvānāṁ evaṁ vada|

adya tathāgato rājagṛhe mahānagare dharman deśayati| tadyūyaṁ sarve daśasu dikṣu lokadhātuṣu sthitā añjalīn praṇāmayatha; anuśrāvya ca muhūrtamātreṇa ca punarevāgaccha dharmaśravaṇāya|

[157] atha khalu sarvaśūro bodhisattvo mahāsattva utthāyāsanād bhagavataḥ pādau śirasābhivandya bhagavantaṁ (tṛṣ) pradakṣiṇīkṛtya ṛddhibalenāntardhitaḥ

[158] atha khalu sarvaśūro bodhisattvo mahāsattvo daśasu dikṣu lokadhātuṣu gatvā bodhisattvānāmārocayati|

adya mārṣā śākyamunistathāgato'rhan samyaksaṁbuddhaḥ sahāyāṁ lokadhātau rājagṛhe mahānagare sattvānān dharmaṁ deśayati| tadyūyaṁ sādhukāramanuprayacchath; tadyuṣmākamadyaiva hitāya sukhāya mahālābho bhaviṣyati|

[159] atha khalu sarvaśūro bodhisattvo mahāsattvo daśasu dikṣu lokadhātuṣu gatvā sarvabuddhān paryupāsya bodhisattvānāmārocayati| tadyathāpi nāma balavān puruṣo cchaṭāsaṁghāṭaṁ kuryādatrāntare sarvaśūro bodhisattvo mahāsattvo yena rājagṛhaṁ mahānagaraṁ yena ca bhagavāṁstenāgatya bhagavataḥ purata sthitaḥ tatra ca sarve brāhmaṇānyatīrthikacarakaparibrājakanigranthā sannipatitāḥ bahavaśca devanāgamanuṣyāmanuṣyāḥ paṁcamātrāṇi ca rājaśatāni saparivārāṇi sannipatitāni| trayastriṁśatkoṭīsahasrāṇi mārāṇāṁ pāpīyasāṁ saparivārāḥ sannipatitā|

[160] atha khalu punaḥ tena samayena rājagṛhaṁ mahānagaraṁ prakaṁpitam atha khalu daśasu dikṣu lokadhātuṣi divyaṁ candanacūrṇaṁ pravarṣitaṁ| divyaṁ ca puṣpavarṣaṁ pravarṣitaṁ| tad bhagavato mūrdhasandhau kūṭāgāraḥ saṁsthitaḥ tena khalu punaḥ samayena tathāgatasya purataḥ śakro devānāmindro vajraṁ parāhanat

[161] atha khalu tasmin samaye caturdiśaṁ catvāro vātarājanaḥ saṁkṣubdhāḥ pravānti| yena ca rājagṛhe mahānagare saṁkarā vā paṁsavo vā bālikā vā tatsarvaṁ nagarādbahiḥ prakṣipanti| daśasu dikṣu lokadhātuṣu gandhodakavarṣaṁ pravarṣanti| daśasu dikṣu lokadhātuṣūtpalapadmakumudapuṇḍarīkāni pravarṣanti|

te ca puṣpāsteṣāṁ sattvānāmuparimurdhni puṣpacchatrāṇi tasthire| tathāgatasya coparimurdhni uparyantarīkṣe caturaśītiḥ kūṭāgārasahasrāṇi saṁsthitāni|

teṣu ca caturaśītiṣu puṣpakūṭāgārasahasreṣu caturaśīti sahasrāṇyāsanānāṁ prajñaptāni saptaratnamayāni prādurbhūtāni| sarvatra cāsane tathāgato niṣaṇṇo dharman deśayati| atha khalvayaṁ trisāhasramahāsāhasro lokadhātuḥ ṣaḍvikāraṁ prakampitaḥ||

[162] atha khalu sarvaśūro bodhisattvo mahāsattvo yena bhagavāṁstenāṁjaliṁ praṇamya bhagavantametadavocat - ko bhagavan hetuḥ kaḥ pratyayo yadimānyevaṁrūpāṇi rājagṛhe mahānagare prātihāryāṇi; sandṛśyante|

bhagavān āha - tadyathā kaścideva puruṣaḥ syāccañcalaścapalo'haṁkāramamakārasthitaḥ sa ca daridro bhavet tasya rājā śīrṣaṁ parimārjayedatha sa puruṣo'dhimānādyāvādrājadvāraṁ gatvā balasā taṁ rājakulaṁ praveṣṭuṁ icchedatha te rājāmātyapārṣadyāstaṁ puruṣaṁ gṛhṇīyurbahubhiśca prakāraistāḍayeyur

[163] atha tena kālena tena samayena sa rājā śṛṇuyād etaṁ prakṛtiṁ sa daridrapuruṣo balasābhyantaraṁ praveṣṭukāma iti| śrutvā cāsyaivaṁ bhaved avaśyamayaṁ mama ghātayitukāmaḥ

tataḥ sa rājā ruṣṭastān pārṣadyānevaṁ vaded gacchantu bhavanta etaṁ puruṣaṁ parvatavivaraṁ nītvā jīvitādvyaparopayatha; sarvaparivāraṁ mātāpitṛputraduhitṛdāsīdāsakarmakarāṇāṁ ca vyasanamāpādayatha|

atha te sarve jīvitādvyavaropitāḥ tasya (ca) sarve svajanabandhuvargāḥ paramaśokaśalyasamarpitā bhaveyuḥ

[164] evameva sarvaśūra tathāgato'pyarhan samyaksaṁbuddhaḥ sattvānān dharman deśayati| tatra yathā sa puruṣo'dhimānika evaṁ bālapṛthagjanāstathāgataṁ rūpavarṇaliṁgasaṁsthānato nimittamudgṛhya tathāgatakāyamiti saṁjānanti|

[165] tatra te bahūn dharmaṁcchrutvādhimāne patanti nānāpralāpān pralapanti| ahaṁkāramamakāreṇābhibhūtāḥ (sattvāḥ) svayameva dharmaṁ na śṛṇvanti na prakāśayanti| yaḥ kaścit sūtraṁ vā gāthāṁ vāntaśo dṛṣṭāntaṁ vā teṣāṁ ārocayati| tatte na gṛhṇanti na śrotramavadadhanti| vayaṁ svayaṁ jānīmaha iti| tatkasya hetoryathāpīdamadhimānatvātte ca bāhuśrutyena pramādamāpadyante|

[166] ye bālapṛthagjanaiḥ sārdhaṁ samavadhānaṁ kurvanti| na te tathārūpaṁ dharmopasaṁhitaṁ vacanaṁ śroṣyanti| tettena bāhuśrutyena pramattā bhaviṣyanti| te tathārūpāḥ puruṣāḥ svakāvyāni sthāpayanti| svagranthāni dānāni sthāpayanti| te sarvalokaṁ cātmānaṁ ca visaṁpādayanti| vyarthaṁ ca rāṣṭrapiṇḍaṁ prabhūtaṁ paribhokṣyanti| bhuktvā ca na samyak pariṇamayiṣyaṁti| maraṇakālasamaye ca teṣāṁ mahāsantrāso bhaviṣyati|

[167] te ca sattvāstaṁ vakṣyanti| bahavastvayā vayaṁ śilpajñānaṁ śikṣāpitāḥ kathaṁ tvaṁ svamātmānaṁ na śaknuṣe parisaṁsthāpayituṁ| sa teṣāṁ evaṁ vadenna śakyaṁ mārṣā idānīmātmānaṁ parisaṁsthāpayituṁ|

[168] tatra te sattvā(stasya tadbhāṣitaṁ śrutvā) nānāprakāraṁ paridevayiṣyanti| yathā tasyaikapudgalasyarthena bahavo jñatṛsaṁghā jīvitādvyavaropitā anaparādhinaḥ svakarmapratyayena|

evameva te sattvā maraṇakālasamaye teṣāṁ paridevatāṁ narakatiryagyoniparāyaṇaṁ ātmānaṁ samanupaśyantaḥ akalyāṇamitrahetoḥ evameva yuṣmākaṁ brāhmaṇānāmanyatīrthikacarakaparibrājakanigranthānāmevaṁ vadāmi|

mā yūyaṁ pramattā bhavathaḥ tadyathāpināmājātapakṣaḥ śakunirna śaknotyākāśe prakramituṁ devalokagamanāya| evameva yuṣmābhir(ahaṁkāramamakārasthitair)na śakyaṁ nirvāṇaṁ anuprāptuṁ na yuṣmākaṁ tathā ṛddhiḥ saṁvidyate|

tatkasya hetoḥ karmaprakaraṇena yūyaṁ kukkuṭayonyā ivotpannāḥ na cireṇāyaṁ kāyo bhedanadharmā maraṇaparyavasāno bhaviṣyati| maraṇakālasamaye nirāsvādanatā paritasyanatā ca bhaviṣyati|

[169] kimayaṁ asmābhirātmabhāvaḥ sandhārito ye vayaṁ na devasukhaṁ na manuṣyalokasukhaṁ pratyanubhaviṣyāma| nāpi nirvāṇapadasthā bhaviṣyāma; nirarthakamasmābhiḥ śarīramudbūḍhaṁ| kā gatirasmābhiḥ kaḥ parāyaṇaṁ bhaviṣyati| kutropapattiḥ kutra (vā) nirodho bhaviṣyati|

[170] atha (khalu) bhagavāṁs(punarapi) teṣāṁ anyatīrthikacarakaparibrājakanigranthabrāhmaṇānamantrayati| mā yūyaṁ mārṣā ratnamayājjaṁbūdvīpānnirāśā bhaviṣyadhve; mā yāyaṁ dharmaratnāt paribāhyā bhaviṣyatheti| pṛcchatha yūyaṁ mārṣāstathāgataṁ yadyadevākāṁkṣathāhaṁ yuṣmākaṁ sarvābhiprāyān paripūrayiṣyāmi|

[171] atha khalu te sarve brāhmaṇānyatīrthikacarakaparibrājakanigranthā utthāyāsanebhyaḥ ekāṁsāni cīvarāṇi pravṛtyāṁjalayaḥ pragṛhya bhagavantaṁ paripṛcchanti (sma)| bahūni bhagavaṁ sattvāni rātrindivastathāgataḥ saṁsārā parimocayati| na ca sattvadhātorūnatvaṁ vā pūrṇatvaṁ vā prajñāyate| ko bhagavan hetuḥ kaḥ pratyayaḥ yatte sattvā samānā utpādanirodhaṁ darśayanti||0|| (saṁghāṭe mahādharmaparyāye sarvaśūraparipṛcchā samāptā||0||)

IV. bhaiṣajyasenaparipṛcchā|

[172] tatra khalu bhagavān bhaiṣajyasenaṁ bodhisattvaṁ mahāsattvamāmantrayati sma| mahāsannāhaṁ sannahyanti tīrthyā| mahākaukṛtyavinodanārthāya| mahādharmolkājvālanāya| mahāpraśnanidānaṁ paripṛcchanti| (śṛṇutha yūyaṁ kulaputrā ihānantāparyanta pṛthivīdhāturabdhātustejodhāturvāyudhāturato nāṁtataraḥ sattvadhātuḥ santi ca sattvāḥ ye sattvahitārthamutpādanirodhaṁ darśayaṁti)

paścime tu kāle bhaviṣyanti daharā sattvā vṛddhā vā ye utpādanirodhaṁ kariṣyanti| santi bhaiṣajyasena vṛddhā sattvā daharā iva na kiṁcijjānanti|

[173] tadyathāpi nāma bhaiṣajyasena kaścideva puruṣaḥ śiraṁ śocayeta navakāni ca vastrāṇi pravṛṇuyāt sa ca gṛhādbahirniṣkrameta| tamenaṁ sattvā āmantrayanti| suprāvṛtāni te navakāni vastrāṇīti| atha kaścidevāparaḥ sattvo bhavet sa śiraḥ śocayeta purāṇakāni ca vastrāṇi (śocayitvā) prāvṛṇuyāt tāni ca śithilakāni bhavanti na ca śobhante| sa ca puruṣaḥ susnātaśirā bhavati vastraṁ cāsya na śobhate| evameva bhaiṣajyasena saṁti vṛddhā sattvā ye jaṁbūdvīpaṁ na śobhayanti| daharāstu sattvā utpādanirodhaṁ darśayanti|

[174] atha khalu te sarve'nyatīrthikacarakaparibrājakanigranthabrāhmaṇā utthāyasanād bhagavantametadavocan - ko bhagavannasmākaṁ vṛddho vā daharo vā

bhagavān āha - vṛddhā yūyaṁ punaḥ punarnarakatiryakpreteṣu duḥkhāṁ vedanāṁ dṛṣṭvā tadadyāpi yūyaṁ tṛptiṁ nādhigacchatha;

[175] atha khalu te sarve brāhmaṇānyatīrthikacarakaparibrājakanigranthāḥ sarve ca nāgarājāno bhagavantametadavocan - na bhūyo bhagavannutsahāma saṁsāre duḥkhāṁ vedanāmanubhavituṁ

te cānyatīrthikacarakaparibrājakanigranthabrāhmaṇā evamāhuḥ na santi daharā sattvā ye śaknuyurdharmatāṁ sākṣāt kartum||

[176] atha khalu bhaiṣajyaseno bodhisattvo mahāsattvo bhagavantametadavocat - paśya bhadanta bhagavan kiyadduradhimocyā ime sattvāḥ

bhagavān āha - śṛṇu bhaiṣajyasena saṁprataṁ tathāgataḥ sarvalokapratyakṣaṁ karoti|

[177] atha khalu catunavati koṭīsahasrāṇi navakānāṁ sattvānāṁ te tathāgatasya purataḥ sthitāḥ na ca tathāgataṁ bandanti nālapanti na saṁlapanti| tūṣṇīṁbhāvenādhivāsayanti|

atha khalu bhaiṣajyaseno bodhisattvo mahāsattvo bhagavantametadavocat - ko bhagavan hetuḥ kaḥ pratyayo yadete sattvā bhagavantaṁ nālapanti na saṁlapanti na vandanti na ca bhagavantaṁ paripṛcchanti| bhagavān āha - śṛṇu bhaiṣajyasena ye sattvā evaṁ vadanti na śakyaṁ navakaiḥ sattvairdharmatā sākṣāt kartum|| ta ete bhaiṣajyasena navakāḥ sattvā yuṣmābhirdraṣṭavyāḥ

te ca sattvā evaṁ āhurvayaṁ bhadanta bhagavan navakāḥ sattvā vayaṁ bhadanta sugata navakāḥ sattvā|

bhagavān āha - eṣāṁ bho sattvānāṁ lokapratyakṣaṁ sāṁprataṁ svaśarīrāllokasya pramānaṁ darśayatha|

[178] tena khalu punaḥ kālena tena samayena caturnavati koṭīsahasrāṇi navakānāṁ sattvānāṁ kāyasya bhedādantarikṣe sthitvā daśabhūmipratilabdhā abhūvan

atha khalu bhaiṣajyaseno bodhisattvo mahāsattvo bhagavantametadavocat - sulabdhā lābhā bhagavannīdṛśāḥ sattvāḥ ye saṁsāre parikṣayāya paryadānāya vīryamārabhante| adyaiva bhagavannime sattvā utpannāḥ adyaiva bhagavannime sattvāḥ parimuktāḥ (adyaiva) sarve daśabhūmipratiṣṭhitā dṛṣṭāḥ||

[179] atha khalu sarvabrāhmaṇānyatīrthikacarakaparibrājakanigranthā nāgarājāno'pi mārāśca pāpīyānaṁ saparivāraṁ upasaṁkrāntaṁ vicakṣuṣkaraṇāya; sarve ca te bhagavantametadavocanniha vayaṁ bhagavan tathāgatasyāntikamupasaṁkrāntā vicakṣuṣkaraṇāya| te vayaṁ bhagavanniman dharmaparyāyaṁ śrutvā prasādapratilabdhā abhūvan buddhe ca dharme ca| tatrāsmākaṁ bhagavan sarveṣāṁ evaṁ bhagavatyevaṁrūpaṁ buddhasukhaṁ pratilabhema;|| evaṁrūpāśca tathāgatā arhantaḥ samyaksaṁbuddhā loke bhavema;

[180] bhagavān āhaivametadbhadramukhā evametadyathā yūyaṁ tathāgatasyārhataḥ samyaksaṁbuddhasyāntikamupasaṁkrāntāḥ tairyuṣmābhirimaṁ saṁghāṭaṁ (sūtraṁ) dharmaparyāyaṁ śrutvānuttarāyāḥ samyaksaṁbodheścittānyutpāditāni| tena yūyaṁ bhadramukhāḥ kuśalamūlena na cireṇa kālenānuttarāṁ samyaksaṁbodhimabhisaṁbhotsyadhve| atha samantarabhāṣitā ca bhagavateyaṁ vāg

[181] atha tāvadeva teṣāṁ sarveṣāmanyatīrthikacarakaparibrājakanigranthabrāhmaṇānāmanutpattikadharmakṣāntipraitlabdho'bhūvat sarve ca daśabhūmipratiṣṭhitā bodhisattvāḥ saṁvṛttāḥ sarve ca te bodhisattvā uparyantarīkṣe sapta tālān vaihāyasamabhyudgamya saptaratnamayāni kūṭāgārāṇi tathāgatasyopanāmayanti| sarve ca nānāvikurvādhiṣṭhānardhyabhisaṁkārān abhisaṁskurvanti|

atha tāvadeva te sarve bhagavata uparimūrdhni sthitvā bhagavantaṁ nānāpuṣpairabhyavakiranti| tathāgatāṁśca manasi kurvanti| svakāye ca buddhasaṁjñāmutpādayantyanekāni ca devaputrakoṭīniyutaśatasahasrāṇi (divyapuṣp[ai]s) tathāgatamabhyavakiranti (smaḥ)|

[182] evaṁ ca vācamabhāśanta; mahālābhaḥ śramaṇo gautamaḥ mahākṣetraṁ lokanāthaḥ samādhibalādhānaprāptaḥ vijño vijñārthikaḥ yaḥ īdṛśān sattvān saṁsārādanupūrveṇopāyakauśalyena parimocayatyekena subhāṣitamātreṇa etāvanti sattvāni saṁsārāt parimucyante||

[183] atha khalu bhaiṣajyaseno bodhisattvo mahāsattva utthāyāsanādekāṁsamuttarāsaṁgaṁ kṛtvā dakṣiṇaṁ jānumaṇḍalaṁ pṛthivyāṁ pratiṣṭhāpya yena bhagavāṁs tenāṁjaliṁ praṇamya bhagavantametadavocat - ko bhagavan hetuḥ kaḥ pratyayo ya eta devaputrā evaṁ vānniścārayanti| bahūni cardhyabhisaṁskāraṁ kurvanti| bahubhiśca guṇavarṇastavaistathāgatamabhistavanti sma|

bhagavān āha - śṛṇu kulaputra na hi te māṁ stunvanti| svakāyameva stunvanti| svakāyameva dharmarājāsane sthāpayiṣyanti| svakāyamevagradharmāsane pratiṣṭhāpayiṣyanti| svakāyādeva dharmaraśmin niścārayiṣyanti| sarvabuddhaparigṛhītāśca bhaviṣyantyanuttarāsyāḥ samyaksaṁbodherabhisaṁbodhāyābhisaṁbudhya ca dharman deśayiṣyanti (ca)||

[184] atha khalu bhaiṣajyaseno bodhisattvo mahāsattvo bhagavantametadavocat - bahavo bhadanta bhagavan sattvāḥ bahavo bhadanta sugataḥ sattvā rātrindivaṁ parimucyante tadadyāpi sattvānāṁ kṣayo na bhavati| bhagavān āha - sādhu sādhu bhaiṣajyasena yastvaṁ tathāgatametamarthaṁ paripraṣṭavyaṁ manyase| śṛṇu bhaiṣajyasena tadyathāpi nāma bhaiṣajyasena kaścideva puruṣo bhavedāḍhyo mahādhano mahābhogaḥ prabhūtabhogaḥ bahudhanadhānyakośakoṣṭhāgārasamanvāgataḥ bahudāsadāsīkarmakarapauruṣeyāni cāsya syuḥ bahūni ca dhanaskandhāni bhaveyuḥ bahūni ca kṣetrārāmāṇi saṁvidyeran bahūni ca dhanadhānyāni| tadyathā yavagodhumaśālitilamāṣamudgādīni sa ca puruṣo vasantakāle sarvāni tāni dhanadhānyāni vāpayeta|

atha yāvadapareṇa kālasamayena sarvāṇi tāni dhanadhānyāni paripadyaran sa paripakvānīti viditvā sa yāvadabhyantaragṛhe praveśayeta; sa puruṣastāni dhanadhānyāni gṛhasyābhyantare pṛthak pṛthak sthāpayati| sthāpayitvā paribhuṁkte| yāvadvasantakāle (samaye) punareva tāni bījāni vāpayati|

[185] evameva bhaiṣajyasena ime sattvāḥ pūrvaṁ śubhaṁ karma kṛtvā paścāt teṣāṁ karmaṇāṁ parikṣayāt punaḥ punarapi puṇyakṣetrameṣante kuśalamūlānyavaropayanti| kuśalamūlānyavaropayitvā tatra ca kuśaladharme pratipatya saṁpādayanti| pratipattisaṁpannā sarvadharmān vardhayanti| sarvadharmān vardhayitvā prītiprāmodyamutpādayanti| tena ca prītiprāmodyacittena bhaiṣajyasenānekāni kalpakoṭīsahasrāṇi na nāśyante| evameva bhaiṣajyasena prathamacittotpādiko bodhisattvo na kadācid vināśadharmā bhavati| saṁkṣiptena sarvadharmān prajānāti|

[186] āha| kathaṁ bhagavan prathamacittotpādiko bodhisattvaḥ svapnaṁ paśyati|

bhagavān āha| bahūni bhaiṣajyasena prathamacittotpādiko bodhisattvaḥ svapnāntare bhayāni paśyati| tatkasya hetoryadā svapnāntare bhayāni paśyati| tadā sarvapāpakāni karmāṇi pariśodhayati| na śakyaṁ bhaiṣajyasena pāpakarmaṇā sattvena tīvraṁ duḥkhamapanayituṁ na ca pāpena svapnena dṛṣṭenāsya bhayaṁ bhavati|

[187] bhaiṣajyasena āha - katamāni bhagavan prathamacittotpādiko bodhisattvaḥ svapnāntare bhayāni paśyati|

bhagavān āha - agniṁ bhaiṣajyasena prajvalitaṁ paśyati| tatra tena bodhisattvenaivaṁ cittaṁ utpādayitavyaṁ sarvakleśāni me dagdhāḥ dvitīyaṁ bhaiṣajyasena udakaṁ paśyati luḍitaṁ saṁpraluḍitaṁ| tatra tena prathamacittotpādikena bodhisattvena na bhettavyaṁ| tatkasya hetoḥ evaṁ hi bhaiṣajyasena bodhisattvena sarvamohabandhanāni vinivartya sarvapāpakṣayaṁ kṛtaṁ bhavati|

tṛtīyaṁ bhaiṣajyasena prathamacittotpādiko bodhisattvaḥ svapnaṁ paśyati mahābhayaṁ|

āha - katamaṁ bhagavan

[188] bhagavān āha - svaśarīre śīrṣaṁ muṇḍitaṁ paśyati| tatra tena bhaiṣajyasena prathamacittotpādikena bodhisattvena na bhettavyaṁ tatkasya hetoḥ tenaivaṁ cittamutpādayitavyaṁ rāgadveṣamohāni me muṇḍitāni bhavanti| ṣaḍgatikaṁ ca me saṁsāraṁ parājitaṁ bhaviṣyati| na hi tasya narakāvāso bhaviṣyati| na tiryakṣu na preteṣu (vā) nāsureṣu (vā) na nāgeṣu na deveṣu pariśuddheṣu bhaiṣajyasena buddhakṣetreṣu prathamacittotpādiko bodhisattvaḥ upapattiṁ pratigṛhṇāti|

[189] (bhaviṣyati) bhaiṣajyasena paścime kāle paścime samaye yadi kaścit sattvo bodhau cittaṁ pariṇamayiṣyati| tena mahatī paribhāṣaṇā draṣṭavyā| paribhūtavāsaśca bhaviṣyati| tatra(tena) bhaiṣajyasena prathamacittotpādikena bodhisattvena na parikhedacittamutpādayitavyaṁ na vyavasitavyaṁ|

[190] bahavo bhaiṣajyasena mayā dharmā deśitāḥ mayā ca bhaiṣajyasenānekāni kalpaniyutaśatasahasrāni duṣkaracaryā cīrṇā na mayā bhaiṣajyasena rājyabhogārthāya vā vṛttibhogārthāya vā aiśvaryabhogārthāya vā duṣkaracaryā cīrṇāḥ svabhāvadharmāvabodhāya bhaiṣajyasena mayā duṣkaracaryā cīrṇāḥ na ca me tāvadanuttarā samyaksaṁbodhimabhisaṁbuddhā yāvanna mayāyaṁ dharmaparyāyaḥ śrutaḥ yasminstu bhaiṣajyasena kālasamaye mayāyaṁ saṁghāṭo dharmaparyāya śrutaḥ tatraiva me divase anuttarā samyaksaṁbodhimabhisaṁbuddhā gaṁbhīro yaṁ bhaiṣajyasena dharmaparyāyaḥ durlabho'sya bhaiṣajyasena dharmaparyāyasya kalpakoṭīniyutaśatasahasrairapi śravaḥ paramadurlabho bhaiṣajyasena tathāgatānāmutpādaḥ paramadurlabhā bhaiṣajyasenāsya dharmaparyāyasya dhārakaḥ

[191] ye te iman dharmaparyāyaṁ śroṣyanti| sarve te nuttarāṁ samyaksaṁbodhim abhisaṁbhotsyante| kalpaśatasahasraṁ bhaiṣajyasena sattvā saṁsārāt paścānmukhaṁ kariṣyanti| pariṣuddhaṁ ca buddhakṣetraṁ pratilapsyante| nirodhamārgaṁ ca prajñasyanti|

bhavyāś ca te niśrayaṁ prajñātuṁ| bhavyāḥ kuśalasthānaṁ prajñatuṁ| bhavyā abhijñākuśalasthānaṁ prajñatum bhavyāḥ kuśalasthānanirodhaṁ prajñātum

[192] nirodhameva bhaiṣajyasena kimarthamucyate|

āha| artha ucyate bhagavan dharmasthānam

bhagavānāha - katamaṁ bhaiṣajyasena dharmasthānaṁ|

āha| dharma ucyate bhagavannārabdhavīryatā| ārabdhaśīlatā| śīlasamanvāgamatā dharmanidhānamityucyate| idaṁ bhagavan dharmanidhānaṁ saṁbhavati|

bhagavān āha - sādhu sādhu bhaiṣajyasena yas(tvaṁ) tathāgatametamarthaṁ paripraṣṭavyaṁ manyase|

[193] āha| kena kāreṇana bhagavan tathāgatā loka utpadyante| bhagavān āha - ye bhaiṣajyasena bāhuśrutyasamanvāgamaṁ prajānanti| te tathāgatānāmutpādaṁ prajānanti| te tathāgatānāmutpādaṁ jñātvā idaṁ tathāgatānāmutpādasukhasthānaṁ prajānanti| yadā ca tathāgatā loka utpadyante tadā sattvā sarvadharmān prajānanti| upāyakuśalān dharmān prajānanti| laukikalokottarān dharmān prajānanti| laukikalokottarāṇi jñānāni prajānanti|

[194] āha jñānamevaṁ jñātvā katamaṁ nirvāṇaṁ prajānanti|

bhagavānāha - dharmameva bhaiṣajyasena prajānanti| dharmameva jñātvā (evameva) bhaiṣajyasena dharmasaṁgrahaṁ prajānatāṁ prathamo lābha utpadyate| yathāśrutaṁ gṛhya dhārmikameva lābho bhaviṣyati|

[195] tadyathāpi nāma bhaiṣajyasena kaścideva puruṣo vāṇijako bhavet sa lābhahetorgacchan parakyasvakasya suvarṇasya puruṣabhārasahasraṁ gṛhītvā gacchet

tasya gacchatastau mātāpitarāvevamāhutuḥ śṛṇu kulaputra idaṁ suvarṇasya puruṣabhārasahasraṁ gṛhītaṁ parakyasvakasya ca; ta tvayedaṁ suvarṇaṁ sugṛhītaṁ kartavyaṁ na ca kiṁcidato vināśayitavyaṁ mahālābhaṁ kṛtvā suvarṇaṁ eva sugṛhītaṁ kuru tadasmākaṁ mahālābho bhaviṣyati| sukhaṁ ca jīviṣyāmaḥ

sa ca putrastau mātāpitarāvevaṁ vadedevaṁ kariṣyāmi| ityuktvā

sa vāṇijakaḥ suvarṇaṁ gṛhītvā gacchedatha sa vāṇijakaḥ pramādādyāvan māsamātreṇa sarvaṁ suvarṇaṁ vināśayedvilayaṁ kuryāt

[196] atha sa puruṣaḥ paramacintāmāpannaḥ śokaśalyenāviddhahṛdayaḥ sahrīravatrāpyena ca svagṛhaṁ na paraviśeta;

tasya tau mātāpitarau śṛṇuyātāṁ evaṁ yuvābhyāṁ putreṇa tat suvarṇaṁ sarvaṁ vināśitamiti śrutvā nirāśībhūtau śokaśalyenābhyāhatahṛdayau vastrāṇi pāṭayataḥ śocataḥ krandataḥ evaṁ ca paridevataḥ duṣputro'smākaṁ gṛhe putrarūpeṇotpannaḥ sakalaṁ eva gṛhaṁ vināśītavān asmākamanāthaṁ kṛtvā dāsau karmakarau kṛtau;

tasya tau mātāpitarau cintāparigatahṛdayau nirāśau kālagatau tatastena putreṇa śrutaṁ matāpitarau me nirāśau kālagatau; so'pi putro nirāśa eva kālagataḥ

[197] evameva bhaiṣajyasena tathāgato'pyetamarthaṁ bhāṣate| ye sattvā mama śasane na prasīdanti te nirāśībhūtā maraṇakālasamaye śokaśalyābhyāhatahṛdayā mahādharmaratnabahiṣkṛtāḥ kālaṁ kurvanti| yathā tau mātāpitarau nirāśau śocataḥ paridevataḥ suvarṇahetoḥ śokaśalyābhyāhatahṛdayau parakyasvakena suvarṇena śokaśalyaparigatau cintāmāpadya kālagatauḥ

[198] evameva bhaiṣajyasena ye mama śasane na prasīdante paścān maraṇakālasamaye paritapyamānāḥ paridevanto duḥkhāṁ vedanāṁ vedayanti| pūrvakṛtāni ca puṇyāni paribhuktvā na bhūyo'nyāni puṇyāni kurvanti sukṣetragatāni| tatra teṣāṁ puṇyaparikṣīṇānāṁ śokaśalyaparigatahṛdayānāṁ tena kālena tena samayena narakatiryagyoniyamalokopapattiṁ ghorāṁ dāruṇān dṛṣṭvā maraṇakālasamaye evaṁ bhavati| ko me trātā bhavedyadahaṁ naraka (gati) tiryakpretayamalokaviṣayaṁ na paśyeyan na ca tāṁ duḥkhāṁ vedanāṁ vedayeyaṁ|

[199] tasyaivaṁ pralapataḥ paralokamākramataḥ tau mātāpitarāvevamāhataḥ kiṁ kariṣyāma putraka; gāthābhiścāddhyābhāṣataḥ

(54) grahītuṁ śakyate naiva vyādhirduḥkhaṁ mahābhayaṁ|

nāsti te maraṇaṁ putra glānasya maraṇādbhayaṁ|

(55) mokṣo bhaviṣyate tubhyaṁ vyādherhi bhayabhairavāt

dhṛtiṁ kuruṣva he putra tataḥ siddhirbhaviṣyati|

putra āha -

(56) niruddhyate me vijñānaṁ kāyo me pīḍyate bhṛśam

sarve aṅgāni duḥkhanti mṛtyuṁ paśyāmi ātmanaḥ

(57) na paśyataścakṣuṣī me karṇau me na śṛṇonti ca|

śrotraṁ punarna lapsyāmi na kāyaḥ saṁsahiṣyati|

(58) aṅgamaṁgāni duḥkhanti kāṣṭhā iva acetanāḥ

visvādayasi me amba nāgataṁ maraṇaṁ tava;

mātā āha -

(59) vaktuṁ nārhasi putraivaṁ mā me trāsaparāṁ kuru|

kāyaṁ tava jvarākrāntaṁ viprakārāṇi paśyasi|

putra āha -

(60) na paśyāmi jvaraṁ kāyerna ca vyādhirna duḥkhati|

paśyāmi maranaṁ ghoraṁ hataṁ kāyaṁ ca me bhṛśam

(61) paśyāmi ātmanā sarvaṁ kāyaṁ duḥkhaprapīḍitaṁ|

gacchāmi kasya śaraṇaṁ ko me trātā bhaviṣyati|

(62) mātāpitā vadet putra devakrodhaṁ hi te bhavet

devebhyo yajanaṁ kṛtvā tataḥ svastirbhaviṣyati|

putrā āha -

(63) kariṣyathā yūyameva yena svastirbhaven mama;

śīghraṁ śīghraṁ ca gatvā vai pṛcchathā devapālakam

[200] atha tasya tau mātāpitarau devakukaṁ gatvā devasya dhūpaṁ dāpayanti| atha sa devapālakaḥ devasya dhūpaṁ datvaivaṁ vācaṁ bhāṣate| devaste kruddhaḥ devasyopakāraḥ kartavyaḥ yajanaṁ kartavyaṁ| tatra paśurghātayitavyaḥ puruṣaśca ghātayitavyaḥ tataste putro vyādheḥ parimokṣyate|

atha tau mātāpitarau tasyām velāyāmevaṁ cintayataḥ kiṁ kariṣyāmo daridrāścāsma| yadi devo na parasīdiṣyati tadasmākaṁ putraḥ kālaṁ kariṣyati| atha vā prasādaṁ kuryāttadvayaṁ paramadaridrāḥ paśuṁ puruṣaṁ cānayāma|

[201] atha tau śīghraśīghraṁ svagṛhaṁ gatvā yatkiṁcidgṛhe pariṣkāraṁ saṁvidyate tatsarvaṁ vikrīya; paśukrayārthe gacchataḥ atha tāvadanyataraṁ puruṣaṁ evaṁ vadeyuḥ dehi bhoḥ puruṣaḥ suvarṇamasmākaṁ yācitaṁ yadi śaknumo daśame divase punarapi dātuṁ tacchobhanamatha na śaknumo dātuṁ tadvayaṁ tava dāsā bhaviṣyāmaḥ karmakarāḥ tau ca taṁ suvarṇaṁ gṛhītvā gaccheyuḥ paśuṁ puruṣaṁ krotuṁ|

[202] atha tābhyāṁ ca paśuḥ puruṣa krītaḥ sa ca puruṣo na jānīyādyan māmete jīvitādvyavaropayiṣyanti|

atha tau mātāpitarau saṁmohamāpannau na bhūyaḥ svagṛhaṁ praviṣṭau| tau devakulaṁ gatvā taṁ devapalakamāmantrayanti| śīghramidānīṁ yajanaṁ kuruṣva|

atha tau mātāpitarau svayameva taṁ paśuṁ ghātayataḥ taṁ ca puruṣaṁ jīvitādvyavaropayataḥ tataḥ sa devapālaka ārabdho yajñaṁ yajanāya medaṁ prajvālayati|

tataḥ sa devo'vatīrya evaṁ kathayati| tava putro mayā parigṛhītā iti|

tatastau mātāpitarau prītiprāmodyena sphuṭāvāhatuḥ varaṁ putro jīvatu vayaṁ dāsā bhaviṣyāmaḥ

tatastau mātāpitarau nivartya suyaṣṭāṁ devaṁ kṛtvā yāvat svagṛhaṁ gatvā tadā taṁ putraṁ kālagataṁ paśyanti| tatastau mātāpitarau mahatā duḥkhadaurmanasyena śokaśalyenāviddhahṛdayau nirāśībhūtau| tatraiva kālagatau|

evameva bhaiṣajyasenākalyāṇamitrasaṁsargatā draṣṭavyāḥ

[203] āha| pṛcchāmi (tāvad) bhagavan pṛcchāmi sugata;

āha| pṛccha bhaiṣajyasena|

āha| kutra bhagavan teṣāṁ sattvānāmupapattiḥ ko'bhisaṁparāyaḥ

āha| alaṁ bhaiṣajyasena kin tavānenārthena paripṛṣṭena|

āha| pṛcchāmi bhagavan pṛcchāmi sugata;

bhagavān āha| tatra bhaiṣajyasena mātā raurave mahānarake upapannā;

pitā saṁghāte mahānarake upapannaḥ putrastapane mahānarake upapannaḥ devapālako mahāvicau mahānarake upapannaḥ

[204] āha| anaparādhikasya bhagavan puruṣasya kutropapattiḥ ko'syābhisaṁparāyaḥ|

bhagavān āha - iha bhaiṣajyasenānaparādhikasya puruṣasya trāyastriṁśānan devanāṁ sahabhāvyatāyāmupapattirdraṣṭavyā;

āha| ko bhagavan hetuḥ kaḥ pratyayo yat sa puruṣastrāyastriṁśatā devānāṁ sahabhāvyatāyāmupapannaḥ

bhagavān āha - śṛṇu bhaiṣajyasena sa puruṣo maraṇakālasamaye jīvitādvyavaropyamāṇastathāgatasyopari cittaṁ prasādyaivaṁ vācamabhāṣataḥ namastasya bhagavate tathāgatasyārhataḥ samyaksaṁbuddhasyetyekavārākṛtaṁ| sa tena bhaiṣajyasena kuśalamūlena ṣaṣṭiḥ kalpān trāyastriṁśatāṁ devānāṁ sukhamanubhaviṣyati| aśītiḥ kalpāṁ jātyā jātismaro bhaviṣyati| jātau jātau ca sarvaśokavigato bhaviṣyati| jātamātraśca sarvaduḥkhāni nirvāpayiṣyati| na hi te sarvasattvā śakyaṁ parinirvāpayitum

[205] evamukte bhaiṣajyaseno bodhisattvo mahāsattvo bhagavantametadavocat - kathaṁ bhagavan na śakyaṁ sarvasattvāḥ parinirvāpayitum bhagavān āha - vīryaṁ bhaiṣajyasenārabdhavyam

āha| katamo bhagavan vīryāraṁbhaḥ

bhagavān āha| śṛṇu bhaiṣajyasena vīryamucyate phalānāṁ darśanaṁ| yaduta srotaāpattiphalaṁ nāma vīryasthānaṁ| sakṛdāgāmiphalaṁ nāma vīryasthānaṁ| anāgāmiphalaṁ nāma vīryasthānaṁ| arhatvaphalamarhannirodhaśca nāma vīryasthānaṁ| pratyekabuddhaphalaṁ pratyekabuddhaphalajñānaṁ nāma vīryasthānaṁ| bodhisattvabhūmiphalaṁ ca bodhisthānaṁ vīryasthānaṁ nāma| ime bhaiṣajyasena vīryasthānānāṁ nāmāni|

[206] āha| kathaṁ bhagavan srotaāpanno darśayitavyaḥ srotaāpattiphalañca|

bhagavān āha| tadyathāpi nāma kaścideva bhaiṣajyasena puruṣa vṛkṣaṁ vāpayeta| vāpitasya vṛkṣasya tatraiva divase aṅkuraṁ viruhyeta| yatraiva divase aṅkuraṁ viruhyanta tatraiva divase tadaṅkuraṁ yojanamadhastādgacchete;

dvitīyaśca puruṣa evameva vṛkṣaṁ vāpayeta; atha tatraivadivase vātakṣobhena tasya vṛkṣasya nāṅkurāni viruhyeranatha sa puruṣastasmāt sthānāt taṁ vṛkṣaṁ uddharetathānyataraśca puruṣaḥ kalahabhaṇḍanavigrahavivādaṁ kuryāt kimarthaṁ me bhūmiṁ khanasīti|

[207] tena ca kālena tena samayena rājā aśrauśīdevaṁ dvau puruṣau parasparakalahabhaṇḍanavigrahajātau vivadataḥ tena ca rājñā tayordūtaḥ preṣitaḥ gaccha bhoḥ puruṣa tau dvau puruṣāvānaya; evaṁ deveti sa puruṣastasya rājñaḥ pratiśrutya tvaramāṇarūpaḥ pradhātvā tau puruṣāvetadavocat - rājā yuvayorāmantrayati|

atha tāvadeva tatraiva puruṣa bhītastrasta dvitīyaśca puruṣo'bhīto'nutrastaḥ yena sa rājā tenopanītāvupanīya rājña purataḥ sthāpitāvatha sa rājā tayorevamāha| kimidaṁ bho yuvayoḥ kalahabhaṇḍanavigrahavivādo jātaḥ

[208] atha khalu tau dvau puruṣāvutthāya taṁ rājānametadavocatāṁ śṛṇu mahārājāsmākaṁ na kiṁcit pṛthivīpradeśaḥ saṁvidyate| yācitake pṛthivīpradeśe vṛkṣo vāpitaḥ tatraiva divase vāpitastatraiva divase'ṅkuraṁ patrāṇi puṣpāṇi phalāṇi ca prādurbhūtāni āmārdhaṁ pakvārdhaṁ ca| etena ca dvitīyena puruṣeṇa tatraiva divase tasmin pṛthivīpradeśe vṛkṣo vāpita| tasya ca vṛkṣasya nāṁkurāṇi rohanti| vātena kṣubhitena na patrāṇi na puṣpāṇi na phalāni prādurbhūtāni| na ca mahārāja yojanamadhastādasya mūlaṁ gacchati| sa eṣa puruṣo mayā sārdhaṁ vivadati tavāparādha iti| api (tu) ca deva svayameva parīkṣya jānīyān nātra mama kiṁcidaparādhaḥ saṁvidyate|

[209] atha khalu sa rājā triṁśatkoṭyo'mātyānāmāhūyaikadhye'saṁpātyaivamāha| kathayatha yūyaṁ|

āmātyā āhuḥ kiṁ kathayāma mahārāja

rājāha| kva yuṣmābhi dṛṣṭaṁ vā śrutaṁ vā yatraiva divase vṛkṣo vāpitastatraiva divase'ṅkuraṁ viruhyate| patrāṇi puṣpāni phalāni ca jāyante| pakvardha-m-āmārdhāni niścayamidaṁ bhavadbhiḥ kartavyaṁ| atha khalu te amātya utthāyāsanāt taṁ rājānamevamāhuḥ asmākaṁ mahārāja niścayamidaṁ na śobhate kartuṁ na ca śakṣyāmo'sya niścayaṁ vaktuṁ| vismayamidaṁ mahārāja eṣa eva puruṣastāvatpraṣṭavyaḥ vada bhoḥ puruṣa kiṁ satyametamarthaṁ yadvadasi|

āha| satyaṁ mahārājaitamarthaṁ|

rājāha|

(64) na śrutaṁ naiva ca puṣyāma duḥśrāddheyaṁ vacastava|

vṛkṣo yatra dine vuptastatraivāṅkurito dine|

(65) patrāḥ puṣpaṁ phalaṁ dattaṁ dine tatraiva bhāṣasi|

kṛtāṁjāliḥ sa puruṣastaṁ rājānamathāvravīt

(66ab) gaccha svayam vāpaya taruṁ paśya ruhyati aṅkuram||

[210] atha khalu sa rājā tṛṁśatkoṭibhiramātyaiḥ sārdhaṁ bahirniṣkrāmati| tau ca dvau puruṣau cārakāvarodhaṁ kārayati| tataḥ sa rājā svayameva vṛkṣaṁ vāpayati| na ca sa vṛkṣo aṅkurāṇi dadāti na patrāṇi na puṣpāṇi na phalāni|

atha sa rājā ruṣṭa evamāha| gacchantu bhavantaḥ śīghramānayantu dārupāṭakāni kuṭhārāṇi| yāvadānayitvā yastena puruṣeṇa vāpito vṛkṣaḥ sapatrāṇi puṣpaphalaḥ prādurbhūtaḥ taṁ vṛkṣaṁ roṣācchedayati|

[211] taṁ caikaṁ vṛkṣaṁ cchinnaṁ dvādaśa vṛkṣāḥ prādurbhūtāḥ dvādaśa vṛkṣā cchinnāścaturviṁśati vṛkṣāḥ prādurbhūtāḥ saptaratnamayāḥ samūlāḥ sapatrāḥ sapahalāḥ sāṁkurāḥ

atha tebhyāścaturviṁśati vṛkṣebhyaścaturviṁśati pakṣiṇaḥ kurkuṭāḥ prādurbhūtāni| suvarṇacūḍāni suvarṇatuṇḍāni saptaratnamayāni pakṣmāṇi|

atha khalu sa rājā roṣābhibhūtaḥ svahastena kuṭhāraṁ gṛhya taṁ vṛkṣaṁ parāhanati| tataśca vṛkṣātparāhatādamṛtodakaṁ pravahati|

[212] atha (khalu) sa rājā saṁvignamanā ājñāpayati| gacchatha tau puruṣau tataścārakābandhanān mocayadhvamevam deveti|

tatkṣanameva pradhāvitvā tau puruṣau tataścārakabandhanān mokṣayitvā yena taṁ vṛkṣaṁ tenopanīyataḥ

atha sa rājā papriccha| kim ayaṁ vṛkṣastvadvāpitaḥ eko bhūtvā cchidyamāno dviguṇaviddhyābhvardhamānaḥ yāvaccaturviṁśatudhā gataḥ madvāpitastu vṛkṣo nāṁkurāṇi na patrāṇi na puṣpāṇi na phalāni dattavān

tataḥ sa puruṣa evamāha| yādṛśāni mahārāja mama puṇyāṇi na tava tādṛśāni puṇyāni saṁvidyante|

[213] atha khalu te triṁśadamātyakoṭyastasya puruṣasyobhau jānumaṇḍalau pṛthivyāṁ pratiṣṭhāpyaivamāhuḥ tvayā rājyaṁ kārayitavyaṁ nāyaṁ pūrvimako rājā śobhate| atha (khalu) sa puruṣastān amātyān gāthābhiḥ pratyabhāṣata;||

(66cd) rājyabhogaiśca me nārtho na dhānyena dhanena vā|

(67) prasādo mama buddhebhyo bhaveyaṁ dvipadottamaḥ||

brajennirvāṇadhātau hi śānte yatra tathāgataḥ

(68) deśeya dharmaṁ yuṣmākaṁ nirvāṇapuragāminaṁ||

paryaṁkamabandhitvā pratijñāṁ akarottataḥ

(69) pūrvaṁ mayā kṛtaṁ pāpaṁ rājño bandhanamāgataḥ

idan tu kṛtvā praṇidhiṁ mama pāpakṣayo bhavet||

[214] atha khalu te caturviṁśati pakṣiṇakukkuṭakoṭyo vajratuṇḍena tūryāṇi parāhanati sma||

atha khalu tena kālena tena samayena dvātriṁśati kūṭāgārasahasrāṇi prādurbhūtāni| ekaikaṁ ca kūṭāgāraṁ paṁcaviṁśatiyojanapramāṇaṁ prādurabhavat ekaikasmiṁśca kūṭāgāre paṁcaviṁśati pakṣiṇakukkuṭāḥ prādurbhūtāni| suvarṇacūḍāni suvarṇatuṇḍāni suvarṇamukhāni| te mānuṣyakaṁ vācaṁ niścārayanti|

(70) asādhuste mahārāja yadbṛkṣa ccheditastvayā|

koṭīśatāni vṛkṣāṇāṁ caturviṁśat sthitāḥ punaḥ

(71) pāpena karmaṇānena aniṣṭhaṁ bhokṣyase phalam

[[na]] jānīṣe kīdṛśaḥ sattvo yenāyaṁ vāpito drumaḥ

rājāha -

(72) na jānāmi imaṁ arthaṁ vyakurudhavaṁ mahātapā|

kīdṛśo'sau mahāsattvo yenāyaṁ vāpito drumaḥ

pakṣiṇa āhuḥ

(73) eṣo hi lokapradyoto utpatsyati vināyakaḥ

mocakaḥ sarvasattvānāṁ saṁsārabhavabandhanāt||

rājāha -

(74) katamo dvitīyaḥ sattvo yasya vṛkṣaṁ na rūhati|

kiṁ vā karma kṛtaṁ tena pāpamācakṣva me dvijāḥ

pakṣiṇa āhuḥ

(75) devadatto hi mūḍho'sau yasya vṛkṣaṁ na rūhati|

na kṛtaṁ kuśalaṁ kiṁcid ruhyate sya kathaṁ druma||

[214] atha khalu tena kālena tena samayena tṛṁśatkoṭya āmātyānāmiman dharmaparyāyaṁ śrutvā sarve daśabhūmipratiṣṭhitā bodhisattvā abhijñāpratilabdhāḥ saṁvṛttāḥ sa ca rājā daśabhūmipratiṣṭhitaḥ kuśaladharmābhisamayamanuprāptaḥ||

[215] atha khalu bhaiṣajyaseno bodhisattvo mahāsattvo bhagavantametadavocat - ko bhagavan hetuḥ kaḥ pratyayo yattriṁśatkoṭyo janānāṁ daśabhūmipratiṣṭhitā abhijñāpratilabdhā saṁvṛttāḥ

bhagavān āha - śṛṇu bhaiṣajyasena vyākariṣyāmi|

atha khalu bhagavāṁstasyāṁ velāyāṁ smitaṁ prāduṣcakāra; atha tāvadeva tasmin samaye bhagavato mukhadvārāccaturaśīti raśmiśatasahasrāṇi naścaranti smānekavarṇāni nānāvarṇānyanekaśatasahasravarṇāni| tadyathā nīlapītalohitāvadātamaṁjiṣṭhāsphaṭikarajatavarṇāni| tā anantāparyantāni lokadhātavo'vabhāsya punareva pratyudāvṛtyā (taṁ) bhagavantaṁ tṛṣpradakṣiṇīkṛtya bhagavato mūrdhanyantardhīyanta;

[216] atha khalu bhaiṣajyaseno bodhisattvo mahāsattvaḥ utthāyāsanādekāṁsaṁ cīvaraṁ prāvṛtya dakṣiṇaṁ jānumaṇḍalaṁ pṛthivyāṁ pratiṣṭhāpya yena bhagavāṁstenāṁjaliṁ praṇamayya bhagavantametadavocat - ko bhagavan hetuḥ kaḥ pratyayaḥ smitasya prāduṣkaraṇāyaḥ nāhetukaṁ nāpratyayaṁ tathāgatā arhantaḥ samyaksaṁbuddhāḥ smitaṁ prāduṣkurvanti|

bhagavān āha - paśyasi tvaṁ bhaiṣajyasena caturdiśaṁ lokadhātau samantājjanakāyamāgacchantaṁ mamāntike|

āha| nohīdaṁ bhagavan na paśyāmi|

bhagavān āha - tena hi bhaiṣajyasena vyavalokaya paśya janakāyaṁ

[217] atha khalu bhaiṣajyaseno bodhisattvo mahāsattvo vyavalokyādrākṣīt pūrvasyān diśyeko vṛkṣaḥ prādurbhūtaḥ saptayojanasahasrapramāṇaḥ tatraikānte paṁcaviṁśati koṭīsahasrāṇi janakāyasya sannipatitāni| te ca na bhāṣante na jalpanti nālapanti na saṁlapanti na bhuṁjanti nottiṣṭhanti na caṁkramanti tūṣṇīṁbhāvenādhivāsayanti|

dakṣiṇasyān diśi-m-eko vṛkṣaḥ prādurbhūtaḥ saptayojanasahasrapramāṇaḥ tatra paṁcaviṁśati koṭīsahasrāṇi janakāyasya sannipatitāni| te na jalpanti nālapanti na saṁlapanti| na bhāṣante nottiṣṭhanti na caṁkramanti| tūṣṇīṁbhāvenādhivāsyanti|

paścimāyāṁ diśyeko vṛkṣaḥ prādurbhūtaḥ saptayojanasahasrapramāṇaḥ tatra paṁcaviṁśati koṭīsahasrāṇi janakāyasya sannipatitāni| te na jalpanti nālapanti na saṁlapanti| na bhāṣanti nottiṣṭhanti na caṁkramanti| tūṣṇīṁbhāvenādhivāsayanti|

uttarasyān diśi-m-eko vṛkṣaḥ prādurbhūtaḥ saptayojanasahasrapramāṇaḥ tatra paṁcaviṁśati koṭīsahasrāṇi janakāyasya sannipatitāni| te na jalpanti nālapanti na saṁlapanti na bhāṣanti nottiṣṭhanti| na caṁkramanti tūṣṇīṁbhāvenādhivāsayanti|

ūrdhvāyān diśyeko vṛkṣaḥ prādurbhūtaḥ saptayojanasahasrapramāṇaḥ tatra paṁcaviṁśati koṭīsahasrāṇi janakāyasya sannipatitāni| te na jalpanti nālapanti na saṁlapanti na bhāṣanti| nottiṣṭhanti na caṁkramanti| tūṣṇīṁbhāvenādhivāsyanti|

adhastāddiśyeko vṛkṣo prādurbhūtaḥ saptayojanasahasrapramāṇaḥ tatra ca paṁcaviṁśati koṭīsahasrāṇi janakāyasya sannipatitāni| te na jalpanti nālapanti na saṁlapanti na bhāṣanti nottiṣṭhānti| na caṁkramanti| tūṣṇībhāvenādhivāsayanti||

[218] atha khalu bhaiṣajyaseno bodhisattvo mahāsattvo bhagavantametadavocat - pṛccheyamahaṁ bhagavantaṁ tathāgatamarhantaṁ samyaksaṁbuddhaṁ kaṁcideva pradeśaṁ sacenme bhagavān avakāśaṁ kuryāt pṛṣṭaḥ praśnavyākaraṇāya|

evamukte bhagavān bhaiṣajyasenaṁ bodhisattvaṁ mahāsattvametadavocat - pṛccha tvaṁ bhaiṣajyasena yadyadevākāṁkṣasyahan te tasya tasyaiva praśnasya paripṛṣṭasya vyākaraṇena cittamārādhayiṣye|

[219] evamukte bhaiṣajyaseno bodhisattvo mahāsattvo bhagavantametadavocat - kimetad bhagavaṁścaturdiśe lokadhātuṣu janakāyamāgatyāvasthito yāvadadhastā ūrdhvāyāṁ diśi paṁcāśat koṭyo janakāyamāgatyāvasthitaḥ te ca bhagavantaṁ nālapanti na saṁlapanti| na jalpanti na vadanti na bhāṣanti| nottiṣṭhanti na caṁkramanti| tūṣṇīṁbhāvenādhivāsayanti| ko bhagavan hetuḥ kaḥ pratyayaḥ bhagavān āha - gaccha tvaṁ bhaiṣajyasena svayameva tāṁstathāgatān paripṛcchā; yato lokadhātāvete janakāyā āgatā|

āha| kasya bhagavan ṛddhibalādhānena gacchāmi| tathāgatasyardhyānubhāvena uta svardhyā;

bhagavān āha - svakena bhaiṣajyasena ṛddhibalādhānena gaccha| punarapi tathāgatasyardhyānubhāvenāgaccha;

[220] atha khalu bhaiṣajyaseno bodhisattvo mahāsattvo bhagavantaṁ tṛguptaṁ pradakṣiṇīkṛtya tatraivāntardhitaḥ

atha khalvito lokadhātā ṣaṇnavati lokadhātukoṭīratikramya candrapradīpā nāma lokadhātuḥ tatra candrāvatikṣetro nāma tathāgato'rhan samyaksaṁbuddha etarhi tiṣṭhati dhṛyate yāpayati| aśītikoṭī bodhisattvamahāsattvasahasraparivṛtaḥ puraskṛto dharman deśayati sma| tām lokadhātuṁ bhaiṣajyaseno bodhisattvo'nuprāptaḥ

[221] atha khalu bhaiṣajyaseno bodhisattvo mahāsattvo yena bhagavāṁstenopasaṁkrānta upasaṁkramya tasya bhagavataścandrāvatikṣetrasya tathāgatasyārhataḥ samyaksaṁbuddhasya pādau śirasābhivandya purata sthitaḥ sthitvā yena sa bhagavāṁstenāṁjaliṁ praṇamya bhagavantametadavocat - āgato'smi bhagavan ṣaṇnavati lokadhātukoṭīsahasrāṇyatikramya bhagavataḥ śākyamunestathāgatasya buddhakṣetrāt sahāyā lokadhātoḥ na cāhaṁ bhagavaṁstāvanti sattvāni kvacit paśyāmi| yāvanti tatra dṛṣṭāni| ko bhagavan hetuḥ kaḥ pratyayo yat sahāyāṁ lokadhātau bhagavataḥ śākyamunestathāgatasya purato bahujanakāyaḥ sannipatito daśadigabhyāgatastatrasthaḥ paśyāmyāsīttāni cehastho na paśyāmi|

[222] sa bhagavān āha - tatraiva bhaiṣajyasena saṁcaranti saṁtiṣṭhanti| āha| yathā kathaṁ punarbhagavan

bhagavān āha - acetanavṛkṣasaṁbhūtāni sattvāni|

āha| kena bhagavan dṛṣṭaṁ kena śrutaṁ yad acetane vṛkṣe manuṣyā jāyante|

sa bhagavān āha - na bhaiṣajyasena tvayā dṛṣṭaṁ (vā) na śrutaṁ (vā) yadacetane vṛkṣe manuṣyā jāyaṁte|

āha| na me bhagavan dṛṣṭaṁ na śrutaṁ yadacetane vṛkṣe manuṣyā jāyante|

sa bhagavān āha - icchasi tvaṁ bhaiṣajyasena draṣṭuṁ tadahaṁ sāṁprataṁ darśayiṣyāmi|

āha| icchāmi bhagavannicchāmi sugata;

[223] atha khalu bhagavāṁścandrāvatikṣetrastathāgatastasyāṁ velāyāṁ śatapuṇyavicitritaṁ svaṁ bāhuṁ prasārayati sma| tataśca bāhutaḥ koṭīśatasahasraṁ janakāyānāṁ prādurabhavatekaikaśca janakāyo bāhuśataṁ prasārya nānāgandhavilepanaistathāgatamabhyavakiranti|

atha sa bhagavāṁścandrāvatikṣetrastathāgato bhaiṣajyasenaṁ bodhisattvaṁ mahāsattvamāmantrayati| paśyasi tvaṁ bhaiṣajyasena eṣa janakāyastathāgataṁ nānāgandhamālyavilepanairabhyavakiranti|

āha| paśyāmi bhagavan paśyāmi sugata ;

sa bhagavān āha - ete acetanā janakāyāḥ prādurbhūtāḥ eta acetanā manuṣyāḥ pratyājātāḥ||

atha khalu teṣāṁ koṭīśatasahasrāṇāmekaikasya yadbāhuśataṁ te sarve vikīryante|

[224] atha khalu bhaiṣajyaseno bodhisattvo mahāsattvastaṁ dṛṣṭvā bhagavantametadavocat - kimidaṁ bhagavan kimidaṁ sugataḥ yan manuṣyāṇāṁ muhūrtamātreṇa bāhuśataṁ vikīrṇam yadi bhagavaṁcchatabāhavo na mucyante kaḥ punarvādo dvibāhukā manuṣyā mokṣyante|

bhagavān āha - evameva bhaiṣajyasenācetanāḥ sattvā jāyante| acetanā niruddhyante| asmākamapi bhaiṣajyasena śarīramacetanabhūtaṁ manyitavyaṁ|

āha| katame bhagavan sattvā ye daharāḥ katame vṛddhāḥ

bhagavān āha - santi bhaiṣajyasena daharāḥ sattvā santi vṛddhāḥ

āha| katame bhagavan daharā katame vṛddhāḥ

āha| ye te sāmprataṁvikīrṇā te vṛddhāḥ ye te vṛkṣebhyo nirjātāste daharā|

āha| icchāmi bhagavan daharāṇi sattvāni draṣṭum

[225] atha khalu sa bhagavāṁścandrāvatikṣetrastathāgato dakṣiṇaṁ pāṇitalaṁ prasārayati| atha daśabhyo digbhyaḥ koṭīśatasahasraṁ janakāyānāṁ āgacchanti| adhastādūrdhvāyān diśi paṁcāśat koṭī janakāyasyāgacchanti| āgatvā ca te janakāyā bhagavataḥ pādau śirasābhivandya na ca tathāgatamālapanti na saṁlapanti tūṣṇīṁbhāvenādhivāsayanti sma|

[226] atha khalu bhaiṣajyaseno bodhisattvo mahāsattvo bhagavantametadavocat - kimete bhagavan sattvāstathāgataṁ nālapanti na saṁlapanti tūṣṇīṁbhāvenādhivāsayanti|

bhagavān āha - na jānāsi bhaiṣajyasena acetanaḥ pṛthivīpradeśo nālapanti na saṁlapanti| (na) dharmaskandhaṁ prajānāti| tatkasya hetoḥ ihaikatyā bhaiṣajyasena daharā sattvāḥ notpādaṁ jānanti na nirodhaṁ jānanti| dṛṣṭvā ca na jarā na vyādhirna śoko na paridevaḥ na priyaviprayogo nāpriyasaṁprayogaḥ na priyādvinābhāvaḥ na maraṇaṁ nākālamṛtyu| nāpi tāni sarvakaṭukāni duḥkhāṇi dṛṣṭvā udyogamāpadyante kutaste jñāsyanti| punaḥ punaste bhaiṣajyasena śikṣayitavyāni|

[227] atha khalu bhaiṣajyaseno bodhisattvo mahāsattvo bhagavantametadavocat - kuto bhagavan daharā sattvā āgacchanti| kutaścyavanti| kutropapadyante| ye dharmaṁ na jānanti (na buddhyanti)|

bhagavān āha - śṛṇu bhaiṣajyasena yan mānuṣyakamātmabhāvaṁ pratigṛhṇanti| tanna rupyakāreṇa kṛtaṁ| na cīmarakāreṇa kṛtaṁ| na kāṣṭhakāreṇa kṛtaṁ| na kulālena kṛtaṁ| na rājabhayenotpadyate| strīpuruṣasaṁyogāt pāpena karmaṇā saṁyuktaṁ saṁbhavati| punaḥ punaśca teṣāṁ sattvānāṁ śilpāni śikṣāpayanti| anantaṁ ca teṣāṁ kaṭukaṁ duḥkhaṁ saṁbhavati| kaṭukā vedanāḥ tatra teṣāṁ pūrvakṛtānāṁ pāpakānāṁ karmaṇāṁ vipākamanubhavanti|

ihaiva te bhaiṣajyasena daharāḥ sattvā āgatā ya ete (nālapanti na saṁlapanti) nottiṣṭhanti ya īdṛśān duḥkhāṁ vedanāmanubhavanti| anena kāraṇena bhaiṣajyasena nālapanti na saṁlapanti| evaṁ te bhaiṣajyasena daharāḥ sattvāḥ kuśalamajānānāḥ notpādaṁ jānanti na nirodhaṁ jānanti| na ca te mānuṣyakamātmabhāvaṁ pratilapsyante| ime ucyante bhaiṣajyasena daharāḥ sattvā|

[228] āha| kathaṁ bhagavan daharāḥ sattvā utpadyante kathaṁ nirudhyante|

bhagavān āha - tadyathāpi nāma bhaiṣajyasena kaścideva puruṣa agniṁ kāṣṭhena parimārjayetta tasyānupūrveṇa taṁ kāṣṭhamagninā pradīpyeta| evameva bhaiṣajyasena mānuṣyātmabhāvaṁ prathamaṁ saṁjāyate| jātaṁ ca san vedanāṁ vedayati|

āha| ko trābhijāto jātaḥ kaḥ parinirvṛtaḥ

bhagavān āha - buddha eva bhaiṣajyasenābhijāto jātaḥ tathāgata eva parinirvṛtaḥ

[229] tadyathāpi nāma bhaiṣajyasena kasmiṁcidandhakāragṛhe timirāgāre rājñā puruṣo bandhanāvarodhaḥ kṛtaḥ syāt tatra sa puruṣo'ndhakāragṛhe praviṣṭaḥ antargṛhe timiraṁ timirāgāraṁ paśyet athānyaḥ ka kaścit puruṣaḥ pūrvaduḥkhavedanābhirdṛṣṭaścintayennaṣṭa eṣa puruṣaḥ anabhyasitaḥ duḥkho jīvite vināśaṁ yāsyati| sa tatrāgnimānayitvā tatrābhyantargṛhe sukṣmamagnim cchorayet

sa ca puruṣaścārakāvaruddhastamagniraśmiṁ paśyeddṛṣṭvā cāśvasto bhaved utsāhaṁ ca vardhayet sa cāgniḥ kenacideva hetunā prajvaleta; tena cāgninjvālena tadgṛhaṁ samantataḥ prajvalet sa ca puruṣastatraiva dahyet taṁ ca dagdhaṁ rājā śrutvā cintāyāsamāpadyeta| tasyaivaṁ bhavenna bhūyo'haṁ svaviṣaye kaṁcit sattvaṁ cārakāvarodhaṁ kariṣyāmi|

atha sa rājā teṣāṁ svaviṣayanivāsināṁ sattvānāmevaṁ samāśvāsayet mā yūyaṁ bhavantaḥ sattvā bhāyatha mā utrasatha; abhayaṁ yuṣmākaṁ bhavatuḥ na mama viṣaye bhūyo daṇḍopacāraṁ (vā) bandhanāvarodhaṁ vā bhaviṣyati| na ca kasyacit sattvasya jīvitavināśaṁ kariṣyāmi| nirbhayā bhavantaḥ sattvā yūyaṁ bhavatha|

[230] evameva bhaiṣajyasena tathāgataḥ sarvakleśadagdhaḥ sarvavyādhipraśāntaḥ yathā sa puruṣo gṛhadāhāt svakāyaṁ dahati| (sarva)sattvānāmarthāya hitāya sukhāya (ca) pratipanno bhavati| sattvān vadhabandhanāvarodheṣu parimocayedevameva tathāgato rāgadveṣamohamalaprahīṇaḥ sarvasattvānān dīpa iva loka utpannaḥ sattvān mocayati narakatiryakpretāsurakāyebhyaḥ daharāṁśca (sattvāṁ) vṛddhāṁśca sattvān mocayati|

[231] atha tāvadevoparyantarīkṣādimā gāthā niścacārā;||

(76) aho kṣetraṁ jinakṣetraṁ sukṣtremabhisaṁskṛtaṁ|

vuptāni yatra bījāni na vināśaṁ brajanti hi|

(77) buddhakṣetraṁ jinakṣetraṁ praśastaṁ jinaśāsanaṁ|

śāstā karotyupāyaṁ hi sarvasattvaparigrahe|

(78) sthito nirvānadhātau san dṛśyate dharaṇītale|

śāntaṁ kṛtvā sarvalokaṁ buddhaḥ śodheti dakṣiṇāṁ|

(79) moceti navakān sattvān moceti ca purāṇakān

mocayitvānupūrveṇa sarvasattvāstridhātukāt

(80) baddhā hi narakadvārastiryakpretā vimocitāḥ

śāntiḥ kṛtā hi lokesmin paraloke sukhaṁ kṛtaṁ||

[232] atha khalu bhagavāṁstasyāṁ velāyāṁ smitaṁ prāduṣcakāra| āha ca -

(81) sādhu darśanu sādhūnāṁ buddhānām sādhu darśanaṁ|

sādhu dharmaguṇaḥ kṣetraṁ saṁghasāmagridarśanam

(82) sādhu saṁghātanirdeśaṁ sarvapāpavināśanaṁ

ye śroṣyanti idaṁ sūtraṁ padaṁ prāpsyantyanuttaraṁ

[233] atha khalu bhaiṣajyaseno bodhisattvo mahāsattvo yena bhagavāṁstenāṁjaliṁ praṇamayya bhagavantametadavocat - ko bhagavan hetuḥ kaḥ pratyayaḥ smitasya prāduṣkaraṇāya|

bhagavān āha - paśyasi tvaṁ kulaputraitāni daharāṇi sattvāni|

āha| paśyāmi bhagavan paśyāmi sugata;

bhagavān āha - sarva ete bhaiṣajyasenādyaiva daśabhūmipratiṣṭhitā bodhisattvā bhaviṣyanti||

[234] atha khalu bhaiṣajyaseno bodhisattvo mahāsattvo'śītiryojanasahasrāṇyūrdhavamuparyantarīkṣe sthādathāśītirdevaputrakoṭīsahasrāṇi bhagavata upari puṣpavarṣaṁ pravarṣanti te ca daharāḥ sattvā dṛṣṭvā sarve'ñjalayaḥ kṛtvā namaskurvanti|

[235] atha khalu bhaiṣajyaseno bodhisattvo mahāsattvo antarīkṣastha evaṁ vāg bhāṣate| yena trisāhasramahāsāhasro lokadhātuḥ śabdenāpūrayati| dvātriṁśan mahānarakopapannāḥ sattvāstaṁ śabdaṁ śṛṇvanti| dvātriṁśacca devanikāyāstaṁ śabdaṁ śṛṇvanti| trisāhasramahāsāhasraśca lokadhātuḥ ṣaḍvikāraṁ prakampitaḥ caturaśītiśca nāgarājasahasrāṇi mahāsamudre saṁkṣubdāni| triṁśat koṭīsahasrāṇi rākṣasānām imaṁ jaṁbūdvīpamāgatāni| paṁcaviṁśat koṭīsahasrāṇi pretānāṁ yakṣānāṁ rākṣasānāmaḍakavatyāṁ rājadhānyāmāgatāni bhagavataḥ purato mahāsannipātaḥ saṁsthitaḥ||

[236] atha khalu bhagavāṁsteṣān daharāṇāṁ sattvānān dharman deśayati| daśasu dikṣu lokadhātukoṭīniyutaśatasahasreṣu bodhisattvā mahāsattvāḥ svakasvakābhyo ṛddhibhirāgatāni|

atha khalu bhaiṣajyaseno bodhisattvo mahāsattvo yena bhagavāṁstenāṁjaliṁ praṇamayya bhagavantametadavocat - bahavo bhagavan bahavo sugata bodhisattvāḥ sannipatitāḥ sanniṣaṇṇāḥ bahūni ca bhagavan devanāgāni sannipatitāni sanniṣaṇṇāni| punaścānekāni rākṣasapretānyaḍakavatyāṁ rājadhānyamāgatya sannipatitāni sanniṣaṇṇānyabhūvan dharmaśravaṇāya||

[237] tatra khalu bhagavān bhaiṣajyasenaṁ bodhisattvaṁ mahāsattvamāmantrayati| āgaccha kulaputra;

atha khalu bhaiṣajyaseno bodhisattvo mahāsattvo ṛddhibalenordhvādavatīrya yena bhagavāṁstenāṁjaliṁ praṇamayya bhagavantametadavocat - dharmaskandho (bhagavan) dharmaskandha iti| bhagavannucyate kiyatā bhagavan dharmaskandha ityucyate|

bhagavān āha - dharmaskandha iti kulaputrocyate| yo brahmacaryaṁ paryeṣate brahmacaryaṁ paryeṣya sarvapāpādviramati| paśyasi tvaṁ kulaputrāmī daharā sattvā abrahmacaryād viramanti|

āha paśyāmi bhagavan paśyāmi sugata;

āha| te nūnan dhāraṇīpratilabdhā bhaviṣyanti| sarvadharmasamanvāgatāśca bhaviṣyanti|

āha| kenopāyena bhagavan bahūni sattvāni sannipatitāni| dharmaskandhaṁ śrotum

[238] atha khalu bhagavāṁ bhaiṣajyasenaṁ bodhisattvaṁ mahāsattvamāmantrayati| bahavo bhaiṣajyasena sattvāḥ santi| ye jātireva duḥkhaṁ na śṛṇvanti| jarā eva duḥkhaṁ na śṛṇvanti| vyādhireva duḥkhaṁ na śṛṇvanti| śokaduḥkhaṁ paridevaduḥkhaṁ priyaviprayogaduḥkhamapriyasaṁprayogaduḥkhaṁ maraṇaṁ tu sarvaduḥkhaṁ harate| kāyajīvitamidamucyate bhaiṣajyasena sarvaduḥkham

[239] atha khalu te daharāḥ sattvā imannirdeśaṁ śrutvā yena bhagavāṁstenāṁjalayaḥ praṇamayya bhagavantametadavocan asmākamapi bhagavan marttavyaṁ|

bhagavān āha- yuṣmābhirapi kulaputrāḥ sarvasattvaiśca martavyamiti| āha| kathaṁ bhagavan maraṇakālamākramati|

bhagavān āha - maraṇakāle kulaputrāścarimavijñāne vijñānanirodho nāma vātaḥ vijñānavibhramo nāma vātaḥ vijñānasaṁkṣobhasaṁyukto nāma vātaḥ ime trayaḥ kulaputrā vātā maraṇakālasamaye carimavijñāne saṁluḍanti (saṁkṣubhanti) saṁkṣobhamutpādayanti|

ta āhu| katamāni bhagavan trīṇi maraṇakālasamaye vijñānanirodhe vartamāne śarīraṁ nirghātayanti|

bhagavān āha - śastrakaśca nāma mārṣāḥ sūcakaśca nāma mārṣāḥ ṣṭhīlakaśca nāma; ye śarīraṁ nirghātayaṁti|

āha| kimetadbhagavaṁccharīraṇ nāma;

bhagavān āha - ādīptakaśca nāma mārṣā dahanavāsakaśca nāma; meḍikaśca nāma; śṛṁgārikaśca nāma| śmaśānikaśca nāma; durbuddhikaśca nāma| bhāragurukaśca nāma; jātiparipīḍitaśca nāma; jātisaṁkṣubhitaśca nāma; jīvitaparibhāvikaśca nāma; maraṇapriyaviprayogakaśca nāma; ime mārṣā ucyante śarīranāmānaḥ

[240] ta āhu| kathaṁ bhagavan mṛyate kathaṁ jīvati|

bhagavān āha - vijñānaṁ nāmāyuṣmanto mriyate| puṇyaṁ nāmāyuṣmanto jīvati| śarīraṁ nāma mārṣā mṛyate snāyukoṭībhirbaddham caturaśītibhiḥ sirākūrvasahasrai romakūpairbaddham dvādaśabhiḥ sahasrairaṁgānāṁ baddhaṁ| ṣaṣṭyuttaraistribhiḥ śatairasthīnāṁ baddham caturaśītiḥ kṛmikulaśatānyabhyantare vasanti teṣāṁ sarveṣāṁ praṇakānāṁ maraṇaṁ saṁvidyate| maraṇanirodhaṁ ca saṁvidyate tatra sarve te prāṇakā nirāśā bhavanti| yadā sa puruṣo mṛyate tadā sarvaprāṇakānāṁ vātasaṁkṣobhaḥ saṁluḍati anyonyaparibhākṣanārthāya tadā te duḥkhāṁ vedanāṁ vedayanti| anye punaḥ putraśokaṁ kurvanti| anye duhitṛśokaṁ jñātṛśokaṁ sarve eva te śokaśalyaviddhāḥ anyonyabhakṣaṇamārabhante| sarve te anupūrveṇa parasparaṁ bhakṣayanta;

dvau prāṇakāvavatiṣṭhante| tau saptāhamabhiyudhyataḥ yāva saptāhe'tikrānte tata ekaḥ prāṇako nirmathyate| eko mucyate| tat katama āyuṣmanta ucyate dharmaḥ tatkiṁ manyadhve yathā sarvaprāṇakānāṁ anyonyanirodhena maraṇaṁ|

[241] evameva bālapṛthagjanā sattvā anyonyaviradhamāpdyante| te jātyā na bibhyanti| vyādhibhyo na bibhyanti| maraṇā na bibhyanti yathā (tau) dvau prāṇakau yudhyataḥ evameva bālapṛthagjanāḥ parasparaṁ yudhyante|

atha maraṇakālasamaye ucyate sādhu puruṣaiḥ kiṁ tvaṁ bho puruṣa viśvāsamāpadyase| kiṁ tvayā manuṣyaloke na kiṁcidādīnavaṁ dṛṣṭaṁ| na jātyā[d ā]dīnavo dṛṣṭaḥ na jarayā na vyādherādīnavo dṛṣṭa| na maraṇādādīnavo dṛṣṭa|

āha| dṛṣṭo me āyuṣmanta jātyā[d ā]dīnavo jarayā vyādherādīnavo dṛṣṭaḥ sarvapaścān maraṇādādīnavo dṛṣṭaḥ

āha| kathaṁ na kṛtāni yat karaṇīyāni kuśalamūlāni| tat kathaṁ tvayā bhoḥ puruṣa na kṛtamubhayorlokayo hitasaṁvartakāni dharmaskandhakuśalamūlāni| dvitīyaṁ mārṣāḥ pṛcchāmi| kathaṁ tvayā na kṛtaḥ kuśalamūlasaṁbhāraḥ yastvaṁ parimuktaḥ syājjātyā jarayā vyādhermaraṇāt tat kathaṁ te na kṛtaṁ yoniśomanasikārapratyavekṣaṇāṁ

kiṁ tvayā bhoḥ puruṣa śrutaṁ| pṛthivyāṁ gaṇḍyāṁ ākoṭanaśabdaṁ| na ca dṛṣṭā jāṁbudvīpakā manuṣyā dānāni dadantaḥ puṇyāni ca kurvantaḥ upavāsamupavasantaḥ tathāgatakṣetre kuśalamūlabījānyavaropayantaḥ gandhaṁ vā mālyaṁ vā dīpaṁ va na tvayā dṛṣṭaṁ khādanīyabhojanīyaṁ vā dīyamānam na ca te dṛṣṭāstathāgatasya catasraḥ parṣadaḥ santarpyamānāḥ bhikṣurvā bhikṣuṇī vā upāsako vā upāsikā vā imāṁścatasraḥ parṣadaḥ śāsane'bhinivustāḥ evaṁ tasya hitāni vadantyālapanti ca| na hi devakṛtaṁ kiṁcit asādhustvayā bhoḥ puruṣa kṛtam imimaṁ jaṁbudvīpamāgatya;

[242] tasya mṛtasya dharmarājā tasmin kāle taṁ puruṣaṁ anuśāsan tā gāthā bhāṣate -

(83) dṛṣṭvā tathāgatotpādaḥ śrutvā gaṇḍīparāhatām

śrutvā dharman deśayamānaṁ śantaṁ nirvāṇagāminaṁ|

(84) kasmāt te na kṛtaṁ puṇyaṁ paralokasukhāvaham

bhokṣyase narake duḥkham aniṣṭhakarmaṇaḥ phalam

[243] atha sa puruṣastaṁ dharmarājānaṁ gāthābhi pratyabhāṣata -

(85) bālabuddhirahaṁ āsīt pāpamitravaśānugaḥ

kṛtaṁ me pāpakaṁ karma kāmabhrāntena cetasā;

[86] kāmaśca me citastasya āgataṁ dāruṇaṁ phalam

kṛtā me prāṇināṁ hiṁsā sāṁghikaṁ ca vināśitaṁ|

[87] kṛtaṁ me stūpabhedaṁ ca praduṣṭenānatarātmanā;

dauṣṭhulyaṁ bhāṣitaṁ vākyaṁ mātā me paritāpitā;

[88] aparādhaṁ vijānāmi svaśarīreṇa yat kṛtaṁ

raurave narake paśyāmyupapattiṁ sudāruṇe|

[89] saṁghāte vedanāṁ vetsye tathaiva ca pratāpane|

mahāvīcau ca kaṭukāmanubhaviṣyāmi vedanāṁ

(90) mahāpadme ca narake krandayiṣyāmi suduḥkhitaḥ

vārā śataṁ kālasūtre utpatsyāmi mahābhaye

(91) hatāśca nārakā sattvāḥ punaḥ paśyanti te bhayam

yojanānāṁ śataṁ bhūyaḥ pratipadyanti mahābhayam

(92) dvāran te na labhiṣyanti punaḥ kuṁbhe pratāpitāḥ

kṣūraṁ tu nāma narakaṁ sahasraṁ kṣūrasaṁbhavam

(93) śatam sahasraṁ koṭīnāṁ kṣūrāṇāṁ jāyate grataḥ

taistasya bhidyante gātraṁ karmabhi duṣkṛtaiḥ svakaiḥ||

[94] vātakṣobhā mahāghorā sarvaṁ cchindanti tāṁ tanum

anubhāvyā mayā duḥkhā īdṛśā narake dhruvam

(95) drakṣyante sarvasattvā me kāyaṁ duḥkhaprapīḍitaṁ|

arthā parakyā ādattā mayā veśmasya kāraṇāt

(96) putrā duhitaro mahya bhrātā ca bhāginī tathā

mātā pitā caiva mama mitrajñātigaṇo'pi ca

(97) dāsakarmakarāścaiva gāvo bhṛtyaḥ paśuṁ tathā|

bhrānto smyahaṁ kukāryeṣu rupyasauvarṇabhājanaiḥ

(98) vastraistathā susūkṣmaiśca bhrāntaḥ kārāpane gṛhe

suvicitraṁ gṛhaṁ kṛtvā naranārīsamākulaṁ|

(99) vīṇāstūryāḥ parāhatya rataṁ me durdamaṁ manaḥ

gātraṁ gandhodakairliptaṁ kṛtajño'dyāpi naiva saḥ

(100) acetana śarīrastvaṁ bhrānto'smi tava kāraṇāt

na vidyā te mama trātā kaścit sattvaḥ punarbhavet

(101) vātakṣobhe mahāghore śarīraparitāpane|

bhuktā rasā svāduvanto jihvayā vividhāstathā

(102) śīrṣe mālāśca bahavo baddhā śvitrāḥ suśobhanāḥ

rūpeṇa bhrāmitaścakṣuścakṣutrāṇaṁ na vidyate|

(103) pāpānāṁ cakṣuṣī heturmayā dṛṣṭvātu yatkṛtam

śrotrau hetuśca me bhūyaḥ bāhū vajraparāhatāḥ

(104) hastebhyaḥ kaṭakā baddhā aṅgulīyebhi yaṁtrikā|

grīvāyāṁ muktihārāṇi pādau cāpi svalaṁkṛtau

(105) jālāni kṛtvā tatraiva sauvaraṇaṁ saṁsthitaṁ tataḥ

gātrai ca vividhā ratnā sauvarṇakaṭakāstathā|

(106) udārai ramito bhogairmanasaṁbṛhaṇairapi|

sparśaṁ ca sukumāraṁ me| tṛṣṇagrastena sevitaṁ|

(107) nānāstaraṇaśayyābhiḥ kāyaḥ krīḍāpito mayā;

snāto gandhodakairviśadairgandhaiścāpi pralepitaḥ

(108) karpūracandanairdivyairdhūpanaiścāpi dhūpitaḥ

kastūrikāsamāyukto vāso varṇakaraḥ kṛtaḥ

(109) gandhavārṣikatailena sumanācaṇpakādibhiḥ

makṣitaḥ pāṇḍuraṁ vastraṁ prāvṛtaṁ sūkṣmakāśikaṁ

(110) avatīrya hastipṛṣṭhādaśvapṛṣṭhe bhiruhya ca

rājāhamiti manyāmi jano me dhāvate grataḥ

(111) antaḥpuraṁ vijānāmi gīte nṛtye suśīkṣitaḥ

nirāparādhā mṛgayā hatā kāṇḍaiśca me mṛgā

(112) īdṛśaṁ me kṛtaṁ pāpaṁ paralokamajānatā;

paramāṁsā mayā bhuktāstato duḥkhamidaṁ mama;

(113) maraṇaṁ me na vijñātamāgamiṣyati dāruṇaṁ

bālabuddhirahaṁ āsīccharīraṁ poṣitaṁ mayā|

(114) āgataṁ maraṇaṁ me dya kaścittrātā na vidyate|

yūyaṁ hi jñātayaḥ sarve mukhaṁ me kiṁ nirīkṣatha|

(115) kasmād vastraṁ pāṭayadhvaṁ pralāpaiścāpi kiṁkṛte;

keśān kasmād vikiratha raktaṁ kiṁ vā kariṣyati

(116) pāṁsuṁ ca śīrṣe kṣipatha urastāḍaṁ karotha kim

jīvaṁ nāhaṁ vāritavyaḥ pāpāt kiṁ ruditena vaḥ

(117) śarīraṁ me vṛkabhojyaṁ kurkurāṇāṁ ca vāyasām

bhaviṣyate pakṣiṇāṁ ca vṛthā puṣṭaṁ ayan tanuḥ

(118) maraṇoragasaṁspṛṣṭo jāyate'pi sudāruṇaḥ

tathopayojyaṁ bhaiṣajyaṁ yathāsmān mucyate bhayāt

(119) yan me vaidyāḥ pradāsyanti bhaiṣajyaṁ na tadiṣyate

sāṁprataṁ dharmabhaiṣajyaṁ kleśoragavimocakam

(120) mṛyato mama dātavyaṁ mā memaṁ saṁprayacchatha|

poṣyamāṇaśarīro yamavaśyaṁ nāśameṣyati|

(121) pāpaskandhaṁ kimākṣipya yatpaścā duḥkhadāyakam

poṣito me pṛyaṁ kāyaḥ kṛtaghnatvaṁ kariṣyati|

(122) putrā duhitaraṁ kiṁ me cakṣuṣā sannirīkṣatha;

trāyadhvamasmād rogān me rudadhvaṁ kinnirarthakam

(123) yūyaṁ hi putra duhitṛ kṛtaghnā mama sāmpratam

yuṣmākaṁ poṣaṇārthāya parakīyaṁ mayā hṛtaṁ|

(124) sāprataṁ maraṇaṁ prāptaṁ nirāśaṁ mām karotha kim

jātidurgatisaṁtrasto maraṇena ca pīḍitaḥ

(125) vedanā saṁjñā saṁskārāḥ sparṣaṁ paramavedanāḥ

tṛṣṇāyā bhrāmyate bālaḥ prāpnoti kaṭukaṁ phalaṁ;

(126) śokabandhana mahya tu jātasya viṣame kule

alpapuṇyaṁ tu māṁ jñātvā śocayiṣyantyapare janāḥ

(127) dānaśīlaparibhraṣṭo dharmāccāpi parānmukhaḥ

punarbhavaṁ na jānīte kleśoragaviṣārditā

(128) bhrāmyate vidyayā bālo yatra mokṣaṁ na vidyate|

mokṣārthaṁ na vijānāti bhrāntaḥ pāpaṁ karoti ca

(129) kleśaiśca bhrāmyate bālo nityaṁ vyākṣiptamānasaḥ||

dahyate hyagninā dīptaḥ kāyo vividhabandhanaḥ

(130) vibhrānto bhramate kāyo yatra saukhyaṁ na vidyate|

tacca saukhyaṁ na jānāti yadabhyantasukhāvaham

(131) buddhānām sukhadaṁ kṣetraṁ dharmacakraṁ mahāgadam

śīlaṁ ca satyaṁ śīlanāṁ brahmaghoṣāstathāgatā||

[244] atha khalu bhagavān bhaiṣajyasenaṁ bodhisattvaṁ mahāsattvamāmantrayetadavocat - evaṁ ca bhaiṣajyasena sattvā maraṇakāle paridevanti| na na hi teṣāṁ kaścittrātā bhaviṣyatyanyatra sukṛtānāṁ karmāṇāṁ phalavipākaṁ ca gāthā cemā bhāṣate||

(132) kṛtvā tu pāpakaṁ karma narakeṣu patanti hi

bhuṁjante cīmaraṁ taptaṁ pīvante lohapānakam

(133) kāyebhyo varṣate'ṅgāraṁ dagdhāḥ krandanti dāruṇam

dahyatyeṣāṁ taccharīraṁ narakesmin mahābhaye|

(134) na vijānanti saukhyāni dharmaṁ ca na vijānate

bālo bhramatyadharmeṇa saukhyaṁ nāpnoti kiṁcana;

(135) śraddhāśīlena saṁpannaḥ prajñāyukto mahātapāḥ

mitraṁ bhajati kalyāṇaṁ śīghraṁ bhoti tathāgataḥ

(136) vīryamārabhate śreyaṁ buddhalokopapattaye

deśetha kuśalaṁ dharmaṁ sarvasattvaparigrahaṁ

(137) maitraṁ cittaṁ samāpanno brahmacaryaparāyaṇaḥ

śrutvaivaṁ bhaiṣajyasena pratipattiparo bhavet

(138) vimuktidarśanaṁ buddhaṁ guṣṭaśabdaṁ vināyakaṁ|

lokasya mātāpitaraṁ bodhicittaṁ taducyate|

(139) kalyāṇamitrāṁ paramāṁ suduṣkaraṁ yo deśayet

[[iha]] dharma loke śṛṇvanti ye gauravādbuddhaśāsanaṁ

te bhonti buddhāḥ sugatā narottamāḥ

(140) lokanāthā bhavantyete sarvasattvapramocakāḥ

śāntebhyo buddhakṣetrebhyo ye bhavanti sagauravāḥ||

(245) atha khalu bhaiṣajyaseno bodhisattvo mahāsattvo bhagavantametadavocat - kim idaṁ bhagavan pṛthivī kaṁpati saṁprakaṁpati| evamukte bhagavān bhaiṣajyasenaṁ bodhisattvaṁ mahāsattvametadavocat - vyavalokaya bhaiṣajyasena kiṁ paśyasi| vyavalokitaṁ bhaiṣajyasenena bodhisattvena mahāsattvena|

atha tāvadeva caturbhyo digbhyaḥ paśyati| pṛthivīvivaraṁ dadāti| pṛthivyā vivṛtāyāṁ paśyati| pṛthivīvivarebhyo viṁśati koṭyo manuṣyāṇāṁ jāyante| adhastāddiśi viṁśati koṭyo manuṣyānāṁ jāyante| ūrdhvāyāṁ diśāyāṁ paṁcaviṁśati koṭyo manuṣyānāṁ jāyante|

[246] atha te daharāḥ sattvā vyavalokya bhagavantametadavocan katame bhagavanniha jātā|

bhagavān āha - paśyatha yūyamime janakāyāḥ

ta āhuḥ paśyāmo bhagavan

bhagavān āha - ime janakāyā yuṣmākaṁ sakhāyā jātāḥ

ta āhuḥ eteṣāmapi bhagavan sattvānāṁ maraṇaṁ bhaviṣyatīti;

bhagavān āha - evametan mārṣāḥ sarvasattvānāmapi maraṇaṁ bhaviṣyati|

[247] atha te pūrvimakā sattvā daharāḥ ye prathamataramutpannāste yena bhagavāṁstenāṁjaliṁ praṇamayya bhagavantametadavocan - notsahāmo vayaṁ punarbhagavaṁ jātiṁ maraṇaṁ ca draṣṭum bhagavān āha - tatkiṁ yūyamutsahatha vīryavalālabdham ta āhuḥ tathāgataṁ saṁmukhaṁ paśyemaḥ tasya ca sakāśāddharmaśravaṇaṁ mṛṣṭaṁ manāpaṁ śṛṇuyāmaḥ tathāgataśrāvakasaṁghaṁ ca niṣaṇṇaṁ paśyemaḥ bodhisattvān mahardhikān mahānubhāvān paśyemaḥ īdṛśaṁ ca bhagavannotsahāmo jātiṁ maraṇaṁ ca draṣṭum

[248] atha khalu bhaiṣajyaseno bodhisattvo mahāsattvo ṛddhibalenotthāyāsanāt sārdhaṁ taiḥ paṁcabhirbodhisattvaśataiḥ te sarve ṛddhyā utthāyoparyantarīkṣe caṁkramanti| paryaṁkañca badhvā dhyāyanti| teṣāṁ sarvakāyebhyaḥ siṁhā niṣkrāmanti| vyāghrā niṣkrāmanti| vyāḍā niṣkrāmanti| hastino niṣkrāmanti|

mahāṛddhivikurvitāni darśayanti| parvateṣu ca paryaṁkaṁ badhvā niṣīdanti| viṁśatiryojanasahasrāṇyūrdhvamāruhanti| daśa koṭīsahasrāṇi candramasūryāṇi-m-avataranti|

[249] atha khalu te daharāḥ sattvā bhagavantametadavocan - ko bhagavan hetuḥ kaḥ pratyayo mahāraśmyāvabhāsasya mahacca ṛddhivikurvitā loke prādurbhūtāḥ

bhagavān āha - paśyatha kulaputrā etau candrasūryau prādurbhūtau| ta āhu| paśyāmo bhadanta bhagavan paśyāmo bhadanta sugata;

bhagavān āha - eṣa bodhisattvaiḥ svakāyād raśmyāvabhāso ṛddhiprātihāryaṁ ca darśitaṁ sandarśayitvā sattvānān dharman deśayanti| bahujanahitāya bahujanasukhāya lokānukaṁpāyairmahato janakāyasyārthāya hitāya sukhāya devānāṁ ca manuṣyāṇāṁ ca ihaiva te mānuṣyake kāye vīryabalamupadarśayitvā īdṛśam ṛddhibalamupadarśayanti|

āha| deśayatu bhagavān raśmyāvabhāsaprādurbhāvāya dharmam

[250] evamukte bhagavān bhaiṣajyasenaṁ bodhisattvaṁ mahāsattvametadavocat - paśyasi tvaṁ bhaiṣajyasena trisāhasramahāsāhasro lokadhātuḥ ṣaḍvikāraṁ prakaṁpitaḥ

āha| paśyāmi bhagavaṁ paśyāmi sugata| tasya mama bhagavannevaṁ bhavatvahaṁ tathāgatametamarthaṁ paripṛccheyaṁ|

bhagavān āha - pṛccha tvaṁ bhaiṣajyasena yadyadevākāṁkṣasyahaṁ te tasya tasyaiva praśnasya vyākaraṇena cittamārādhayiṣyāmi nirdekṣyāmi vibhajiṣyāmi| bhaiṣajyasena yadatītānāgatapratyutpanneṣvadhvasu tatsarvaṁ darśayiṣyāmi|

āha| deśayatu me bhagavan kaukṛtyavinodanārthaṁ| ihāhaṁ bhagavan paśyāmi tathāgataṁ caturaśītibhirdevaputrasahasraiḥ parivṛtaṁ caturaśītibhiḥ koṭīsahasrairbodhisattvaiḥ parivṛtaṁ; dvādaśabhiḥ koṭīsahasrairnāgarājñāṁ parivṛtaṁ| aṣṭādaśabhiḥ koṭīsahasrairbhūtānāṁ parivṛtaṁ paṁcaviṁśatibhiḥ koṭīsahasraiḥ pretapiśācaiḥ parivṛtaṁ|

[251] bhagavān āha - nūnamete bhaiṣajyasena sattvāḥ ya iha parṣadi mamāntike sannipatitā sanniṣaṇṇā dharmaśravaṇāya| ta ete bhaiṣajyasenādyaiva saṁsāraṁ paścanmukhaṁ kariṣyanti| adyaiva daśabhūmipratilābhino bhaviṣyanti| daśabhūmipratiṣṭhitā nirvāṇadhātaumanuprāpsyanti| sarvasattvahitaiṣiṇaḥ jarāmaraṇaparimokṣaṇārthāya kṛtadharmāḥ sukhāvahāḥ kleśapāśaṁ nirjitvā prāpsyante buddhaśāsanāṁ|

āha| kimete bhagavan sattvā bahūni sattvasthānāni nānāvicitraiḥ karmabhiṛ utpannāni| te bhagavantaṁ parivāryāvasthitāni

bhagavān āha - śṛṇu bhaiṣajyasena| āha ca -

(141) mūḍhāḥ sattvā na jānanti kuto mokṣo bhaviṣyati|

bahavo navakāḥ sattvāḥ adya prāpsyanti dhāraṇim

(142) jñāsyante te sarvadharmān prāptaye daśabhūmināṁ

bhūmayo daśa prāpsyanti buddhakṛtyaṁ kariṣyataḥ

(143) vartiṣyanti dharmacakraṁ dharmavarṣaṁ pravarṣiṣūḥ

ramaṇīyaṁ śāsanaṁ mahyaṁ yena sattvāḥ samāgatāḥ

(144) devanāgāśca pretāśca asurāśca sudāruṇāḥ

daśabhūmipratiṣṭhante dharmaśabdaparāhatāḥ

(145) dharmabherī udāharaṁ dharmaśaṁkhaprapūraṇaṁ

adyaiṣāṁ navasattvānāṁ vīryasthāmo bhaviṣyati|

(146) dharmaṁ prāpsyanti adyeme yathā prāptaṁ tathāgataiḥ||

[252] atha paṁcamātrāṇi sahasrāṇi daharāṇāṁ sattvānāmutthāyāsanebhyo yena bhagavāṁstenāṁjaliṁ praṇamayya bhagavantametadavocan -

(147) gurubhāro bhagavan kāyo dāruṇaśca mahābhaya|

saṁsāre yena badhyāmaḥ paryantamavijānakāḥ

(148) mārgan tu na vijānāmo mārgameva na dṛśyate|

andhabhūtā vayaṁ nātha asmākaṁ kuru saṁgrahaṁ|

(149) adhyeṣāma vayaṁ vīra dharman deśaya nāyaka;

alpaprajñā vayaṁ jātā anabhijñāḥ sukhasya hi;

(150) dharman deśaya| asmākaṁ duḥkhān mocaya dāruṇāt

yatra yatropapadyemaḥ syād asmād buddhadarśanaṁ||

[253] atha khalu bhaiṣajyaseno bodhisattvo mahāsattvo yena te daharā sattvāstenopasaṁkrāmadupasaṁkramya tān daharān sattvāṅ gāthāyā adhyabhāṣatā -

(151) bhūṁjadhvaṁ bhojanaṁ yūyaṁ pivadhvaṁ rasamadbhutam

paścādviśāradā bhūtvā dharmaṁ śroṣyatha nirbhayaṁ|

ta āhuḥ

(152) bhadanta sthavira kastvaṁ najānīmo vayaṁ tava;

prāsādikastvaṁ paśyāmaḥ śāntarūpaṁ mahāyaśaḥ

(153) muktaṁ narakatiryakṣuḥ pretalokān mahābhayāt

śāntaste sarvapāpāni yathā jagati śobhase

(154) paśyāma haste karakaṁ saptaratnasamanvitam

sūtraṁ ratnāmayaṁ kāye tejarāśau viveṣṭitaṁ|

(155) prativoḍhuṁ na śaktā sma śāntavākyasya te vaca|

bhaktena kāryaṁ nāsmākaṁ pānena svādunā na ca|

(156) bhaktāduccāra saṁbhavati pānān mūtraṁ tathaiva ca|

śoṇitaṁ ca rasādbhavati raktān māṁsaṁ ca saṁbhavet

(157) nāsmākaṁ bhojanaṁ kāryaṁ pānān caiva sausaṁskṛtaṁ;

vastrāṇi naiva sūkṣmāṇi paṭṭāpaṭṭakasaṁhitā|

(158) kaṭakāśca na sauvarṇāḥ kāryā muktilatā na ca;

aṅguliyairnaiva kāryaṁ sarve te nityadharmiṇaḥ

(159) jīvitairarthikāśca sma na ca gacchema durgatim

arthikā dharmadānena na devānāṁ sukhairapi;

(160) kalyāṇamitratā kāryā na rājyaṁ cakravartināṁ|

cakravartī mariṣyanti tyaktvā dvīpān suśobhanāṁ|

(161) na putrāḥ pṛṣṭhato yānti na bhāryā na ca dhītarāḥ

saptaratnā nivartyante nāpi yāsyanti pṛṣṭhataḥ

(162) saṁnnipātya bahujano na ca yāsyanti pṛṣṭhataḥ

purataśca na dhāvante vaśaṁ bhūyo na vartati|

(163) ekajanmikarājāno bhrāmitā nityayā bahu;

kṛtvā pāpāni karmāṇi rauravaṁ prapatanti te|

(164) caturdiśaṁ paryaṇvitvā saptaratnairmahardhikaiḥ

yāsyate kva ca sā ṛddhiryadā vatsyati raurave|

(165) mṛtā ṛddhiṁ na śaknonti yatra bhūmirna vidyate

sthavira śṛṇuṣva asmākaṁ gaccha yena tathāgataḥ

(166) kāṁkṣāma darśanaṁ tasya mātāpitroryathaiva hi|

nāsmākaṁ vidyate mātā na pitā bhrātarau na ca

(167) saiva lokagururmātā pitā caiva tathāgataḥ

saiva candraśca sūryaśca kṣemamārgapradarśakaḥ

(168) mocakaḥ sa hi saṁsārād yena bhūyo na jāyate|

sa nāvātarako oghāt kleśoghācca mahābhayāt

(169) tena pratāritāḥ sattvāḥ na bhūyo vinivartitā

saddharmo deśitastena agrabodhīya kāraṇāt

(170) nāsmākaṁ bhojanenārtho na rājyaphalakāṁkṣiṇaḥ

na devalokagamanaṁ kāryaṁ narakabhīrubhiḥ

(171) sukhaṁ mānuṣyakaṁ janma dṛśyate yatra sarvavit

alpāyuṣāśca dṛśyante duṣkṛtaiḥ karmabhiḥ svakaiḥ

(172) rajyante kāmabhogaiste vindanti maraṇaṁ na ca;

jānanti na ca bhāyante nirodhotpādavāṁcitāḥ

(173) sukṣmān dharmān na jānanti sūkṣmaṁ kāryaṁ na kurvante|

śāntaṁ dhātuṁ na jānanti avidyākrāntacetasaḥ

(174) cyavanto na ca khidyante jāyantaśca punaḥ puna

dīrgharātraṁ duḥkhahatā nityatā daṇḍatāḍitāḥ

(175) parakīyaṁ hariṣyanti ghātyante bandhane tathā|

paṁcabandhanabaddhāste pūrvapāpena coditāḥ

(176) nirāśāśca mariṣyanti śokaśalyasamarpitā|

niruddhyamāne vijñāne karuṇaṁ paridevate|

(177) ko nu trātā bhaveyurme sarvān bhogān dadāmyahaṁ|

suvarṇarupyasphaṭikaṁ dāso'pi ca bhavāmyahaṁ|

(178) sarvaṁ karma kariṣyāmi dāsayogyaṁ ca yadbhavet

na rājyabhogairme kāryaṁ na dhānyena dhanena ca|

(179) svaśarīreṇa me kāryaṁ pāpakārī na mucyate

evaṁ hi sthavirāsmākaṁ na kāryaṁ bhojanaṁ bhavet

(180) rājāno'pi mariṣyanti yairbhuktaṁ mṛṣṭabhojanam

devaputrā mariṣyanti pītvā vai pānamuttamam

(181) nānārasamāyuktaṁ saṁskṛtaṁ pānabhojanam

ānīya purato rājā jihvayā spṛśati bhojana|

(182) rasagṛddhā hi rājānaḥ pāpaṁ kurvantyanalpakaṁ|

rajyantyanityehi rasehi yatra sāraṁ na vidyate|

(183) pānaṁ na kāryaṁ asmākaṁ na ca kāryaṁ hi bhojanaṁ|

dharmatā īdṛśī kāryā duḥkhān mucyema yadvayam

(184) tṛṣṇābandhananirmuktaṁ tṛṣṇākleśavimokṣanam

sarvabandhananirmuktaṁ taṁ buddhaṁ śaraṇaṁ gatāḥ

(185) vayaṁ hi śaraṇaṁ yāmo lokanāthaṁ maharṣiṇam

vandanāya vayaṁ yāmaḥ sattvānāṁ priyadarśanam

(186) nāmaṁ tava na jānāmo nāmamācakṣva śobhanaṁ|

bhaiṣajyaseno bodhisattva āha -

yūyaṁ hi śrotumicchadhvaṁ nāmaṁ sarvajanasya ca|

(187) vṛtaḥ koṭīśatasahasrairnavakaiḥ sattvaistathāgataḥ ta āhuḥ

tava tu śrotumicchāmo nāmaṁ sarvaguṇodbhavaṁ|

(188) gaṁbhīraṁ śrūyate nāma yastvaṁ buddhānā śrāvakaḥ āha|

bhaiṣajyaseno nāmnāhaṁ sattvānāṁ bhaiṣajyo hyahaṁ

(189) yuṣmākaṁ deśayaiṣyāmi sarveṣāmauṣadhaṁ varaṁ|

sarvavyādhipraśamanaṁ sarvavyādhihate jane|

(190) rāgo vyādhirmahāvyādhirloke naśyati dāruṇaḥ

moho vyādhirmahāghoro yena bhrāmyantyabuddhayaḥ

(191) vrajanti narakaṁ sattvāstiryakpreteṣu vai tathā;

dveṣagrastā ime bālāsteṣāṁ śāntiḥ kathaṁ bhavet||

ta āhuḥ

(192) mucyema sarvaduḥkhātaḥ śrutvā dharmamimaṁ śubhaṁ|

muktaśca sarvaduḥkhebhyo bālabuddhirajānakāḥ

[193) śroṣyāmahe dharmadānaṁ pāpakarmavivarjitāḥ

sarvapāpaṁ vivarjitvā prahīṇabhayabhairavāḥ

(194) drakṣyāma śīghraṁ saṁbuddhaṁ sarvavyādhipramocakaṁ|

vaidyarājaṁ mahāvaidyaṁ duḥkhitānāṁ cikitsakaṁ|

(195) gaccha sthavira śīghraṁ tvaṁ vandanāya tathāgataṁ|

vandasva cāsmadvacanā brūhi lokavināyakaṁ|

(196) praśāmaya imaṁ vyādhiṁ praśamayāgniṁ sudāruṇam

kāyo yaṁ jvalitaḥ sarvo dahyamāno na śāmyate|

(197) duḥkhārditānāmasmākaṁ kāryuṇyaṁ kuru subrata;

kāyabhāro mahābhārastīkṣṇabhāraḥ sudāruṇaḥ

(198) dveṣamohasamākrānta udvahanti janāḥ sadā;

punaḥ punarbahaṁtyete mokṣabhāraṁ ajānakāḥ

(199) martavyaṁ na vijānante trāso notpadyate tha ca|

mokṣamārgaṁ ajānānā mokṣamārgamapaśyakāḥ

(200) asmākaṁ maraṇaṁ nāsti kadāciditi susthitāḥ

saṁbhrāntā na vijānanti paśyanto mātaraṁ mṛtā;

(201) pitaraṁ na smarantyanye nityaṁ ca vyādhipīḍitāḥ

kleśakarmapraluḍitāḥ kathaṁ bhūṁjāma bhojanaṁ|

(202) duḥkhāntaṁ na vijānāmaḥ śramāmo'tha nirarthakaṁ|

asmākamīdṛśān duḥkhāṁ jātyavidyānidānataḥ

(203) mahābhayaṁ gurubhāraṁ saṁjñāsaṁskāravedanā|

tṛṣṇāyā bhrāmyate bālo yo dharmaṁ na vijānate|

(204) jāto loke hyanarthāya kāyabhāraparivṛta

snānānulepanaiḥ kāryaṁ śucirvastraṁ suśobhanaṁ;

(205) mṛṣṭaṁ ca bhojanaṁ kāryaṁ yaccharīre manoramaṁ|

paṁcatūryāmanojñaṁ ca śrotraṁ yācayate tathā|

(206) saptaratnasamutthāne rūpe rajyanti cakṣuṣī|

sarvaṁ rasaṁ ca mṛṣṭaṁ ca jihvā yācayate'pi ca|

(207) sparśaṁ ca mṛdukaṁ sūkṣmaṁ kāyaḥ prārthayate sadā|

māṁsadvayaṁ śarīreṇa niṣpīḍya ratī jāyate|

(208) kāyo hyacetano hyeṣa ratiṁ kastatra vindati|

pādau me ramatastatra prāvṛtaṁ carma sundaraṁ|

(209) bhavanti maraṇatrāṇa na vastraṁ na vilepanam

bhaveccharīraṁ na trāṇaṁ kiṁ punarvastralepanaṁ|

(210) puruṣa ucyate kāyameti śvāsaṁ mahābalaṁ

tīkṣṇaṁ balaṁ pratisaṁkhyā taṁ taccharīre mahāguṇaṁ|

(211) krīḍayā bhrāmitaḥ pūrvamaśvahastiparivṛtaḥ

mokṣadharmamajānāno rato'haṁ pāpakarmaṇi|

(212) krīḍyā kārāpitaṁ pāpaṁ paralokamajānatā;

punaḥ punaśca jāto'haṁ punarmaraṇamāgataḥ

(213) śokaḥ punaḥ punardṛṣṭaṁ paridevitabandhanaṁ|

mātṝṇāṁ maraṇaṁ dṛṣṭaṁ dṛṣṭāśca pitaro mṛtā|

(214) jñātayo bhaginī caiva putrā bhāryā mṛtāpi ca|

śūnyāḥ sarve hi saṁskārāḥ ko hi rajyet sacetanaḥ

(215) viśvāsaṁ hi mayā jñātaṁ lobhagrastena cetasā;

śāntaṁ dharmaṁ nopalabdhaṁ maraṇaṁ nābhinanditaṁ|

(216) tena dānaṁ na dattaṁ me lobhenāvṛtacetasā;

kaḥ syā lobhasamo pāpo yo'dyāpi na nivartate|

(217) saṁbhrāntā hi vayaṁ jātāḥ saṁbhrāntaṁ sakalaṁ jagat

saṁbhrāntāḥ śabdaṁ śṛṇumo asaddharmaparigrahaṁ|

(218) mokṣaṁ dhyānāśca margāmaḥ śarīraṁ nodvahāmahe|

buddhā bhavema lokārthe śāstāro guravo jage|

(219) buddho mātāpitā loke buddho mārgapradarśakaḥ

pravarṣate dharmavarṣaṁ jaṁbudvīpe samantataḥ

(220) mūḍhā sattvā na jānanti dharmāṇāṁ saṁgrahaṁ kathaṁ|

bodhau cittaṁ nāmayitvā labhyate dharmasaṁgrahaḥ

(221) śunyatāḥ sarvasasṁkārāḥ śunyā bhogā dhanaṁ tathā|

paśyāma śunyamātmānaṁ dṛṣṭvā jātā nirāśatā;

(222) sthavira bhaiṣajyasena-m-asmākaṁ vacanaṁ śṛṇu;

dūraṁ ca te visarjema bodhisattvānā kāraṇāt

(223) bodhisattvā na khidyante vīryavanto mahātapāḥ

smṛtvā saṁsāradoṣāṇi kurvante guṇasaṁgrahaṁ;

(224) gacchasva yena śāstāsau pṛccha cāsmāka kāranāt

pratilabdhasukhaḥ śāstā mā kiṁcit khidyate jinaḥ

(225) parājitastvayā māraḥ sabalaśca savāhanaḥ

śīghramujvālitaṁ dharmaṁ sarvasattvasukhāvahaṁ|

(226) na cāsmābhiḥ śruto dharmo yena buddhā bhavemahe|

gacchasva śīghraṁ sthavira asmākaṁ hitakāraṇāt

(227) nottarāmo vayaṁ yāvanna paśyāmastathāgataṁ|

dvātṛṁśalakṣaṇadharaṁ sthitā sarve sagauravāḥ||

bhaiṣajyaseno bodhisattva āha -

(228) ūrdhvaṁ tāvannirīkṣadhvaṁ kiṁ paśyadhvaṁ hi sāṁprataṁ;

(229) avalokayanti te ūrdhvaṁ sthitā paṁca anūnakāḥ

śatāstrayaḥ sahasrāṇi kūṭāgārāḥ samantataḥ

(230) saptaratnasamārūḍhā ratnajālasvalaṁkṛtāḥ

padmaṁ praphullaṁ madhye ca divyagandhapramuñcanaṁ|

(231) pṛcchanti sthaviraṁ tatra kimetadiha dṛśyate

kūṭāgārā ratnajālāḥ padmakesarasaṁsthitāḥ

bhaiṣajayasena āha -

(232) sthānānyetāni yuṣmākaṁ gacchadhvaṁ buddhadarśanaṁ|

vandadhvaṁ lokapradyotaṁ yo'sau lokottaro guruḥ||

ta āha -

(233) tatra mārgaṁ na jānīmo na paśyāmastathāgataṁ|

yatra mārgaṁ na jānīmaḥ kva gacchāma vandituṁ|

bhaiṣajyasena āha -

(234) vandanāya ca gantavyaṁ śāstāramamṛtaprabhaṁ|

anantamākāśamiva parāmārṣṭuṁ na śakyate|

(235) sthāne tiṣṭhatyasau śāstā yathā tiṣṭhanti meravaḥ

sumerorupamā syāttu gādhaṁ caiva mahodadhe|

(26) tṛsāhasrācca rajaso na jñānādbuddhasaṁbhavāt

vandito lokapradyoto bodhisattvairdaśaddiśe||

ta āhuḥ

(237) vilokaya lokanātha pūrayāsmakamāśayaṁ|

cittena vandito'smābhiḥ śāstā labdhāstataḥ phalaṁ|

bhaiṣajyaseno bodhisattva āha -

(238) na gandhai rajyate śāstā na mālyairna vilepanaiḥ

hetuṁ gṛhṇāti sattvānāṁ yena mucyanti saṁskṛtāt

(239) saṁgrāmaṁ na kurute tasya māraḥ paramadāruṇaṁ;

damito hi mano yena buddhaṁ ca śaraṇaṁ gataḥ

(240) mṛtyorna yāsyati vaśaṁ kṣipraṁ prāpsyati dhāraṇī

cittaprasādaṁ kṛtvāsau śāstāraṁ paśyate tataḥ

[254] atha khalu bhagavān kalaviṅkarutasvaramanojñaghoṣastathāgataḥ smitaṁ prāduṣcakāra;

atha khalu bhaiṣajyaseno bodhisattvo mahāsattva utthāyāsanād yena bhagavāṁstenāṁjaliṁ praṇamya bhagavantametadavocat - ko bhagavan hetuḥ kaḥ pratyayaḥ smitasya prāduṣkaraṇāya yadbhagavato mukhadvārāccaturaśīti raśmiśatasahasrāṇi niścaranti| taiśca raśmibhiriyaṁ trisāhasramahāsāhasrā lokadhāturavabhāsena sphuṭābhūt sarve ca dvātṛṁśan mahānirayā sphuṭā abhūvan dvātṛṁśatiśca devabhavanānyavabhāsitāni| tāśca raśmayo nānāvarṇāḥ tadyathā nīlapītalohitāvadātamaṁjiṣṭhāsphaṭikarajatavaraṇāḥ etāśca raśmayo bhagavato mukhadvārānniścarya trisāhasramahāsāhasrāyāṁ lokadhātau sattvānāṁ sarvamukhopadhānaṁ kṛtvā punareva pratyudāvṛtya bhagavantaṁ saptakṛt pradakṣiṇākṛtya bhagavato mūrdhanyantaradhīyanta;

[255] atha khalu bhaiṣajyaseno bodhisattvo mahāsattvo bhagavantametadavocat - pṛccheyamahaṁ bhagavantaṁ tathāgatamarhantaṁ samyaksaṁbuddhaṁ kañcideva pradeśaṁ sacenme bhagavān avakāśaṁ kuryāt pṛṣṭaḥ praśnavyākaraṇāya;||

evamukte bhagavāṁ bhaiṣajyasenaṁ bodhisattvaṁ mahāsattvametadavocat - pṛccha tvaṁ bhaiṣajyasena yadyadevākāṁkṣasyahaṁ te tasya tasyaiva (pṛṣṭasya) praśnasya vyākaraṇena cittamāradhayiṣyāmi|

[256] evamukte bhaiṣajyaseno bodhisattvo mahāsattvo bhagavantametadavocat - tṛṁśatkoṭīsahasrāṇi bhagavannavakānāṁ sattvānāṁ prādurbhūtāni te tathāgatasya sūkṣmān dharmadeśanāmavagāhanti| sūkṣmaṁ bhagavan bṛddhānāṁ sattvānāṁ paribhāṣanti parivadanti paripīḍayanti| na yūyaṁ bṛddhāḥ sattvā dharmaṁ jānītha nityaṁ yūyaṁmadharme cākuśale ca rajyatha| tad bhagavān mṛṣṭā manāpā vāgbhāṣante tatkena kāraṇena bhagavantamevaṁ vāgbhāṣante|

bhagavān āha - na vijānāsi bhaiṣajyasena kena kāraṇenaite sattvā evaṁ vāgbhāṣante| tathāgatasyaibhirmṛdukaṁ sukukāraṁ bhāṣitaṁ dharmaṁ śrutvā tenaite bhaiṣajyasena sarvadharmāṇāṁ arthamavabhotsyante sarvaguṇasamanvāgatāśca bhaviṣyanti| sarve ca dhāraṇāmavagāhiṣyanti| adya-d-agreṇa daśabhūmipratiṣṭhitā bhaviṣyanti| adya mahādundubhiśabdaṁ prakariṣyanti| adya mahādharmaprakārasamanvāgatā bhaviṣyanti| paśyasi tvaṁ bhaiṣajyasena imāni kūṭāgārāṇi||

bhaiṣajyasena āha - paśyāmi bhagavan paśyāmi sugata|

bhagavān āha - adyeme bhaiṣajyasena daharāḥ sattvāḥ eṣu kūṭāgāreṣvabhiruhya dharmābhisamayamanuprāpsyanti| adyeme sarvakuśaladharmapāripūriṁ kariṣyanti| adya mahādharmadundubhiṁ parāhaniṣyanti| anekeṣāṁ ca devanikāyānāmadya dharmābhisamayo bhaviṣyati| bahūnāñca nairayikānāṁ sattvānāṁ vinipātasaṁprasthitānāṁ tathāgatajñānanirdeśaṁ śrutvā sarvasaṁsāraparāṅmukhaparājayo bhaviṣyati|

[257] tasyām ca velāyāṁ vṛddhasattvairnavānavatibhiḥ koṭīśasraiḥ (sarve) srotaāpattiphalaṁ prāptaṁ te ca sarvadharmasamanvāgatā bhaviṣyanti| sarve te bhaiṣajyasena sarvaduḥkhaparivarjitā bhaviṣyanti| sarve te bhaiṣajyasena sarvatathāgatadarśanaṁ niṣpādayiṣyanti| sarve te bhaiṣajyasena mahādharmasamanvāgatā bhaviṣyanti| avalokaya bhaiṣajyasena caturdiśaṁ

[258] avalokayati bhaiṣajyaseno bodhisattvo mahāsattvaḥ samantā caturdiśaṁ sa paśyati pūrvasyān diśi paṁcāśat koṭyo gaṁgānadīvālikāsamāni bodhisattvānāmāgacchanti| dakṣiṇasyān diśi ṣaṣṭi koṭī gaṁgānadīvālikāsamāni bodhisattvānāmāgacchanti| paścimasyāṁn diśi saptati koṭī gaṁgānadīvālikāsamāni bodhisattvānāmāgacchanti| uttarasyān diśyaśīti koṭyo gaṁgānadīvālikāsamāni bodhisattvānāmāgacchanti| adhastāddiśi navakoṭīsahasrāṇi gaṁgānadīvālikāsamāni bodhisattvānāmāgacchanti| ūrdhvāyāṁ diśi koṭīśatasahasraṁ gaṁgānadīvālikāsamāni bodhisattvānāmāgacchanti|

te cāgatāgatā bodhisattvā mahāsattvā bhagavataḥ purataḥ pādau śiraśābhivandyaikānte taśuḥ

[259] ekāntasthitānāṁ daśadigbhyāgatānāṁ bodhisattvānām mahāsattvānāmatha bhaiṣajyaseno bodhisattvo mahāsattvo bhagavantametadavocat - kimetad bhagavan khaga-m-antarīkṣe kṛṣṇarūpaṁ lohitarūpaṁ (ca) paśyāmi| bhagavān āha - kimidaṁ bhaiṣajyasena| na saṁjānāsi yadetadantarīkṣe kṛṣṇarūpaṁ lohitarūpaṁ ca paśyasi|

āha| na jānāmi bhagavan na jānāmi sugata|

bhagavān āha - eṣa tathāgata eva jānāti| māro'yaṁ bhaiṣajyasena vicakṣuskaraṇāyehopasaṁkrāntaḥ icchasi bhaiṣajyasenaitān bodhisattvān mahāsattvān draṣṭuṁ ya ete khagāntarīkṣe vyavasthitāḥ

āha| icchāmi bhagavannicchāmi sugata|

[260] atha bhagavāṁstān bodhisattvān darśayitvā bhaiṣajyasenaṁ bodhisattvaṁ mahāsattvamāmantrayati sma| īdṛśānāṁ bhaiṣajyasena koṭīśatagaṁgānadīvālikāsamāni bodhisattvānā āgatāni|

āha| ko bhagavan hetuḥ kaḥ pratyayo yadete bodhisattvā etāvanta ihāgatā|

bhagavān āha - daharāṇāṁ sattvānāṁ pratyayena bhaiṣajyasena saṁprataṁ sarvasattvā dharmadhyānasamanvāgatā bhaviṣyanti| paśyasi tvaṁ bhaiṣajyasena ya ete bodhisattvā mahāsattvā nānārūpā āgatā ṛddhibalādhānena|

āhāvalokitāni mayā koṭīśatagaṁgānadīvālikāsamā lokadhātavastatra mayā koṭīniyutaśatasahasragaṁgānadīvālikāsamā bodhisattvā mahāsattvā dṛṣṭāḥ svakasvakena ṛddhibalena tiṣṭhanti nānārūpā nānāvarṇā nānābalasaṁsthānāstiṣṭhanti| āryadharmavihāreṣu te bodhisattvastiṣṭhanti| dharmavihāreṣu te bodhisattvaparivārāstiṣṭhanti|

[260] idamavocadbhagavān āttamanāḥ sarvaśuro bodhisattvo mahāsattvaḥ bhaiṣajyaseno bodhisattvo mahāsattvaḥ sarve ca navapurāṇakā bodhisattvā mahāsattvāḥ sā ca sarvāvatī parṣat sadevamānuṣāsuragandharvaśca loko bhagavato bhāṣitaṁ abhyanandat

Colophon B:

||0|| saṁghāṭaṁ nā[ma] mahāyānasūtraṁ mahādharmaparyāyaṁ||0||ḥ

Colophon D:

||0|| āryasaṁghāṭaṁ nāma dharmmaparyāyaṁ samāptam||0||

Technical Details

Text Version: 

Romanized

Input Personnel: 

DSBC Staff

Input Date: 

2006

Proof Reader: 

Miroj Shakya

Supplier: 

Nagarjuna Institute of Exact Methods

Sponsor: 

University of the West

Chapter: 

0